احبائى
اشكركم فؤدا فردا على شعوركم
انا راجل بتاع شغل يعنى بحب اشتغل اكتر مما اتكلم
اقدم لكم
عسل وسكر
للفنانة شهرزاد
اللحن ده لما تشوف النوتة تلاقيه فى منتهى السهولة بس انا لما بكتب نوتة بحب اعطى درسين اول درس النوتة وتانى درس اى معلومة تتعلق بالنوتة او باللحن ده
اللحن ده فيه خاصية مهمة وهى تقديم لحن سهل جدا لمطرب قدير عشان يطلع فيه كل امكانياته واحاسيسه
يعنى لما تسمع شهرزاد تتعلم امتى تعمل عربة وامتى تجود ... ومع الاسف مطربين اليومين دول بينقسموا الى قسمين المطربين الضعاف اللى تلاقى فى كل جملة خمس حروف نشاز والمطربين الشاطرين لكن مع الاسف بيتفزلكوا اكتر من الازم يعنى تلاقى المطرب فى اغنية لعبد الوهاب يعمل 85 عربة فى كل جملة والمشكلة لو كانت تبقى حلوة كده كان عبد الوهاب عملها اصلا كده
فى ملحوظة مهمة الفنان لازم يتميز بالأدب والذوق فى الكلام يعنى انا من يوم ما عرفتونى عمرى ما عملت ذم فى حد ولا كتبت حاجة وحشة عن حد ... وعمرى ما نفخت فى حد اكبر من قدره ... يعنى لو تلاحظوا فى المسلسلات الفاشلة عن حياة الفنانين تلاقى حايبين سيرة فنان او عازف ومطلعينه خمورجى او بيلعب قمار مع ان فيه ملاييين الناس بتعشق الفنان ده ومايهمهاش حياته الشخصية كل اللى يهمها فنه
انا متهمنيش لما حد يشتمنى شخصيا لكن اكتر حاجة تضايقنى لما حد يقول ان النوت اللى بكتبها كلها غلط
يعنى انا اقبل من اى واحد انه يقول لى فى النوتة الفلانية فيه غلطة فنية فى المكان الفلانى بس ينزل النوتة عشان اشوفها بسرعة لكن عملية ان كل نوتى غلط يعنى الآلاف اللى شافوا النوت بتاعتى وبيستعملوها بيعزفوا حاجات غلط وهم مش فاهمين ؟؟؟ والعشرات اللى ورونى نوت قديمة فيها غلطات فنية فادحة ومكتوبة بطريقة صعبة وطلبوا منى ادونها تانى لهم بإسلوبى من اول وجديد دول كمان مايفهموش وواحد فقط هو اللى بيفهم
وبعدين لعلمكم انا سنى 62 سنة وعمرى ماتعاليت على حد بخبرتى لأن اهم سمة من سماتى التواضع ومازلت بتعلم لحد دلوقتى كل يوم تفتكروا مشاكل الادليب .. انا من اهم الحاجات اللى بفكر فيها الناس اللى حاتروح لهم النوت دى ازاى تكون بقدر الامكان مبسطة واحاول اخليها سهلة ... موضوع الادليب طول عمرنا انه لما بيتكتب عادة بيبقى تقريبى ... يعنى المطرب بيبقى حافظ وهو بيسحب الفرقة وراه والعازفين بيبقى قدامهم النوتة لكن 80% من اذنهم مع المطرب .. يعنى مافيش مشكلة من اى نوع حتى لو الادليب مكتوب مش 100% دقيق
لكن هنا انا براعى ان اللى حايقرأ النوتة مفيش معاه مطرب يشده لذلك كانت مشكلتى ادون الادليب بقدر المكان مضبوط ... وزى ماقلت انا لحد دلوقتى مازلت اتعلم ... وبتعلم من اللى اكبر واصغر منى وبسمع كل واحد ... لاحظ طريقة اكتشفها الاخ العزيز وسام اكرم ... ودرستها لقيتها احسن من الطريقة اللى بكتب بيها الادليب لأنها على ميزان كبير لكن مخفى يعنى بيعمل الميزان 11 على 2 وتكتب زى ما انت عايز وتشيل الباقى ... الطريقة دى مع انها بتاخد وقت اطول كتير جدا فى الكتابة لكن اهم مافيها انى بسمع اللى بكتبه بمنتهى الدقة ... ولما بسمع بطول نغمة اقصر نغمة احط سكتة لحد المازورة مايبقاش فيها الهوا ... ووصلت لدرجة ماتقلش عن 85% وبتوصل احيانا ل 100% وده فى حد ذاته اعجاز ... وبرضولو حدشايف انى بدون النوتة غلط يورينا تتدون ازاى
مع اطيب تحياتى
رد: طلبات نوتة أ / عادل صموئيل الجزء الثانى
العرض الشجري