قراءة فى أوراق قديمة

[hany57]

- 6 -
تصريحات اوباما
--------------------

السلام عليكم ورحمة الله وبركاته
ناقش ضيوف حلقة ( ما وراء الخبر )
فى قناة الجزيرة الفضائية
بتاريخ 9 - 10 - 2010
تصريحات أوباما التى أعلن فيها
عن أمن إقليمى فى منطقة الشرق الأوسط
بالتعاون مع إسرائيل
تخيلوا
بالتعااااااااااااااااون
( دا معناه إنه مش شايف عرب ولا حاجة )
وأقول :
من يومين فى الجزيرة -- حلقة بأكملها
( ما وراء الخبر ) -- دا يبقى عنوانها
عن كلام أمريكى -- وقولها وضمانها
لأمن فى المنطقة -- وفق منظورها
أوباما عاوز الأمن -- فى عبارة مضمونها
إن العرب ولا حاجة -- كبارها وصغارها

إمتى تتجمعوا -- وأوباما أعلنها
فيه أمن إقليمى -- ليها ولجيرانها
صهيون هى المحور -- وانتو أذيالها
نزلتوا بحر الخيانة -- غرقتوا فى أوحالها
ليه الكلام فى العلن -- غير جوه جدرانها

إمتى ييجى الولد -- يقولها .. يعلنها
من أمريكا ما يخاف -- ما يهمه طيرانها
ثقته فى ربه كبيرة -- والنصر محورها
عابد يقيم الليل -- مغوار فى نهارها
يارب تتجمعوا -- دا يبقى أولها

--------------------------

هانئ الجمل

[hany57]

- 7 -
القذافى
1 - 3 - 2011
---------------------------

السلام عليكم ورحمة الله وبركاته
سمعت الآن إعادة لبرنامج الطبعة الأولى
وفى نهاية الحلقة نقل أحمد المسلمانى كاريكاتير
يقول إذا القذافى يوما أراد الحياة فلابد للشعب أن ينتحر
-------------------------------------
ومع إعتذارى لأبى القاسم الشابى فقد راق لى المعنى وأريد أن أكمل
وأعتذر للأوزان لأننى سأكمل مباشرة وأقول

إذا القذافى أراد الحياة
فلابد للشعب أن ينتحر

ولابد من أنهار الدما
لنرضى غرور العقيد القذر

وكل الشعوب تحب العقيد
كذلك قال بوجه عكر

ولن تروا غيرى لكم حاكما
فإما الرضوخ وإما الشرر

سأشعل ليبيا لهيبا دمارا
يمينا لظى وشمالا سقر

ومن أنتمو ترفضوا حكمتى
ومن أنتم جرذان الحفر

وإنى الزعيم وإنى الحكيم
وإنى الرسول وإنى القدر

هلموا فريقى فإلى الأمام
لنهزم شعبا نريه الكدر

دقت ساعات لعمل ونصر
وثورتنا فى طريق خطر

وهذا كتاب هنا أخضر
وجلد الكتاب دواما نضر

إسمع شروحا لتلقى علوما
وافهم شروحى تلقى العبر

لملذا تحيض النساء دواما
وليس المحيض لكل البشر

لأن المرأة فى الأصل أنثى
وأن الرجل أكيد ذكر

وما كان غيرى يريكم شروحى
وعندى العلوم وعندى الخبر

وأنى الزعيم ولى ملك ليبيا
وما فوقها من جميع البشر

وسوف أقاتل حتى أموت
فشعب كهذا عديم النظر

فلست رئيسا وعندى لجان
وكل اللجان لها مؤتمر

ولا لن أغادر قصرى هنا
ولو مات شعبى لآخر نفر

---------------------------

هانئ الجمل

[hany57]

- 8 -
الإسراء والمعراج
---------------------

يا قلبى صلى على اللى ربى صلى عليه
واصطفاه من البشر لحسن أخلاق فيه
صلى على الحبيب تبقا حبيب الحبيب
يارب أزور البقيع ويدفنونى فيه

الحزن لما بييجى ييجى ورا بعضه
سيدنا النبى شاف نفسه إنه بقا لوحده
ماتت الزوجة الحنون ستنا خديجة
وعمه أبو طالب اللى كان بيسانده

رب العباد حب يسرى عن الهادى
ويطمنه ويخلى السرور عليه بادى
بعت له جبريل بالبراق قال له تعالا زورنى
انت الوحيد لك شفاعة هديه لعبادى

ركب نبينا البراق والدنيا ليل وظلام
بسرعة وصل القدس والأنبيا بتمام
ينتظروا يوصل حبيبى علشان يرحبوا بيه
وبعد ما رحبوا قالوا صلى بنا يا إمام

وركب نبينا الصخرة الإذن بقا جاله
يعرج لسابع سما نبينا هنياله
وف كل سما ترحيب وملايكة بتسبح
وبعض م الأنبيا حباه ودعياله

نبينا لما وصل سابع سما قام خاف
لأن جبريل رجع م الحرق والله خاف
وقال له تقدم عشان دا آخرى يا طه
والدعو دا جاى لواحد إنت وما فى خلاف

نبينا دخل النور نور السما والأرض
وحب يخلع نعاله ليجيله لوم يشتد
ما أذنشى له ربنا وقربه منه
وأهداه خمس صلوات رحمة وحب وفرض

ما بين الصلا والصلا كفارة لكل ذنوب
للى يسيب الكبائر وعن المعاصى يتوب
يارب توب عليا واحفظنى من نفسى
النفس دى أماره رمتنى كتير فى ذنوب

يارب لاجل النبى وذكراة المعراج
تعتقنى م النار إلهى وتدينى إفراج
واكتب لى موت الشهدا وأجرة الصابرين
وكل سنة تكتب لى حجة مع الحجاج

حبيبى قولى على قدى إعذرنى يا طه
سيرتك بتسعد روحى وف قلبى محلاها
ياريتنى بقى كنت شاعر يقدر كتير يكتب
كنت بدرت الأرض وبمدحك املاها

واختم كمان بالصلا على دوا روحى
ع النبى صلاتنا شفا لجروحكو وجروحى
يارب قدرنى اصلى عليه لحد ماموت
وارزقنى ربى الشهادة ساعة طلوع روحى

قولوا آمين

---------------------

هانئ الجمل

[hany57]

- 9 -
فى ذكرى الهجرة
( ومضات من سيرة الحبيب من البعثة إلى الهجرة )
-------------------------------------------------
صلاتى تسبق سلامى .... عليك حبيب الله
ياللى الإله اصطفاك .... من كل خلق الله
فيه الخليل والكليم .. لما انت بس الحبيب
واللى يحبك يحبه ....... والجنة تستناه

واللى يصلى عليك ....... ربى يصلى عليه
عشرة قصاد كل مرة .. وملايكة تعمل أيه ؟
للعبد تستغفر ........... وتكتب الحسنات
وان صلى ليلة جمعة .... نبينا يسمع ليه

ألفين صلا وسلام ..... سيرتك يا طه نور
كتبت فى المعراج ..... أما النهارده الدور
على هجرتك ياحبيبى .... سيرتك بتحلالى
ياللى الإله أرسلك .. رحمة وبشرى ونور

لما ربى اختارك ....... للرسل تبقى ختام
ومن علينا بنعمه ........ وجيتنا بالإسلام
جعل الإيمان باللى قبلك .. من تمام الدين
ماهوه أصل الدين ..... عند الله الإسلام

الدعوة بدأت سر ........ خوف من الكافرين
وخصوصا لسه مفيش ..... عدد كتير مسلمين
ولما زادوا شويه .......... الأمر جا بالجهر
( فاصدع بما تؤمر وأعرض عن المشركين )

نادى النبى وجمعهم .... قام قالوا أيه السبب
قام قال لهم ع الرسالة ..سخروا وقلوا الأدب
واستغربوا دعوته ........... وكذبوا كلامه
أما طويل اللسان .... كان التعيس أبو لهب

راحت قريش لابو طالب .. وقالوا له لنا خليه
شيل حمايتك عنه ......... واحنا بقى نوريه
وإما نحاربك معاه ......... وتبقى لينا عدو
لحد مافريق يهلك .... وموضوعنا دا ننهيه

أبو طالب عرض الكلام ............ على النبى المختار
رد النبى مااتركه ................ إلا اما اشوف إظهار
للأمر دا من الله ...................... أو أنقتل دونه
لو وضعوا الشمس فى يمينى .. ووضعوا القمر فى يسار

قال له قول مابدالك ..... عنك أنا اكفيهم
حمايتى لك ممدودة ...... ومنى أنا ليهم
دا انت ابن أخويا يعنى .. زى إبنى تمام
والله عمرى أبدا ...... ما أسلمك ليهم

قريش عملت حيل ....... مع رسول الله
راح عتبه بن ربيعة ... قال يتفاوض وياه
قال له لو عايز حكم .... تبقى علينا ملك
تحكم على الأشراف ... والأمر دا ماحلاه

ولو انت عايز مال ...... نخليك أغنانا
وسيب كلامك اللى ....... تعبنا وخلانا
هنتساوى بالعبيد .. وعمر دا ما يحصل
ولما خلص كلام ....... قام رد مولانا

قرا فى سورة ( فصلت ) .. وعتبة يسمع ليه
وجسمه كان يرتعش ... وخوف باين فى عنيه
وسأل نبينا يكف ............. وفكره بالرحم
ورجع لقومه يقول ..... مالكوشى دعوة بيه

وفكروا بفكرة تانية ............ وفكرهم مذموم
راحوا لسيدنا النبى .. قالوا انت عزيز فى القوم
علشان مانفضل حبايب ...... وننهى موضوعنا
تعبد إلهنا يوم .............. ونعبد إلهك يوم

نزلت هنا على طول .. سورة ( الكافرون )
حاولوا بمطلب تانى ..... يفرغوا المضمون
قالوا له شيل الآيات ..... اللى عليها نقول
ومعاك هنعمل هدنه ..... ويبقى بينا سكون

حاولوا بأفعال كتير ..... ونبينا عزمه شديد
لم ينخدع بكلامهم ........ ولا يخاف تهديد
زادوا قوى فى أذاه ........ وآذوا أصحابه
والكون دا تدبير إله ... ولكل شيئ مواعيد

وقالو هنعجزه ....... بحاجة فوق طاقته
قالوا له شق القمر .. فانشق من ساعته
قام قال تعالوا اشهدوا .. قالوا أكيد ساحر
لازم يشوف العذاب ....... هوه وبطانته

كتر العذاب من قريش .... لحبيبى وأصحابه
يستقبلوه بالأذى ............. إذا فتح بابه
فاكرين بلال والحر .. والصخرة على صدره
وعمار ودرع الحديد .... وايمانه لم سابه

واشار نبينا على بعض ..... م المسلمين وياه
يهاجروا يروحوا الحبشة .. والأرض أرض الله
لأن فيها ملك ............. ما حد انظلم عنده
وممكن فى يوم يرجعوا ........ لما يريد الله

ولما أسلم عمر ......... ودا أمر شرحه يطول
رجعوا اللى كانوا فى الحبشة .. ونختصر ونقول
حصلت هجرة تانية ........... برضه للحبشة
وفد قريش راح يجيبهم ..... رجع خايب مذلول

ولما ماتت خديجة ....... ومات أبو طالب
وكانوا همه السند ..... فى الشدة وحبايب
حزن حبيبى كتير .. وقريش زادت فى أذاه
وحبيبى صابر وعارف ... أمر الإله غالب

ولما شاف النبى ......... قريش وإعراضها
وشايف ان الدعوة ..... مش هيه دى بلادها
قابل جماعة من يثرب .. جم مكة لاجل الحج
عرض عليهم الدعوة ......... بكل أبعادها

وقال لهم ساعدونى .. فى رسالتى والتبليغ
بصوا لبعض وقالوا ..... والله كلامه بليغ
دا هوه دا النبى ... اللى اليهود حكوا عنه
ما حد له يسبقنا .... ونبقالوا حصن منيع

وفى البيعة الأولى .... بايعوا النبى العدنان
لا يشركوا ولا يزنوا ... ولا ييجوا بالبهتان
ولا قتل ولاد ولا سرقة .. ونبينا بعت اتنين
من الصحابة للفقه ....... ويقروهم قرآن

وجات البيعة التانية ....... وجم وقابلوا الحبيب
بايعوه تانى من جديد .. على أى شيئ لو رهيب
حتى الجهاد والقتال ......... بايعوا نبينا عليه
ونبينا اختار منهم ......... اتناشر راجل نقيب

ولما علمت قريش ...... زادت الأذى أضعاف
قام نبينا الكريم ......... على الصحابة خاف
أذن لهم بالهجرة ......... يروحوا إلى يثرب
والهجرة كانت سر .. خوف من أذى الأجلاف

وقعدوا كفار قريش .... فى دار لإبن كلاب
وقالوا احنا نجيب ..... من كل قبيلة شاب
ولما يطلع محمد ... من داره يضربوا فيه
ضربة راجل واحد ...... وتاره يبقى غاب

واتفقوا إن الرأى .. سديد ومافى خلاف
ويبقى بين القبائل ... مع بعضها أحلاف
ودمه بقى يتفرق .. بين القبائل جميعها
ويرضى أكيد بالدية .... فرع عبد مناف

وربى أخبر نبينا .............. بمكر للكفار
قام نبينا وراح ......... لابو بكر دخل الدار
وقال له الإذن جالى ...... يابو بكر بالهجرة
أبو بكر سأله الصحبة . قال له ( نعم ) دا قرار

وأبو بكر كان مجهز ...... من الدواب اتنين
وأهله صنعوا السفرة .. فى جراب يكفى اتنين
قطعت أسماء نطاقها ...... ربطت فم الجراب
علشان كدا أطلقوا ..... عليها ذات النطاقين

واستأجروا للرحلة ...... دليل وكان كافر
عبد الله بن أريقط ...... وكان دليل ماهر
استأمنوه ع الركايب .... والسر ويا الزاد
وميعادنا بعد تلاته .. فى الغار وكون فاكر

ولما كان الليل ........ نبينا أراد يمشى
قال له تعالا يا على .. نام هنا ف فرشى
وقال له دى أمانات .. أقول لك أصحابها
إبقى لهم ردها ...... بعد أنا ما امشى

نبينا فتح الباب .. قرا ( ..فأغشيناهم ..)
وشباب الكفر واقف ..... قام ربنا عماهم
ونبينا مشى من بينهم ..... كأنهم نايمين
مكروا ومكر الله .... مافى حاجة نفعاهم

وكل شوية يبصوا .... من تقب كان فى الباب
وسيدنا على كان نايم .. فاكرينه النبى يااحباب
ولما طلع النهار .......... قمت لهم يا على
ساعتها شافوا الخزى ..... وخيبة تملا كتاب

كان الرسول الكريم ........ وصاحبه وصلوا الغار
كانوا سوا الاتنين ................ وتالتهم القهار
وابو بكر ع النبى خايف .. قال النبى ( لا تحزن )
واللى معاه ربنا .............. مايهمهوش أشرار

واللى الإله يحرسه .. مين راح يطوله مين
ماهو بره باب الغار .... كفار كتير واقفين
ما حد منهم فكر ........ يبص جوا الغار
واللى ييأس يرجع ... من بعد يوم واتنين

عبد الله بن ابو بكر .... فى الفترة دى بيروح
يشوف أبوه والحبيب ....... اللى فداه الروح
يمدهم بالشيئ ........... اللى كانوا يعوزوه
وبعد ما يمشى تيجى .. على أثره غنم بتروح

وبعد تلات أيام .......... كان الدليل واصل
وهوه مشى قدامهم ... أخدوا طريق الساحل
وبرضه ناس لمحوهم .. راحوا قالوا لقريش
وسراقه قاعد سامع .... وقال دول الشاغل

نبينا ويا ابو بكر ................ واتنين وياهم
وصلوا لخيمة ام معبد ......... ليشتروا غداهم
ملقوشى عندها حاجة .. غير شاه وضرعها جف
حلبها نبينا وشربوا ........... وأمنت بدعواهم

ولما قرب سراقة ....... من النبى وصاحبه
فرسه غاص فى الرمل .. نزل وقام صاح به
وركبه تانى التقى .... رجليه غاصت للركب
طلب الأمان م النبى .... واللى كتب صاحبه

واصل نبينا السير .......... أبو جبين وضاء
قبل المدينة بشوية ...... قعد النبى فى قباء
اسس فيها مسجد .... من أول يوم ع التقوى
وواصل بعدها سيره ...... لمدينته ربى شاء

وقابلوه الأنصار ....... يرضى عليهم الله
فرح بيملا الوجوه ... وفى القلب يا محلاه
ستات شباب شيوخ ..... أطفال خرج الكل
بيغنوا بنشيد جميل .. اللى الجميع غناه :

طلع البدر علينا ........ من ثنيات الوداع
وجب الشكر علينا ....... ما دعا لله داع
أيها المبعوث فينا ... جئت بالأمر المطاع
جئت شرفت المدينة .. مرحبا يا خير داع

----------------------------------

هانئ الجمل

[hany57]

- 10 -
لمراتك حق
( بعض من حقوق الزوجة فى ضوء الهدى النبوى للمصطفى
صلى الله عليه وسلم القائل : إنما النساء شقائق الرجال )
----------------------------------------


لنا فى الرسول قدوة ..... اسمع صلاتكو عليه
واللى عليه بيصلى ........ صلاته توصل ليه
يارب صلى تملى ........... واوعدنى بزيارة
واللى يصلى كتير ............ نبينا يشفع فيه

الزوجة ليها حقوق ......... يا معشر الرجال
وفى رسولنا الأسوة .... فى معاملة مالها مثال
مع كل زوجاته ........... حب وحنان دايما
ماتيجوا يالله نشوف .......... ونعدد الأمثال

زوجته لو لها سر ..... فى قلبه يكون مدفون
عمره مايطلع بره ..... يارسول كريم وحنون
شوفوا بقا بعضنا .......... دلوقتى يعمل أيه
سر زوجنه بيطلع .......... ومنه دا بيكون

ومن حقوق الزوجة.......... انك تداعبها
وتحترم أهلها ...... فى حضورها وغيابها
تكرم كمان صاحباتها..... تهادى كمان ليهم
وتسيبها تقعد معاهم....... لو دقوا يوم بابها

ومن حقوق الزوجة..... انك تاخدها معاك
لو السفر هيطول ..... وكان المانع خطاك
وتكون عندك ثقة ........ أكيدة فيها دايما
ولو حد بينكم وقع ... ميلقاش صدى جواك

وكمان ضمن حقوقها .... إطعامها وكسوتها
وأى حاجة تعوزها ......... وكل طلباتها
إلا لو الحال ضاق ...... يلزم شوية صبر
على ماالكريم يفرجها . وتشوف باقى حاجاتها

ولو الزوجة راجعتك .... دا حق بقا ليها
فاكرين سيدنا عمر .... وزوجته قال ليها
انتى بتراجعينى ! .. شوفوا ردها كان أيه
وأقول لكم ع الرد ...... ونصلى قبليها

قالت له اسمع بقا ...... أيوه أنا براجعك
زوجات النبى راجعته ... ونبينا خير منك
طبعا ماقدر يرد ... شوفوا عظمة الإسلام
رفع مكانة الزوجة .. فى كتير بقت زيك

ومن حق زوجتك عليك .. إنك ماتهجرها
فى الفراش ولا ليلة .. وامدح فى مظهرها
الهجر دا تأديب ...... وله حالات محدودة
ع الشرع خليك ماشى ... وإوعى تنهرها

وكمان قبل الفراش ...... اديها وقت كفاية
لجل ليك تتزوق ... تشوف نفسها فى مراية
وانت كمان اتجمل ........ بالوضوء دايما
كمان اتطيب ليها ..... وضاحكها ضحكاية

أصل النساء عندكم .. ( عوان ) بقا يارجال
لهم عليكم حقوق ........... زى نبينا ماقال
وكمان حقوق ليكم ...... تاخدوها بالمعروف
وخلوا بينهم وبينكم .... الحب يكون مرسال

واللى يعامل زوجته ..... بكرم دا يبقا كريم
واللى يعاملها بمهانة ...... أكيد دا يبقا لئيم
ياترى يابو الرجالة ...... تحب صنفك أيه ؟
واسمع صلاتكو جميعا.. على رسولنا الحليم

شوفوا رسولنا الكريم ... ولمحات فى حياته
كان يساعد أهله ......... فى معظم اوقاته
من غير مايطلبوا منه ...... كان يرقع توبه
وبإيده يخصف نعله .... ويحلب كمان شاته

عليك الصلا يا حبيبى .. ياللى مفيش زيك
الشمس ويا القمر ...... نورهم سنا ضيك
بشريعة الإسلام ..... رفعت مكانة الزوجة
ياللى الحنان والرحمة . طول عمرهم زيك

------------------------

هانئ الجمل

[hany57]

- 11 -
شكل للبيع
( 13 - 4 - 2013 )
----------------------

تنتظروا منه الخير ... وكمان بتترجوه
لو كان صحيح فيه خير ... كان يبقا خيره فى ابوه

فاكر ان الفلوس ... تبقا بها حاجة
لو انت كلك فلوس ... برضه ولا حاجة

خيمة ورا نخلتين ... تقولوا عليها دولة
من امتى يا صغيرين ... ليكو وزن جنب العتاولة

الرجالة مش بالفلوس ... بكرة تفوت الأزمة
وجزمة ملآنة فلوس ... تفضل يا ناس جزمة

إكمنه أصلا سفيه ... جاب له مساعد شاذ
النقص ساكن فيه ... وإبليس الأستاذ

جاهل ملوش إنجاز ... وأهبل فى وسط القوم
جى وعامل أستاذ ... على اللى علمه يوم

أتعرى واكسى الولاد ... وعمرى ما أمد إيدى
عبد وله أسياد ... وعايزنى أقول له يا سيدى ؟ !

الحكمة راحت فين ... فقرا وخيرنا كتير
ياللى انتوا مش عارفين ... مكانكم سيبوه للغير

حمارى دايما غشيم ... وما عندهوش أفكار
( دريسه ) يبيعه بمليم ... مبلول يشتريه بدولار

نويت تبيع الفرخة ... والبيضة أكل ولادك
بكرة تبيع الطرحة ... وتكشف ام ولادك

عليز تبيع أرضك ... فاكر يا واد عواد
مبقاشى غير عرضك ... ومدافن الأجداد

ياللى بدعت الصكوك ... أمانة ما تنسى النيل
عايزين نشوف الصكوك ... بكره فى إيد إسرائيل

----------------------------------------

هانئ الجمل

[hany57]

- 12 -
رد الشاعر سعد الشرقاوى ( شاعر التوتة )
على شكل للبيع
وردى على الرد
( 22 - 4 - 2013 )
----------------------------

رد الشاعر سعد الشرقاوى

صاحب الجنيه بتلاقيه فى الدنيا له قيمه
والناس تشوفه تلاغيه ويفكــّروه قيمه
والكلمه تخسر عليه لو كات بدون قيمه
الجهل لمــّا ابتدى حسِبْ الرجال بالقرش
والدنيا حالها كده راح كل شئ بالقرش
والندل وسط الرجال تمنه مايسوى القرش
واللىّ كبيره القرش م الآخر مالوش قيمه
,,,,,,
من اِمته كان الجنيه يحكم ويتحكــِّم
صاحبه بيعمل بيه فى الخلق يتحكـِّم
وياخدُه سيفه على كيفه ويتحكم
والناس تهيبُه وعينها تبُصْ على جيبه
ينسى المروأه وفاكر ع الدّوام جيبه
يقع أخوه فى الخطر مايوطىّ ويجيبه
وان شاف قريبه تلاقيه يسْخر ويتهكــِّم


ابدعتم يا دكتور واصبتم كبد الحقيقة واخترقتم طريق الحقيقة المرة
ياريت بعد ان تتقبل تحياتى وتقديرى
تسمّعنى اغنية
(يا امّه قطر ع الباب)
------------------

ردى على الرد

أخى الغالى
الأستاذ
سعد الشرقاوى
يعلم الله كم أسعدنى ردكم وتواصلكم
فردودكم تقرأ كموضوعات منفصلة
لأنها غنية بما فيها من إبداع
وكم أسعدنى هذا الكم من الحكمة
وكيفية التعبير عنه
أما عن تحياتك وتقديرك أخى الكريم
فهى للعين نور وللرأس تاج
وبناء على رغبة حضرتك
أسمع حضرتك : يامه قطر ع الباب

يامه قطر ع الباب .. جيا تدلعنا
مهيشى ناوية خراب .. عايزة تنفعنا
وتشخلعنا يامه . أمه

هتاخد الآثار .. من مصر بالإيجار
بكام منعرفشى
قالوا بكام مليار .. أصل الإدارة أسرار
واحنا منفهمشى
طب أجروها قوام .. وشوفوا يدفعوا كام
دا تاريخ ملوش معنى .. يامه . أمه

قناتنا مبتصفيش .. عايزين ياعم نعيش
ياخدوها مننا بيع
تلزم قناتنا فى أيه .. بفلوسها أبقا بيه
قبل ما حظى يضيع
امضى بسرعة وقول .. قطر دى بنت أصول
وغيرها يخدعنا .. يامه . أمه

ياللى سافرت هناك .. وكبيرها ماستناك
سيبك دى شكليات
وكمان مفيشى دليل .. قطر لإسرائيل
عميلة دى إشاعات
الكل يا ويكا .. خدام لأمريكا
وخدمتها إبداعنا .. يامه . أمه

------------------

هانئ الجمل

[hany57]

- 13 -
سرقلت أدبية
( 23 - 7 - 2010 )
---------------------------

حلفت ما البس غير توبى
وأمد على قد لحافى
وابقى واضح وكتاب مفتوح
ومفيشي عندى شيئ خافى
من ربى أطلب رزق حلال
وف بدنى أبقى متعافى
وقلمى أحبه يكون رايق
يكتب بكيفه ويتعايق
وحتى لو كان متضايق
ما يسرقشى نظم ولا قوافى

ولو نقلت أنا من غيرى
أذكر إسمه لو عارفه
أو أشير بأن دا مش عملى
بكلام الكل يكون شايفه
وكل شاعر أولى بشعره
مش ييجى غيره يقوم لاهفه
دا منتدانا وأعضاؤه
دول جوه قلبى يتلاقوا
ورمشى فرشه لو شاءوا
وياريت كلامى يصيب هدفه

----------------------------

هانئ الجمل

[hany57]

- 14 -
قومى
( 3 - 2 - 2011 )
----------------
قومى يا أحلى عروسة
قومى نورى فى الكوشة
وادينى حضن وبوسة
الصبر منى يغير

قومى دى ليلة الحنة
يا عروسة جايه م الجنة
وللفرح ها استنى
أنا ببابك غفير

قومى وشوفى مهرك
جابوه ولاد من ضهرك
عاشوا مرارة قهرك
وعزمهم تحرير

قومى يا ام الشباب
خلاص كتبنا الكتاب
وفتحنا ليكى الباب
سوا ها نبدأ سير

قومى يا حلوة وروقى
واتزوقى لنا وفوقى
إسمك دا دم عروقى
وحبى ليكى كبير

قومى وعلى الفرحة
آدى فستانك والطرحة
يا ام العيون الجارحة
والسحر فيها خطير

قومى واسهرى ويايا
يا فرحتى وأسايا
يا سلوتى ومنايا
يا قلب والله كبير

قومى واتبغددى
والحزن دا بددى
وللفساد ارفضى
ألف باء التغيير

قومى وسوقى الدلال
يا رمز كل الجمال
جمعت كل الخصال
الحلوة يا ام الخير

قومى ودقى البيبان
على إبن ليكى شقيان
ورضيعه الحنان
عندك ولادك كتير

قومى احبكى المنديل
على الجبين بيميل
والطرف شايفه كحيل
عايز له ألف سمير

قومى استحمى فى نيلك
ونورى قنديلك
مهما سافرنا نجيلك
ودمع عينا غزير

قومى غنى ع الأرغول
خلى سمرنا يطول
ولا تسمعى لعزول
خليه يموت ويغير

قومى الصباح أهو بان
وشقشق الكروان
والكل بيكى فرحان
يا ام الندى والخير

قومى يا ست البنات
شوفى ولادك فى ثبات
لو عمرى عدا وفات
إبنى معاكى غفير

قومى وشوفى حراسك
وشربينى من كاسك
شوفى حلاوة ناسك
حلاوة ما لها نظير

قومى ردى ع الشامتين
يا عروسة زين الزين
كانوا زمان فاكرين
اللى إحنا فيه ما يصير

قومى يشوفوكى يا ستى
دول فكروكى كبرتى
أو انحنيتى وشبتى
وتعبتى م التفكير

قومى افتحى المندرة
يا حلوة يا صغيرة
يا أحلى م السكرة
وريقك أحلى عصير

قومى بقى يا أميرة
وحلى أحلى ضفيرة
وانسى زمان الحيرة
عريسك أحلى أمير

قومى بقى مين قدك
كل الزهور على خدك
جاية بتطلب ودك
وتشم أحلى عبير

قومى وصحى الزمان
وقولى له والله زمان
وآن خلاص الأوان
وآدى ميدان التحرير

قومى فى المسا أو فجر
وما تخافيش الغدر
فيه ابن فى كل شبر
حراس وفيهم الخير

قومى يا متغندرة
يا أحلى أرض وثرى
إسمك دا فوق فى الذزى
وشمس فى التنوير

قومى يا أغلى الغوالى
يا ساكنة فوق فى العوالى
نورك علينا يلالى
والبسمة عالية تطير

قومى وافتحى الأحضان
يا حضن كله أمان
كل الهنا والحنان
دا شيئ فى حضنك يسير

قومى على فى البنيان
ودلعى الصبيان
واللى رسم ع الحيطان
النيل وشمس وطير

قومى شوفى الهوجة
ومين أفكاره عوجة
جى يركب الموجة
وإيده فيها جنزير

قومى وشوفى الحرية
يا بنت لسه عفية
يا مؤدبة وشقية
وقصتك بتطير

قومى مفيش غيرك
يستاهل هوا نيلك
واللقمة من إيدك
بتبقى أحلى فطير

قومى وحشتينى
وانت ضيا عينى
أرقد تواسينى
وتيقى ليه سمير

قومى ولا يهمك
يا للى ما شيئ همك
بنتك أهى وابنك
والفعل منهم خير

قومى وقومى وقومى
يا غدايا وهدومى
ودوايا مع نومى
وانتى الهوا وعبير

قومى يا جد يا رقة
خلاص بدأنا بدقة
ولسه ع الحلو زقة
وتلبسى التغيير

-----------------------

هانئ الجمل

[hany57]

- 15 -
ليه يا شباب
( 1 - 6 - 2011 )
-----------------------
ليه كل شويه بتتظاهر يا شباب طاهر
عارف كمان قصدك ظاهر والقلب كبير

خايف مطالبك تتغير حاجه تحير
ويقولو دا الوقت قصير ومفيش تغيير

وثورتك ييجى يسرقها مع مبدأها
واحد ما كانشى هنا بدأها وحرامى كبير

الثورة كانت شعبيه كمان سلميه
والكل مشروع لضحيه والوضع خطير

مش هاامنعك تبدى رأيك دا من حقك
ولا هااقول واحد زقك وأجندة غير

فيه حاجات أنا شايفها بس اعرفها
لأجندتك بقى قوم ضيفها عايزة التفكير

عايزك تجدول أهدافك إنت وناسك
وتجعل العلم أساسك وأساس تغيير

وأما جيشك خط أحمر إوعى تفكر
بدون حمايته تتصور الثورة تصير

ولو فيه حد من العسكر باله متحير
فى ذنب قديم له بيفكر خايف تعذير

يعنى زمان كان بيلخبط زقوه يغلط
لا قتل بإيده ولا خطط يخرج ويطير

يخرج بقى فى خروج آمن إدوه ضامن
ما يكونشى ع الثورة خازن ويعطل سير

وبلاش نشكك فى قضانا عمره حمانا
لو يحوى قلة تعبانه الحلو كتير

وفيه عناصر فى الشرطه صنعت ورطه
والباقى مافى عليه غلطه ومفيش تقصير

اللى غلط راح يتحاسب حتى الغايب
أما السليم فعليه واجب مطلب جماهير

ينزل لشغله فى الشارع عمله يتابع
ويبقى للبلطجه رادع ما يكونشى سمير

أما الحكومة شوف عيبها وبرضه راقبها
لو الفساد شفته يصيبها روح التحرير

--------------------

هانئ الجمل