كلنا نحب القمر - محمد عبد الوهاب

**guest** · #1 02/10/2012, 00h05

يا استاذ محمد

انا فعلا منتظر التحليل

حضرتك قلت ان مقام الاعنية من الكورديللي

ازاي ؟
الكورديللي او الحجاز كاركرد
جنس كرد علي الدو
و جنس بوسليك علي الفا

المقام كورديللي طالع نازل

دو - ري بيمول - مي بيمول -فا - صول - لابيمول - سي بيمول - دو

حتي الحجاز كار العادي حجاز علي الدو راست , و حجاز علي الصول نوا و انت طالع
و انت نازل كورد علي الصول و بوسليك علي الدو

المهم بقي ان مفيش اي احساس عندي بالحجاز في الموضوع بأكمله !

عبد الوهاب ابتدا المقدمة من السي بيكار , فين بقي الكورديللي ؟ فين الدو ؟
و الكورد الاصلي .. جنس كورد علي الري و الجنس التاني نهاوند علي الصول ( يعني السي مخفوضة نص )
و برضه مفيش السي !
انا كتبت نوتة للمقدمة من التسجيل حرفيا عشان اتأكد و هارفقها ل حضرتك
عبد الوهاب ابتدا الغناء من نغمة السي برضه و لما قفل ( والنظر راح يرضى ميـن ) قفل علي السي برضه
حتي اللازمة الموسيقية .. يروح و ييجي و يقفل علي السي لو بنحكم عليها من القفلة

ارجوك التوضيح عشان فعلا كدة فيه لخبطة

تحياتي ل حضرتك
و انا مستني

**الألآتى** · #2 02/10/2012, 01h15

التحليل جاهز .. ولكنى سأرد على أخونا إيهاب أولاً .. بعد إذنكم

أولاً ياعم إيهاب .. إنت إللى لخبطت نفسك .. الراجل بيغنى من الدو فعلاً .. لكن التسجيل مزقزق شوية لورا نصف تون

ودى حاجه بتحصل دايماً عند سماعنا للتسجيلات القديمة .. لأنهم بيسجلوها من شرائط أو إسطواات

وكانت الإسطوانة أوالشريط بطئ شوية .. يدينا تون أو أقل مخفوض .. ولو الإسطوانة سريعة شوية تدينا تون أو أقل مرتفع

عل الله تكون المعلومة وصلت

حضرتك بقى ترفع التون عندك نص تون .. علشان تعزف من الدو

أما بخصوص أجناس الكورديللى .. فالموضوع فيه شوية لخبطة .. لمؤاخذه

حجاز كار إيه إللى فيه بوسليك على الدو ( وإنت نازل )

وكورديللى إيه إللى فيه بوسليك على الفا

الحجاز كار مافيهوش بوسليك خالص .. ولا وإنت طالع ولا وإنت نازل

ولو كان فيه بوسليك .. لأصبح المقام ( نهاوند طبيعى ) نهاوند + حجاز

الحجاز كار يتكون من جنسين منفصلين هما ( حجاز من درجة الدو .. وحجاز من درجة النوا )

والكورديللى .. يتكون أيضاً من جنسين منفصلين هما ( كرد من درجة الدو .. وكرد من درجة النوا )

وبالطبع هناك من يحسبها جمع متصل .. بحيث يكون جنس الفرع ( نهاوند من درجة الجركا ( الفا )

ولكن فى وجود كرد الصول إظهار لطابع اللحن وتسهيل للتحويل لمقامات أخرى بداية من جنس الفرع ( الدرجة الخامسة للمقام ) .. لماذا إذن نوجع قلبنا ونحتاس فى الإنتقالات المقامية

**الألآتى** · #3 02/10/2012, 01h17

بسم الله نبدأ فى تحليل أغنية ( كلنا نحب القمر )

كلمات : أحمد عبد المجيد

ألحان وغناء : محمد عبد الوهاب

بداية يجب أن نعرف أن العمل تم تلحينه فى العشرينات .. أى فى بدايات عبد الوهاب التلحينية

وكان التركيز على الطرب والغناء أكثر من التركيز على الموسيقى .. بدليل هذا الكم الكبير من العُرب والحليات بجميع أشكالها فى الغناء

إختار عمنا ( عب وهاب ) مقام الحجاز كار كرد ليصوغ منه لحنه .. ويكون هو المقام المسيطر الذى يبدأ منه ويعود إليه طوال العمل

ولمن لا يعرف الحجاز كار كرد .. هو الكرد نفسه لكن من درجة الدو .. وسبب تسميته أنه من نفس درجة الحجاز كار

والبعض يسميه ( كورديللى )

المهم .. مقدمة موسيقية قصيرة من نفس المقام وبألآت موسيقية قليلة جداً وبسيطة

والميزان الإيقاعى بسيط ( 4 / 4 ) .. ويغنى عبد الوهاب من نفس المقام ( كلنا نحب القمر .. والقمر بيحب مين )

ومن أولها نتعثر فى مصائب عبد الوهاب التلحينية .. الراجل بيقول ( كلنا نحب القمر ) من الكرد ..

ييييه .. الحجاز كار كرد ياسيدى .. ماتزعلش

المفروض فى مسار سلم الكرد .. أننا نستعمل الرى بيمول .. لكنه يأبى إلا أن يدهشنا من أول جملة

فيستعمل الرى بيكار ( البيضاء على البيانو ) أو كما نقول ( ناتوريل ) وهو يقول ( نحب القمر )

يعنى من تانى كلمه .. ماعندوش يامه إرحمينى

طيب وبعدين .. نكمل ..

هل إكتفى عبد الوهاب .. أو سابنا ناخد نفسنا .. حاشا ياباشا .. مش ممكن طبعاً ..

نجده يقفل الجملة الغنائية على درجة معلقة .. غير درجة ركوز المقام

نفسر الحكاية دى

معروف أن الجملة الموسيقية أو الغنائية عبارة عن سؤال وجواب

فنجده يقول ( كلنا نحب القمر ) هذا هو السؤال .. وبعدها يقول ( والقمر بيحب مين ) هذا هو الجواب

المفروض أن ينهى الجملة اللحنية على درجة ركوز المقام ( قرار أو جواب مايهمش )

لكنه كعادته ومن بدايات أعماله .. نجده يخرج عن المألوف .. فبدلاً من أن ينهى الجملة على درجة الدو ( درجة ركوز الكرد )

نجده أنهاها على درجة السى بيمول .. لييييه .. سنعرف بعدها ..

لأنه سيبدأ الجملة التالية من السى بيمول ( حظنا منه النظر ) ولأنها أيضاً تحويلة لمقام البياتى

ويعود للكرد مرة أخرى عند ( فيك أنينه يلومنى فيك ) ..

وأترككم قليلاً لتستمتعوا معى بـ ( عذبه ) فهو يصول ويجول فيها ( مطرب بقى ) من البياتى أيضاً

ويعود مرة أخرى للكرد مع ( أعيش بأمل إنك يوم تصفالى ) ويظل معه للنهاية

لكننا وحتى النهاية نسمع ونستمتع بكم رهيب من الحليات الغنائية من بداية ( ماتقوللى إزاى أنساك .. لا أنا طايل تعذيب فى هواك )

فنجده يكرر الجملة ثلاث مرات وكل مرة بشكل ..

إسمعوا معى ( يسلاك ) وصعوده لجواب النوا ( سهم )

ثم نسمع السلم الملون ( كروماتيك ) عند ( يسلاك ) أيضاً عند الإعادة

وينهى الأغنية عند درجة الدو ( ركوز المقام ) ليؤكد لنا أنه يعرف درجة ركوز المقام .. وماكانش تايه عنها

أرجو أن أكون وُفقت فى هذا التحليل المتواضع

**انور الحارث** · #4 02/10/2012, 05h41

اضع بعض الشغلات الصغيرة:

-1-هل هذاا العمل شرقى..بحت ام ان

ثم نسمع السلم الملون ( كروماتيك ) عند ( يسلاك ) أيضاً عند الإعادة

نفى الشرقية

2-برأيكم الالة التى تظهر بالفيدو اعلاه

استخدمت بالعمل..ام كان هناك صوت الة اخرى موسيقية حاليااا غير

مستخدمة(هل يوجد ألة غريبة)

-3- مواااصفاات مقام حجاازكاركرد

كيف هذااا التناااقض بالمقااام بالكراهية باغنية انااا اكرهك كانت ايضااا من الحجااازكااركرد

والان باغنية حب ولوعة والم

**guest** · #5 02/10/2012, 11h30

اقتباس:

المشاركة الأصلية كتبت بواسطة انور الحارث

اضع بعض الشغلات الصغيرة:

-1-هل هذاا العمل شرقى..بحت ام ان

ثم نسمع السلم الملون ( كروماتيك ) عند ( يسلاك ) أيضاً عند الإعادة

نفى الشرقية

2-برأيكم الالة التى تظهر بالفيدو اعلاه

استخدمت بالعمل..ام كان هناك صوت الة اخرى موسيقية حاليااا غير

مستخدمة(هل يوجد ألة غريبة)

-3- مواااصفاات مقام حجاازكاركرد

كيف هذااا التناااقض بالمقااام بالكراهية باغنية انااا اكرهك كانت ايضااا من الحجااازكااركرد

والان باغنية حب ولوعة والم

استاذ انور

الالة الموجودة في الفيديو هي الة البانجو Banjo

لم يتم استخدامها في العمل الموسيقي - من خلال سمعي المتواضع الالات المستخدمة عود و كمنجات و الة ايقاع

مقام الكرد عموما مقام مفيهوش حزن .. و لكن في ثانية ممكن تغير حرف منه تبقي في الصبا و يحزن او تبقي في النهاوند و تفرح زيادة , يعني بين البينين .. مقام ابن حلال و عشري

العمل تم تحليله
تم استخدام الكرد من الدو .. و دا مفيهوش ارباع تون
يبقي مش شرقي
تم استخدام البياتي و دا مقام شرقي فيه الربع تون
يبقي شرقي
و تم استخدام الكروماتيك و دا مش شرقي و استخدمه عشان يوصل للركوز تاني موسيقيا .. و لكن احساسا بقي استخدمه صعودا تعبيرا عن الحسرة اعتقد انه مش قادر ينسي او يسلي المحبوب , تعبيريا في مكانها كويسة

علي اعتبار ان الشرقي معناه بالنسبة لي استخدام مقامات فيها الربع تون
اذن العمل مش شرقي بحت و لا غربي بحت
عبد الوهاب عمل توليفة حلوة

و تحياتي و تقديري

**الألآتى** · #6 02/10/2012, 13h55

اقتباس:

المشاركة الأصلية كتبت بواسطة انور الحارث

اضع بعض الشغلات الصغيرة:

-1-هل هذاا العمل شرقى..بحت ام ان

ثم نسمع السلم الملون ( كروماتيك ) عند ( يسلاك ) أيضاً عند الإعادة

نفى الشرقية

العمل شرقى بحت .. وليس معنى إستعمال السلم الملون فيه .. أن يبتعد عن الشرقية .. كما أن عبد الوهاب إستعمل الكروماتيك فى الأداء الصوتى وليس الموسيقى

اقتباس:

المشاركة الأصلية كتبت بواسطة انور الحارث

2-برأيكم الالة التى تظهر بالفيدو اعلاه

استخدمت بالعمل..ام كان هناك صوت الة اخرى موسيقية حاليااا غير

مستخدمة(هل يوجد ألة غريبة)

الآلة التى تظهر هى البانجو .. ويسميها البعض ماندولين بالخطأ .. والصورة مأخوذة من أغنية ( عاشق الروح )

وقد إستعملت الآلة فى الأغنية بالفعل ( عاشق الروح ) فى الجملة الرئيسية للأغنية ..مع الماندولين والبزق .. لكنها لم تستعمل فى أغنيتنا هذه

وكما ذكرنا أن الألآت المستخدمة قليلة وبسيطة ( قانون ، عود ، كمان )

اقتباس:

المشاركة الأصلية كتبت بواسطة انور الحارث

-3- مواااصفاات مقام حجاازكاركرد

كيف هذااا التناااقض بالمقااام بالكراهية باغنية انااا اكرهك كانت ايضااا من الحجااازكااركرد

والان باغنية حب ولوعة والم

مواصفات الحجاز كار .. مثل مقام الحجاز .. لأن الجنس الأصلى واحد ( جنس الجذع )

ومواصفاته الخشوع والتبتل واللوعة فى التعبير

ومن حق الملحن أن يرى المقام كيفما شاء .. فليس هناك قواعد جامدة تلزم الملحن .. فالتلحين إبداع أولاً

ولو قام كل ملحن بإتباع القواعد ومواصفات كل مقام .. لأصبحت كل الألحان متشابهة

فالقواعد وُضعت للإستدلال بها وليس التقيد الجامد

**guest** · #7 02/10/2012, 11h15

اقتباس:

المشاركة الأصلية كتبت بواسطة الألآتى

التحليل جاهز .. ولكنى سأرد على أخونا إيهاب أولاً

شكرا علي التحليل يا محمد بيك .. احسنتم

**انور الحارث** · #8 02/10/2012, 16h31

إسمعوا معى ( يسلاك ) وصعوده لجواب النوا ( سهم )

( سهم )؟؟؟؟؟؟؟؟؟؟؟؟؟؟

**الألآتى** · #9 02/10/2012, 17h50

اقتباس:

المشاركة الأصلية كتبت بواسطة انور الحارث

إسمعوا معى ( يسلاك ) وصعوده لجواب النوا ( سهم )

( سهم )؟؟؟؟؟؟؟؟؟؟؟؟؟؟

كنت عارف إنك حاتسأل ..

شوف ياسيدى .. الصول الوسطى فى البيانو .. إسمها الشرقى ( نوا )

والصول إللى قبلها ( القرار يعنى ) هل إسمها نوا برضه ..لا .. إسمها ( يكاه )

طيب والصول إللى بعدها ( الجواب يعنى ) .. إسمها ( سهم )

هذه مسميات شرقية نستدل بها ولا نستعملها فى الواقع

**guest** · #10 02/10/2012, 18h09

استاذ محمد

شكرا جزيلا علي التوضيح
انا عملت نوتة توضيحية حسب فهمي المتواضع عشان افهم
و حضرتك اهل علم و خبرة

هل انا كدة فاهم البوسليك غلط ؟
و لا دخلت البوسليك علي النهاوند ولا انا عملت ايه ؟ انا الكلام دا قرأته مش من دماغي و عاوز اتأكد من سيادتك
لسة الموضوع ملخبط معايا
انا كدة فهمت الكورديللي تمام و اشكرك
و الحجاز كار موجود في النوتة .. هل فيه خطأ ؟ صعودا و هبوطا ؟
النوتة موجودة في المشاركة رقم 11
انا اعرف ان البوسليك هي نغمة المي البيكار
ايه هو بقي مقام البوسليك .. بعد اذنك ؟
جنسه الاصل ايه و فرعه ايه ؟

و شكرا جزيلا مقدما
تحياتي و تقديري