طلبات نوتة أ / عادل صموئيل الجزء الثانى

**جوليانا** · #1 17/12/2013, 19h54

هي المشاركات مش بتتبعت ليه

**جوليانا** · #2 17/12/2013, 19h59

السلام عليكم ورحمه الله وبركاته

استاذى الفاضل والعزيز جدااااا /عادل

اخوتى فالمنتدى

عاملين ايه جميعكم ان شاء الله تكونوا جميعكم بخيررررر

ممكن اطلب طلب صغير الملف الصوتى للمسابقه لهذا العام لاله الاكسيلفون والاكورديون للمرحله الابتدائيه ولكم جزيل الشكرررررررررررررررررر

الاخت العزيزة جوليانا نورتى المنتدى انتى فين من زمان ياشيخة ؟
... موضوع اختفاء كل المرفقات مشكلة تقنية على السيرفر وان شاء الله تتحل
لكن مسموح انك لما نتزنق ننزل على روابط خارجية موقتا

ملحوظة القاهرة الآن الساعة واحدة ونص صباحا انا الحمد لله استطعت بطرقى الخاصة انى اجيب النوت وهى قدامى دلوقتى وحبتدى اكتبهم تانى على انكور فورا بالطبع لما بيكون حاجة مستعجلة مش ممكن انام الا لما اخلصها
وع اطيب تحياتى عادل صموئيل

**عادل صموئيل** · #3 18/12/2013, 01h23

الاخت العزيزة جوليانا وطبعا لكل مدرسى المرحلة الابتدائية

اقدم لكم الملفات الصوتية للأكسليفون والاكورديون
طبعا انا حرصا على اكتر استفادة الاكسليفون عملته ملف الصوتين معا وملف الصوت الاول وملف الصوت الثانى عشان تستوعبوهم
وعلى فكرة النوت فيها غلطات يعنى ناسيين سكتات ومش فاهم ايه حكاية الدييز اللى بين قوسين لنى سمعتها دييز عادية

اليكم الروابط كل واحدة لوحدها

http://www.a7ssass.net/download95399.html

http://www.a7ssass.net/download95400.html

http://www.a7ssass.net/download95401.html

http://www.a7ssass.net/download95402.html

مع اطيب تحياتى

**جوليانا** · #4 18/12/2013, 21h17

أستاذى الفاضل
بشكرك بشده على سرعه تلبيه طلبى وانا اسفه اللى سهرتك بس انا عارفه انك اما بشتغل بتبقى مستمتع عشان كده احنا متعشمين فيك على طول وربنا يخليك لاسرتك الكريمه ولتلاميذك احنا يعنى
وانا فعلا كنت بعيده عن المنتدى لكن كنت بتابع اخباركوا من وقت للتانى لكن مهما ابعد مش بقدر استغنى عن بيت الموسيقى الراقيه سماعى وده بيرجع للساده القائمين عليه
اخيرررررا شكررا

الاخت العزيزة
انا عشان قصدى خير بدون مقابل امبارح سهرت للصبح بس كسبت كذا حاجة
وده درس للناس لما تعمل خير واحد بتكسب كذا حاجة اولا كنت محتاج النوت نفسها ودى كان صعب يعنى لازم اكلم حد من المدرسين اللى كانوا بيشتغلوا معايا هو كان فيه مدرس صاحبى تلميذى يعنى ساكن قريب منى الساعة 12 بالليل قعدت اطلبه على الموبايل ما ردش على اساس انو الصبح يصورهم ويجيبهم لى لحد البيت
او انى الصبح اطلب اى واحدة من المدرسات بس طبعا لازم انزل اروح لها المدرسة اصورهم واخدهم منها ... وعارفين لما ربنا يلهم واحد حاجة كده قالت لى ادخل على جوجل واسألأ عن مسابقة التربية الموسيقية 2013 تتصوروا لقيت منزلين الكتيب كله ونزلت منو النوت وبسرعة طبعتهم كتبتهم على انكور وخلتو يعزفهم وسجلتهم
وربنا الهمنى الاقى موقع رفع زى العسل اسمو احساس وانا احب انكم تسجلوا فيه التسجيل فيه سهل ثوانى يعنى عشان تعرف ترفع اى حاجة تحبها وبيديك 3 ورابط تاخد اللى فى الوسط بس طبعا التنزيل اى حد عادى

مع اطيب تحياتى ونحب نخدم فى حاجة كبيرة

**عاصم المنشاوى** · #5 20/12/2013, 19h07

الأصدقاء

مساء الخير عليكم جميعا....المناقشة كانت جميلة ..وأنا أستفدت كتير...وهو ده الهدف...لأن أحنا مش بس بنتعلم نوتة موسيقية ...لكن بنتعلم ثقافة موسيقية دسمة وغنية ...من خلال حوار راقى كنت متابعه بين الفنانين الأستاذ / فؤاد العلمى والأستاذ / أحمد أرمندو....وغيرهم من الآراء...

الأستاذ الفنان االمايسترو /محمد بك الآلاتى ...بمجرد مايرجع السيرفر لحاله ان شاءالله ...نرجو من سعادتك التكرم بحذف هذه المناقشات ...أحتراما لتصنيفات المنتدى والنظام فى أقسامه ...ولكن الحقيقة ان هنا دفا أكتر من الأقسام التانية وحضرتك عارف البرد اللى طايح فينا الأيام دى....تشكر ياابو الكرم كله....

ماينفعش نمشى من غير مانمسى على مدرسة السهل الممتنع وباعث الطاقة الموسيقية الأيجابية /عادل صمويل...مساء الفل يامدرسة المدارس...

سؤالى النهاردة ...هل الست أم كلثوم ...كانت ضعيفة - أنسانيا - مع بليغ حمدى ؟؟؟....عادى أحنا بشر وممكن نميل لأنسان غير التانى ....هل كانت ضعيفة امامه وهى من هى اللى عرف عنها قوة الشخصية والكاريزما الطاغية ...أشمعنى كل اللى يطلبه كانت بتنفذه فورا وتسايره فى جنونه جرأته وتجديداته ...مثلا ...أول من أدخل الأكورديون كان بليغ"سيرة الحب" ...أول من أدخل الساكسفون"فات الميعاد" ...كان بليغ ...أول مرة تعملها انها تقول كلمات الأغنية قبل الغناء فى تسجيل الأستوديو لأغنية "بعيد عنك"...اول وآخر مرة كورال يغنى لها فى أغنية عاطفية "حكم علينا الهوى " ....ماعملتش الكلام ده مع عبد الوهاب او السنباطى...

**عادل صموئيل** · #6 20/12/2013, 22h04

اخى العزيز عاصم المنشاوى

اولا بالنسبة لموضوع حذف المشاركات دى خسارة لأن انتم بتسألوا اسئلة وانا بجاوب بكلام ممكن يهم ناس كتير هو ممكن الاخ العزيز الألاتى يحطها فى مكانها المناسب بعد ما المنتدى يرجع لحاله
لن انا لما حد من حبايبى والمتعاملين المسمتمرين معايا بيسألنى السؤال بيسألنى السؤال هنا لأن ده المكان اللى انا بدخله كذا مرة فى اليوم لو سألأ السؤال فى مكان تانى ممكن انا ما اشوفو إلا صدفة بعد فترة طويلة وممكن وسط الزحمة ما اشوفوش خالص لذلك انا كمان برد الرد هنا ...
انا دايما لما اى حد بيفتح موضوع فيه رد عندى بيكون سريع ورد بيحتاج انى افكر شوية واحضر كلام مفيد وانا عايز اقول تعقيب مهم على كلامهم وبرضو محتار احط التعقيب هنا ولا فى مكان تانى وممكن هم الاتنين مايشوفوش التعقيب على كلامهم
اما بالنسبة لأم كلثوم وهى فى قمة مجدها لما تتعامل مع بليغ اول مرة فى حب ايه وكل ليلة وكل يوم ثم انساك .. وبليغ ساعتها كان صغير اوى فى السن يعنى نص عمر عبد الوهاب ده دليل انو عبقرى وانها اعجبت بعبقريته .. يعنى الناس دول كان من الصعب حد يقنعهم بنفسه لكن لو اقتنعوا بيشوفوه حايعمل ايه بعد كده ..
الفنانين العمالقة كانوا بيحرصوا انهم يفضلوا على القمة بمعنى يبقوا متمشين مع العصر بس فى اطار الاستايل بتاعهم بحيث ان المستمع بتاعهم يتجدد دايما .. يعنى مثلا مثلا سنة 1948 كان نوعية جمهور ام كلثوم جمهور معين فى سن معين وابتدوا يعجزوا .. الذكاء جذب الشباب لكن بدون فقد الكبار .. واخطر شىء المحافظة على خطها ونكهتها العامة وتبقى عصرية .. الآلات الجديدة ابتدت من عبد الوهاب يعنى ماكنتش مقتنعة بالجيتار لكن عبد الوهاب قال لها نجرب
والبروفات كانت مش اقل من خمسين بروفة قال لها اسمعيه بالعود الاول بعدين نجرب الجيتار وانتى حددى
طبعا لما الجمهور سمع الجيتار اتجنن لأن شىء غير مسبوق مع ام كلثوم .. لكن الجيتار كان تدخله محدود فى حدود الصولو فقط يعنى هى بعد الصولو غنت زى ما بتغنى ... لما نجحت تجربة الجيتار جاء بليغ وحب يعمل حاجة احدث راح مدخل الاكورديون وبرضو ام كلثوم كانت متحفظة وقال لها نجرب وانتى قررى ثم جاء الساكس قال لها نجرب الساكس هى نفسها ماكانتش تعرف ايه الساكس ده يعنى فوجئت بسمير سرور جه بيتها فى البروفة وكان اول واحد ييجى يعنى كان طبعا اول يوم يتعامل مع ام كلثوم لازم ييجى بدرى عن الميعاد بساعة هى فو جئت بيه قاعد ومعاه شنطة وقالت لو مين حضرتك قال لها انا عازف ساكس قالت ايه الساكس ده وكانت مش مقتنعة بيه اساسا لكن بليغ اقنعها اما بالنسبة للكورال ماكنتش اوى مرة يعنى من ايام غنى لى شوية كان الاناشيد كلها فيها كورال وفى حكم علينا الهوى والثلاثية المقدسة كان فيه كورال بس هو مشكلة ام كلثوم انك تحاول تقنعها بطريقة غير مباشرة يعنى ماتجيش تقول لها نروح غرب حاتعند لكن قول لها فيه اربع اتجاهات شمال وجنوب وشرق وغرب وانت تحاول انك تخليها تشوف الغرب احلا حاجة تبقى انت مشيت كلامك وهى مقتنعة انها هى اللى مشت كلامها
المهم واخطر شىء فى الموضوع ان النهاردة بعد خمسين سنة انك تحس ان الخيارات كانت جميلة اوى
يعنى انا كارم محمود مثلا كان صديق شخصى ليا لكن عمل حاجة غلط فى اواخر ايامه اوشكت او كادت ان تضيع تاريحه .. يعنى واحد منتج كاسيت اقنعه انو يعدي غناء كام اغنية بتوزيع جديد ومنهم على شط بحر الهوا وعنابى
وايقاع غربى حديث وعك انا النهاردة لو سمعت واحدة منهم بيحصل لى اشمئزاز والاخطر اقنعوه انو يسجلهم فيدو وطلع لابس باروكة مش حلوة ولابس جاكتة حمرا لونها فج جدا ما يتناسبش مع سنة يعنى افسد شكله ده الفرق بين التطوير والافساد وللعلم كل العمالقة فضلوا عمالقة من حاجتين اولا المحافظة على استايل معين محدد فى كل شكلهم وشغلهم تانى حاجة التطوير يكون فى اضيق الحدود عشام عدم افساد الشكل الاولانى
والتطوير ده مرة حصل مع عبد الحليم يعنى احد اصدقاء السودء قال لو ماتيجى تغير الفرقة وتعمل فرقة زى ديميس روسوس كان مكسر الدنيا فى اوروبا وقتها قال لو عشان تبقى عالمى زيو .. راح عمل فى وصلة فى حفلة كذا اغنية من القدام القصيرين زى اهواك على اتنين اورج واتنين جيتار ودرامز وكانت وصلة تحت الزفت ب حمسين درجة وهو نفسو لما سمع نفسو اشمئز من نفسو وامر بعدم اذاعة القرف اللى حصل ده لأن المطرب العربى لازم يكون تحته كمنجات بتعمل ارضية ودى بتمثل خمسين % من حلاوة صوته والاداء بتاعه لما تشيل الكمنجات دى بيبقى المطرب بيغنى فى الهوا بدون ارضية يعنى مش ماشى على شارع ولكن كأنو بالونة الهوا بيحركها زى ماهو عايز وبعدين الباند الغربى بيعمل ايقاعات غربية رومبا وحيرك وحاجات كده لكن معظم الاغانى محتاجة الوحدة الكبيرة والملفو والمقسوم وكل جملة لو تلاحظ بتحتاج تغيير فى الايقاع لكن الباند بيعمل الاغنية كلها ايقاع واحد
مع اطيب تحياتى