احبائى
اقدم لكم من تراث عبد الوهاب الخالد
يا وابور قول لى
الاغنية دى لعلمكم صغيرة جدا بس صعبة جدا جدا ... وانا لسه نا استريحتش من مشقة تدوين مصر تتحدث عن نفسها وربنا يسامحك ياعم نور الصباح
صعوبة الاغنية دى تكمن فى حاجة عبد الوهاب العبقرى مش بيعملها كتير .. ولكن تخلى 99% من المدونين يخافوا يقربوا جنبها ( والكلام موجه للمدونين بالذات ) اللى بيدون الاول بيسمع اللحن وهو بيسمع بيحس المقام والحاجات اللى ممكن تحصل فى السكة , واخطر حاجة انك لو شفته تلاقى ايده بتعمل اشارات الموازين طول ما بيسمع .. يعنى بيحس الميزان والسرعة ... وتغير الميزان فين ... ولو فيه ادليب بيبقى ازاى والتفاصيل دى ...
اول شىء فى اللحن ده يخلى المدون يتخض ويقول اشتاتاً اشتوت وحابس حابس وربنا يجعل كلامنا خفيف عليهم
ان الوحدة بتكسر كتير كذا مرة فى وسط الميزان .. ودى بتخلى المدون بيهرب من اللحن ... لأن اللحن معزوف سماعى والفرقة حافظين وعاملين مع عبد الوهاب بروفات كتير .. يعنى اللى بيقوله بيعملوه ... اما هنا لازم انى ادون اللحن مضبوط من الناحية الصولفائية .. واخطر شىء ان التظبيط ده ما يعملش إطالة او تقصير فى حاجة لما انت تسمعها تحسها غلط على اساس انك حافظ التسجيل الاصلى ... حتى الاخ نور الصباح لما نزل لى تسجيل تانى مضاف اليه موسيقى تلاحظوا ان فيه كذا رقعة موسيقية افسدت اللحن لذلك دورت على القديم تانى وكتبت منه عشان ماتروحش منى روح عبد الوهاب ( ودى اهم حاجة طبعا )
كمان تلاقى بيبطأ فجأة بدون مقدمات وبيسرع فجأة ... والادليب بيقتحم عليك فجأة وبيخرج منه بدون مقدمات ..
بإختصار لحن شرير يعنى ....
وكالعادة انا كواحد مذاكر مخ عبد الوهاب .. اكيد فكرت ممكن كان ايه فى مخه وهو بيعمل اللحن بالطريقة دى يعنى مليان حفر وكان سهل جدا انه يظبطه ... اكتشفت حاجة ... ان فى الفيلم هو بيغنى وراكب قطار من بتوع زمان قبل العربات المكيفة المقفولة بتاعة دلوقتى واللى انت وانت راكبها مش بتسمع صوت عجلات القطار على القضبان
كان قطارات زمان الشبابيك مش مغلقة زى الطائرات دلوقتى كانت زجاج وشيش بيتفتح ويتقفل ... وبيجيب لك كل الصوت اللى فى الخارج ... القضبان بتاعة القطارات بينها فواصل ( عشان التمدد ) والعجلة اليمين بتدوس على فاصل مش قدام العجلة الشمال بمعنى فردة القضيب اليمين الفاصل فيها مش قدام الفردة الشمال والحركة دى بيتخلى طوت عجلة منهم بيتأخر عن التانية ... الحركة دى بتعمل كونتر فى الإيقاع ... لما تسمع ايقاع عجلات القطار تلاقى الايقاع بينتظم شوية بعدين ممكن تيجى منطقة تداخل قضيان بتعمل حاجة زى البريك Break بيتغير الايقاع
كمان القطار بيبطىء ويسرع يعنى كل الكلام ده عبد الوهاب احسه ووضعه فى اللحن
وعشان زى ماقلت من قبل عبد الوهاب لازم يعمل كل مرة حاجة مختلفة
أسف للإطالة واترككم مع النوتة
مع اطيب تحياتى
رد: طلبات نوتة أ / عادل صموئيل الجزء الثانى
العرض الشجري