طلبات نوتة أ / عادل صموئيل الجزء الثانى

[Anitta]

انا متشكره جدا و ان شاء الله تطلع حلوة عشان تدوين حضرتك
بالنسبة لأغنية امال ماهر انا مش عارفة حضرتك تقصد انهي واحدة فيهم بس لو مش سهلين و هيتعبوا حضرتك يبقى مش مشكلة و انا همشي نفسي بالأغنية ال معايا و ادور على نوتة لأغنية تانية منكش عملها قبل كدة

عزيزتى انيتا
انت عارفة انا بعتز بيكى اوى يعنى على صغر سنك مجتهدة وشاطرة وبتعزفى اكتر من مدرسين كتير وانتى لسة طالبة .. وبالطبع نفسى اعلمك كل شىء اقدر اعلمو ليكى ( والكلام للجميع وكل من يحب يستفيد من خبرة راجل عجوز غلبان )
انا عارف انتى بتعزفى اورج يعنى بتعزفى لحن واحد واى واحد بيعزف بيعزف لحن واحد هو الميلودى يعنى قبل ماتختار لحن تعزفه دندنه مع نفسك لو قلته يبقى ممكن يتعزف حلو لكن المصيبة فى الاغانى الحديثة ان عشان الجمل الموسيقية بقت اى كلام الى حد كبير مالهاش قيمة بيغطوا ع العيب ده بالتوزيع .. والتوزيع بيحاولوا يبقى زحمة على قد ما يقدروا بيقلدوا الطاووس يبقى افش ريشه لكن هو فيه لحم اد الفرخة
اغنية تتصوروا انا سمعتها خمسين مرة مش فاهم الموسيقى اللى فيها يعنى زحمة اوى اوى مش عارف اصطاد حتى اللحن الاساسى فلو انا كتبت اى حاجة خط لحنى واحد وانتى عزفتيها اللى حايسمعها حيقول دى اغنية تانى بعكس الاغنية بتاعة لو بتحبوا البلد دى مثلا فيها زحمة ايوه بس الميلودى ممكن يتلقط ولازم تاخدى بالك من الموضوع ده
يعنى تسمعيها تقدرى تدندنى مع اللحن ولعلمك ده مهم جدا جدا جدا ليكى انك تشغلى ودنك .. يعنى المتميزة اللى زيك المفروض بعد وقت قليل تعزفى سماعى تطلعى كل اللى نفسك فيه ... لما تسمعوا اغانى زمان مكانش فيه توزيع لأن موسيقانا الشرقية حلاوتها فى الميلودى لذلك تلاقى كل الجمل الموسيقية تجنن وممكن انت تقدر تعزف الاغنية من اولها آخرها على العود مثلا وتطلع تجنن واللى يسمعك مايحسش حاجة ناقصة ... وزمان لما كان واحد بيحب يوزع اغنية اولا بيوزع فى اغنية من كل خمسين اغنية وثانيا بيوزع جملة واحدة فقط بيكون النغمات فيها عريضة وطيلة عشان يبان التوزيع عليها والاهم والاخطر ان التوزيع بيبقى حاجة كده زى الست الحلوة لما تحط اى حاجة اكسسوار يعنى كمالة شياكة وعمر التوزيع ماكان بيأثر على اللحن الاساسى ... يعنى عبد الوهاب مثلا كان بيعتز اوى اوى بالجملة بتاعتو مش معقول يخلى واحد بيوزع يبوظها لو انو يعمل عليها دوشة تغطى عليها ولما تكونى فاضية فى الاجازة حاولى شوفى كل النوت اللى انا كاتبها حتلاقى حاجات كتير حلوة تنعك عشرين سنة .. وبينى وبينك اقول لك على سر بس ماتقوليش لحد هاتى ودنك
انتى لما بتعملى حفلة فى المدرسة اهم ناس فيها مين بيسمعوكى ؟ الناس الكبار يعنى المدير والناظر والمدرسين الكبار واذا جالكم ضيف وكيل وزارة ولا وزير ولا اى حد خلى بالك دول بيسمعوا مين ؟ ام كلثوم عبد الحليم وردة وفايزة والناس دى مابيسمعوش اللى بيغنوا دلوقتى لذلك ركزى على الاغانى القديمة الحلوة اكتر
مع اطيب تحياتى عادل صموئيل