طلبات نوتة أ / عادل صموئيل الجزء الثانى

[dorame]

المشاركة الأصلية كتبت بواسطة عادل صموئيل

اخى العزيز
السؤال ده عويص جداوينفع اجابته تبقى ضمن موضوع رسالة دكتوراه , وانا كنت طول وقتى ( او طبيعتى ادرس واتامل فيما حولى ) يعنى ممكن واحد كان موجود زميلى لكن كان بيعزف ويقبض ويمشى من غير مايحلل المواقف والشخصيات ف ما يقوبش اللى حقوله
اولا بالنسبة لبليغ حمدى يعنى ام كلثوم كانت بتمثل له 20% من انتاجه الفنى فكانت الخسارة كبيرة .. وبعد وفاة ام كلثوم عوض الاغانى الطويلة مع عبد الحليم ووردة
لكن الكارثة الكبرى كانت لرياض السنباطى , لن ام كلثوم بالنسبة له كانت المطربة اللى بتنفذ 80% من انتاجه الفنى الصعب جدا على غيرها .. ولولا ام كلثوم ماكان السنباطى وصل الى هذا الحجم الدولى او كان بقى زى محمود الشريف يعنى عبقرى لكن شهرته محدودة .. والموضوع ان ام كلثوم كانت تنظيم او مؤسسة يعنى ام كلثوم وفرقتها ونظام الشغل .. كانت فرقة ام كلثوم بتعزف من غير نوتة ( مع ان نفس العازفين بيشتغلوا فى الفرقة الماسية واللى هم احسن ناس مجتمعين بيقروا نوتة فى العالم العربى ) لكن كان نظام ان الملحن بيعمل بروفات شهر ونصف على اللحن وبيحفظ الفرقة على العود مميزاته ان العازف بيحفظ كل همسة او نفس فى اللحن وده اللى بيديك السلطنة الغير عادية فى اغانى ام كلثوم بالذات .. يعنى من وجهة نظرى انا سعاد محمد هى رقم 2 بعد ام كلثوم ولكن الفرقة ( او الفرق ) اللى بتغنى عليها كانت بتعزف بنوتة .. وهنا رياض السنباطى لما يعمل لحن لازم يبقى محدود ( او متكتف بالمصرى ) يعنى لازم يعمل جمل تتكب نوتة 100% لأن هذه الفرقة كبيرها اسبوع بروفات والتحفيظ مش حاينفع , يعندى عندك مثلا لحن زى اراك عصى الدمع ده عشان يتعزف كما ينبغى لازم يتحفظ .. كمان كانت سعاد محمد لما بتغنى ام كلثوم ( بعد وفاة ام كلثوم طبعا ) كانت بتبقى حلوة ليه ؟ عشان هى والفرقة حافظين اللحن صم من ام كلثوم .. لكن لو لحن من دول كان جديد مش ممكن حايطلع بالجودة دى .. واقول لكم على سر .. ان كذا مشروع اغنية كان بيشتغل فيهم السنباطى المفروض لأم كلثوم ولكن مع وفاة ام كلثوم اضطر يسعملهم اسهل شوية عشان مشكلة النوتة ... واحكى لكم قصة صغيرة انا حضرتها فى الفرقة الماسية فاكرين اغنية نبتدى منين الحكاية .. فيها كوبليه طويل بيبتدى بأدليب بيقول : وف لخظة وقفنا وابتدا خوفنا .. الادليب ده 3 اسطر وباقى الكوبليه اللى على ايقاع .. احنا اخدنا 3 ايام نعمل ال 3 اسطر الادليب ونص ساعة خلصنا الاربع صفحات بتاعة باقى الكوبليه واللى على ايقاع .. والسبب ان الملحن والمطرب فى الأدليب بيحفظونا الروح والاداء والسكتات والنفس بين جزء وجزء .. اما اللى على ايقاع هو متكوب كويس اوى طبعا ومحدد وعبد الحليم حافظ ( حافظ ) وعازف الايقاع حسن انور فاهم حايعمل ايه وفين ومفيش مشكلة لكن المشكلة الكبرى فى تظبيط الادليب , ولما نرجع للسنباطى كما قلت قبلا انه كان كل اغنية بيلحنها لحد غير ام كلثوم لازم بيستأجر فرقة ويغنيها تانى بصوته عشان يحس انه فيه توثيق على مزاجه هو للحن ... زمان ايام ام كلثوم كان عبد الوهاب بيقبض فى اللحن 1500 جنيه .. كان السنباطى هو الوحيد اللى بيقبض منها 2000 جنيه وللعلم ده وقتها كان مبلغ فادح .. واقول لكم على سرتانى ... ايام بروفات عبد الحليم كنا بنعل اكتر من 40 بروفة .. الساعة 6 مساء كل يوم .. كان وقتها احمد فؤاد حسن بيوقف كل الشغل التانى فيما عدا لو حفلة لودرة او فايزة ويكون الحان قديمة محفوظة يعنى نروح الحفلة على طول من غير بروفات .. لكن كل التسجيلات تقف .. كان من مميزات او انظمة ام كلثوم انها بتعمل ال 50 بروفة الساعة العاشرة صباحاً .. بحيث انها ما تتعارضش مع شغل العازف التانى .. فيه حاجة كمان مهمة جداً .. النهاردة الناس اللى بتغنى كلها لما تسمع تلاقى فى كل جملة كام حرف اما نشاز او المطرب مساحته الصوتية قليلة اوى .. وجود ام كلثوم على القمة .. كان بيحدد اللى فى القاع يعنى وقتها هات لى مطرب كان اى حاجة مش حتلاقى والسبب وجود العمالقة .. ولو تلاحظ ان بعد رحيل العمالقة البالوعات اتفتحت والصراصير طلعت .. من اخطر واهم الظروف وقتها ان المناخ العام راقى جدا .. يعنى الجمهور كان متذوق ( آخر حاجة ) كان بيلفظ اى مطرب ردىء وبالعكس كنت تلاقى اغنية ام كلثوم واللى كانت بتبفى موضة السنة كل الشعب بيدندنها من اكبر المثفين لأقل درجة ثقافة فى المجتمع وهى الزبالين والعربجية .. النهاردة ذوق العربجية فرض نفسه على بتوع الجامعة ... يعنى طبعا مهزلة
رحم الله ام كلثوم والسنباطى وبليغ وكل من امتعونا
مع اطيب تحياتى عادل صموئيل

استاذنا الغالي الاستاذ الدكتور عادل صموئيل

لماذا لا تولف كتاب ذكرياتي مع العمالقة مثلا وتتحفنا وتتحف الناس الذواقة باسرار وقصص لم تذكر من قبل فهذا مشروع يستفيد منه كل من يحب هولاء العمالقة ولم يحالفة الحظ بسماعهم مباشرة او باللقاء بهم
ثانيا رائع منك ان ذكرت اولا الحالة الاقتصادية لبليغ والسنباطي بعد وفاة ام كلثوم وهذة معلومة جديدة جدا ورائعة وخلال قرائتي لبعض الكتب سمعت ان السنباطي كان مادي شوية حتى انه رفع سعر اللحن الى 4000 جنية وهي رفضت وبدات تتجة للملحنين الجدد مثل بليغ وغيرة لمدة سنتين وبدا عبدالوهاب بتدريبها على لحن انت عمري وبدات الصحف بكتابة عناوين ذهب العهد السنباطي وبدا العهد الوهابي وبعد سنتين رجعت عاوزة منه يلحن الاطلال لان القصيده لا يمكن تلحينها الا من السنباطي وكانها مفصلة علية فتوسط احد الشعراء وحصل اللي حصل ورجع الاعلام يقول لا عهد بعد عهد السنباطي

في السر الاول اللي قولته " واقول لكم على سر .. ان كذا مشروع اغنية كان بيشتغل فيهم السنباطى المفروض لأم كلثوم ولكن مع وفاة ام كلثوم اضطر يسعملهم اسهل شوية عشان مشكلة النوتة ... " هل تذكر من هذة الالحان شئ مثلا سيد مكاوي كان بيلحن اوقاتي بتحلو لكن بعد ان ماتت ام كلثوم جبها لوردة لكن السنباطي لا نعلم اي لحن كان بيلحن لها وجابه لحد تاني الا ان قصيدة من اجل عينيك كان اخر لحن لها.

لقد ذكرت ايظا المساحة الصوتية وعلى هذا الاساس احب اسالك في رايك من الملحنيين العمالقة استغل معظم طبقات المساحات الصوتية لام كلثوم بالنسبة لي اعتقد السنباطي ولست متاكد فيهمني رايك كثيرا لانه لا نقاش بعد راي حضرتك وهل تعتقد انهم فعلا استغلوا طبقاتها الصوتية كاملة ام مازالت قداراتها الصوتية كانت اكبر

في الاخير جبت انت جملة تكتب بماء من ذهب واروع وصف سمعتة في حياتي للفن الجديد الهابط اللي يهز الوسط ولا يهز المشاعر وهو " ولو تلاحظ ان بعد رحيل العمالقة البالوعات اتفتحت والصراصير طلعت " ازاي جبت الجملة هذة مش عارف لكن وصف دقيق رائع رائع واكثر من رائع

وفي رايك مين من المطربين او المحنيين الموجودين حاليا بيعجك وهل في امكانية حد يطور من صوته ويخلية حلو او الى حد ما مقبول
اخى العزيز
كلامك بيسعدنى لأنك متفهمما اقول
اخطر مشكلة اليوم مش فى المطربين ولكن فى ذوق المستمعين الذى انحط لدرجة عالية جدا
يعنى مثلا فى الطعام لو فيه محلين واحد بيقدم اكل نظيف ومتقن وجميل وبجواره محل بيقدم اكل ردىء وفاسد تلاقى الجمهور بيقبل على الردىء ... او مش بيميز الفرق بينهم والشىء ده خلا الكل بيقدم طعام ردىء .. يعنى حتى لما تنزل اى دولة عربية وتجرب الاكل القومى بتاعها تلاقيه مش حلو زى زمان
نفس المشكلة فى الغناء يعنى بإستثناء القلة الباقية من زمان زى هانى شاكر ... الكل لازم تولع فيه لأنه بيفتقد اى الف باء الغناء وهو الاذن الموسيقية ال 100% , يعنى عبد الوهاب مرة قال كلمة : لو اتفق حماران لأطربا
يعنى اسوأ صوت هو صوت الحمار لكن لو حماران نهقا من نفس التون لأطربا
واللى بغنوا دلوقتى ماحصلوش الحمير
انت قلت عن الطبقة الصوتية لأم كلثوم .. مهما قدمت كان عندنا اكتر يعنى زى سيارة سرعتها 250 كم/ساعة
وبتجرى بسرعة 120كم /ساعة كده بتكون فى كامل طاقتها ولسه فيه اكتر كتير
من امثلة الاغانى التى كانت لم كلثوم ولكن القدر لم يسعف السنباطى اغنية يا حبيبى لاتقل ضاع حبى من يدى
واغنية بردة البوصيرى : كيف ترقى رقيك الانبياء ياسماء ماطولتها سماء
وانا شخصيا عزفت مع ياسمين الخيام هذه الاغنية وجت فى مقطع فيه تطويل مسافة روند وياسمين نسيت نفسها وحبت تعمل زى ام كلثوم وطولت اكتر وخرجت خارج الوحدة لن ام كلثوم كانت لما بتطول وبتمد لحد الدوم مش تطول وخلاص بمعنى لو نغمة روند وتقفل على الدوم لازم لما تطول قول كمان روند او اتنين ولكن لازم تقفل على الدوم .. ام كلثوم كانت بتحسبها وكان عازف الرق يعنى بتنظر اليه بطرف عينها ( ودى اهم حاجة ) وبيقفولوها مع بعض ... وكان زمان عندها عازف رائع اسمو ابراهيم عفيفى كان حتى لو طولت وكانت حاتقع كان العبقرى ابراهيم عفيفى بيعمل اتنين دوم كان بيعدل الايقاع لكن ياسمين الخيام ماتعرفش الكلام ده ولما وقعت طبعا السنباطى اتجنن
بعدها بشهركنا فى بروفة وقال لى بكره عندكم ايه بالليل قلت له عندنا حفلة لياسمين الخيام قال لى والله العظيم : هى لسه بتغنى ؟؟؟؟؟ يعنى ياسمين الخيام دى على الاقل بتغنى احسن من اليسا وكل الطابور ده لكن السنباطى لم يكون يعترف بيها كمطربة لأن المقاييس عنده كانت صعبة جدا ... واذا كانت عجبتك كلمة الصراصير
احنا كنا فى مناخ الملحنين كلهم دمهم خفيف يعنى بيطلع منهم حاجات تجنن وعفوية واكيد اللى اتربى فى هذا المناخ اكيد يطتعلم منهم
اقول لكن حاجة تضحك : مرة كنا فى بروفة لأغنية دينية لسعاد محمد وكان فيه صولو السنباطى قال نعمله اكورديون ... ساعتها كان عمر ما اى ملحن عمل صولو اكورديون فى اغنية دينية فى التاريخ
فقال عازف متخلف الاكورديون حرام يا استاذ .. فرد عليه السنباطى بعفوية : ليه يا ابنى هو بيعزف مورتاديلا ؟؟
والمعروف ان المورتاديلا لحم محفوظ مصنوع من لحم الخنزير
ونكمل بعدين مع اطيب تحياتى عادل صموئيل