طلبات نوتة أ / عادل صموئيل الجزء الثانى

[إيمان.]

الأستاذ عادل الحمد لله على عودتك للمنتدى, وعذرا لقلة مشاركاتي بسبب الظروف الصعبة التي نمر بها..
لقد فاجأتني بهذه الهدية الجميلة وأهنئك استاذ عادل على الذاكرة التي تمتلكها ,بالفعل انا احب البيانو جدا ومهتمة بالنوت الغربية الكلاسيكية وأتمنى ان اجد نوت عربية كتبت للبيانو بطريقة احترافية ولكن كما تعرف لايوجد ..المهم اجدد شكري وعرفاني لك ..
وأيضا لاانسى أن اهنئ الاستاذ والأخ الفاضل نور الصباح بزواج ابنته وانشاء الله يكون زواجا ميمونا فيه الخير والسعادة ..تحياتي لكل الأعضاء

الاخت العزيزة ايمان
هى العملية انتى حظك حلو ... يعنى فيه قصة انا فوق قلت نصها ... انى نزلت اصدار جديدمن انكور احدث حاجة عشان الطابعة الجديدة حديثة عن الطابعة االلى عندى من قبل وانكور اللى بشتغل بيه طلع اصدار اقدم من الطابعة الجديدة
وبالطبع قعدت اقلب فى البرنامج واستكشفو لقيته معقد جدا وفيه مشاكل فنية خطيرة ( هو اسمو انكور 5.2 ) وانا انصح انكم ماتستعملوهوش يعنى احلى اصدار بعد انكور 4.5 اللى كان جميل وطيب وغلبان وبشتغل بيه من خمس سنين او اكتر
لقيت عندى اصدار احدث منو اسمو انكور 4.55 وده انصح بإستعماله لو انت اشتريت طابعة حديثة او اشتريت كمبيوتر حديث يعنى الماذر بود حديثة .. لنى من سنتين اشتريت كمبيوتر احدث حاجة فى السوق عندنا والانكور 4.5 ما رضى يشتغل عليه وطبعا جننى فضلت اشيل نسخ ويتدوز واحط نسخ ويندوز لحد ما لقيت واحدة تشتغل الحمد لله
( وانتم عارفين انى مجنون شوية وعندى شعرة ساعة تروح وساعة تيجى ) نسخة الويندوز اللى اشتغلت دى نزلت اشتريت منها كذا نسخة لحسن واحدة تتخدش ولا يجرى لها حاجة يبقى عندى غيرها جاهزة
المهم اكتشفت حاجة مهمة خطيرة واحب اعلمها لكم ( درس ببلاش ) لما يكون عندك برنامج انت مهتم بيه
زى ما انا كنت بستكشف فى الانكور الجديد ده ماحدش منكم طبعا فكر انو يدخل على ال program fieles الملف اللى فيه البرامج اللى انت مسطبها على جهازك يعنى كل برنامج بتنزل ملفاته بإسمه فى المكان ده
المشكلة ان ماحدش بينظر فى الملف ده يعنى البرنامج نزل خلاص
انا صدفة فتحت الملف ده لقيت بلاوى هم حا طينها كده فى الخباثة منهم ملف مقطوعات باخ انا مجدالينا ده وكذا ملفات فيه حاجات كتير جدا لباخ منهم حاجات صعبة جداجدا بس بيموتوا فيها المتخصصين بتوع البيانو زى الفيوج والبريليود وكونشرتوهات حاجات كتير بس صعبة اوى
من حسن حظ الاخت العزيزة ايمان انا عارف انها بتحب مقطوعات البيانو ( من كلامها معانا ومن ردودها بالذات على مشاركات الاخ العزيز احمد الجوادى .. لن فيه مشكلة من الخراب والتخلف والتصحر الثقافى اللى ابتدا يغزو معظم بلادنا العربية مستوردين الكتب الموسيقية بطلوا يستوردوا الكتب دى .. لأن الاذواق لما انحطت ماحدش صار يشتريها
ف مش معقول حد يشترى كتوب بألوف الدولارات وتقعد عندو ماحدش يشتريها
وتحسرت يا ايمان على ايام زمان لما كنت صغي وآخرها لما كنت طالب فى السنوات الاولى فى كلية التربية الموسيقية
كان فيه محل اسمو بابازيان فى شارع عدلى ( كان قدام المعارة اللى ساكن فيها صديقى المرحوم منير مراد ) وقبل العمارة اللى فيها مقر الفرقة الماسية بكام عمارة
لو كنتى شفتى المحل ده فى الوقت ده كنتى اتجننتى .. كان فيه كميى كتب للبيانو يعنى ممكن تشترى مش عشر ولا عشرين كتاب .. لو تقدرى تشيلى طن كتب كان موجود .. ولكل الموسيقيين يعنى باخ وبيتهوفن وتشايكوفسكى ومندلسون وموتزارت وكلهم كلهم .. وايه كمان بالاوبس opus يعنى لو عايزة اى اصدار لأى موسيقى تلاقيه كمان
النهاردة المحل ده بعد ما الفن مات مع الاسف بيبع لعب اطفال
مع اطيب تحياتى