رد: طلبات نوتة أ / عادل صموئيل الجزء الثانى
استاذ عادل
صباح الخير عليك....
كل مابشوفك عاليوتيوب أو فى التليفزيون...ألاقى قعدتك دايما او معظم الوقت جنب ميشيل المصرى ...أو عمر خورشيد...
والسؤال دلوقتى عن (عمر خورشيد)...هذا الجان ...فتى الأحلام ...العازف الوسيم...محطم قلوب العذارى ...من أصغر قرية فيكى يامصر لحد أكبر قصر فيكى يامصر...والمعجبات بيموتوا فيه.انا ركزت معاه شوية فى أغانى أم كلثوم تلاقيه ماشى بالمسطرة...مع عبد الحليم هادى ومبتسم دائما ...مع فايزة بقى ...مش عارف أزاى هى كانت متقبلة ان حد تانى يسرق منها الكاميرا ...محمد سلطان كان بيديله شوية صولوهات ...تجنن وصعبة فى عزفها...ماحدش يقدر يعزفها-متهيألى - غيره ...شوف مثلا فى غريب يازمان / خليكو شاهدين / بالى معاك بالى و صعبان علينا....يتالق ويبدع وكانت شعبيته طاغية ....فى حفلات فايزة تلاقى الجمهور بيطلب منه الأعادة تانى وبيهتف باسمه ...وتلاقى فايزة مبسوطة بده ومش معترضة...أحكى لنا ياعمنا عن ذكرياتك مع عمر خورشيد....صباحك بيضحك
الأستاذ الفنان القدير / فؤاد العلمى ...تحياتى لك
اخى العزيز
انت بتتكلم فى موضوع فى منتهى الخطورة والأهمية
يعنى بعد فترة التلاتينيات اللى كان المطرب فيها هو النجم الاوحد على المسرح يعنى زى ما انا قلت قبل كانت الموسيقى او المقدمة الموسيقية مش موجودة حاجة ثانوية
لكن لما جه عبد الوهاب وعمل النقلة الحضارية فى الموسيقى العربية واللى عملت توجيه لكل الملحنين والألحان بعده ,, ظهر موضوعالصولو استغلالا لمهارة عدد من العازفين العظام واللى عمرهم ما اتكرروا من بعد
الفنان الحمار بيحب انه هو يبقى النجم الاوحد على المسرح ودى خطورتها ان ممكن يطلع فنان تانى يمسحه .. لكن الفنان اللى بيفهم بيحاول يقدم احلى حاجة
يعنى ام كلثوم مثلا كانت بتتباهى بمحمد عبده صالح والحفناوى ثم عمرخورشيد وبالطبع لما يكون صولول حلو الناس بتحب انه يعيده مرات وكانت هى بتتبسط يعنى بتحس انها هى والفرقة عمل مكتامل هى حلوة وفرقتها حلوة زى ما انت تعمل فرح وتعزم شوية ناس اكابر بتتباهى بيهم قدام المعازيم ,, وبالطبع عبد الحليم وفايزة ووردة ساروا على نفس المنهج .. المشكلة ان الخطيرة ان عمر خورشيد كان عازف ماحصلش ( طبعا لنى حافظ كل عازفين الاورج والجيتار اللى فى السوق ) كان اولا تكنيك من اعلى مايخطر على البال وده بيديك اصعب صولو ممكن يلخفن اى عازف بيقولوا وهو مغمض وده اكتر واحد استفاد منه محمد سلطان يعنى كان بيعمل صولوهات خارقة
كانت بتعمل لنا مشاكل بعد وفاة عمر خورشيد يعنى فايزة مثلا كانت ماتقدرش تغنى غريب يازمن لن فى موسيقى الكوبليه الاول صولو جيتار صعب جدا وصعوبته انو ملخفن يعنى اى عازف مهما كان اكيد اكيد حايقع فيه .. كمان من ممزيات عمر خورشيد انو احلى واحد فى العالم العربى يديك اكورات ع الموسيقى وللعلم الاكورات دى بتبقى مش مكتوبة او بالخص بتبقى حاجات مقعدة فى علم الجيتار مايعرفهاش غير المخضرمين فى اكورات الجيتار يعنى الملحن نفسو مايعرفهاش لكن بيسيبه يقول اللى على ذوقة وكان عالى عالى جدا جدا .. يعنى لو تسمع الادليب بتاع هذه ليلتى تسمع الجيتار بيعمل حاجات تحت الغنا تطير العقل وانا بعزف هذه ليلتى مع نفسى بحس انى ضئيل اوى لأن الاكورات دى بتديك 90% من النكهة .. وفى اول مقدمة هذه ليلتى عمل صولو ايقاع فوق مستوى الهبل وبرضه عمر هو اللى صممه لنو زى ماقلت صولو من اختصاص الخبراء فى الجيتار .. واى صولو لعمر خورشيد بالذات تحس ان 70% من الصولو من تصميم عمرخورشيد وجدير بالذكر حاجتين كان عبد الوهاب بيدى انور منسى نفس الخاصية والحاجة التانية ان عبد الوهاب والسنباطى اان بيعمل الجملة ومحظور انك انت تلعب فيها لكن سمح بالموضوع ده لتنين فقط هم عمر خورشيد وانور منسى ... من اهم مميزات عمر خورشيد كمان انو كان ناعم ومش بيعزف بصوت عالى يعنى لأنو اول جهاز كهربائى دخل على الفرقة الشرقية دخل دخلة حلوة يعنى اضاف للموسيقى بعكس بتوع الاورج بيعلى صوته ويدخل زى البلدوزر بيحس انو وحده على المسرح وده بالطبع فى الفرق اللى زى الماسية يدمر الموسيقى يعنى بيقطع الصلة بين نص الفرقة اللى ع اليمين اللى هو كمنجات ونص الفرقة اللى ع الشمال وهو الايقاعات يعنى لو الاورج او الجيتار زعق ممكن يحصل كونتر مدرمى لأنى مش سامع الايقاع كويس ....
اما اهم واخطر شىء اداه العازفين العظام دول للبشرية مش الصولو الحلو اللى انت بتسمعه ... ولكن كام مليون واحد حب الآلة الموسيقية دى بالذات وانا واحد منهم وانا طفل كنت بشوف الحفناوى بيقول صولو حلو والناس بتصفق له وام كلثوم تخليه يعيد تانى اقصد نجومية العازف بتخلى الاطفال تطلع تحب الآلة غير لما تكون الآلة فى الظل ماحدش واخد بالو منها يعنى مثلا الكونترباص .. انت لو تعرف ميزة الكونترباص وشغله تتجنن لكن الناس تعرف الكمنجة اكتر لأن الكونترباص جندى مجهول بيعمل فى صمت لكن الكمنجة هى النجم الظاهر
مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 27/10/2013 الساعة 18h58
|
العرض المتطور
