طلبات نوتة أ / عادل صموئيل الجزء الثانى

[عادل صموئيل]

احبائى

اتقدم لكم بأطيب التهانى بعيد الفطر المبارك

واقدم لكم العيدية

من اروع اغانى عبد الوهاب الوطنية

دعاء الشرق

اللحن ده انطلب من مدة ولكن نظراً لأنه صعب جدا جدا يعنى كنت بأجله بس حسيت ان مفيش حد بعدى حايقدر يدونه .. وللعلم انا بعمله من اكتر من عشر ايام ووقفت كتير يعنى من صعوبته قررت كذا مرة اركنه لكن قيمته الكبيرة خلتنى اجاهد فيه لحد ماخلص

طبعا بعد ما قمت بتبسيط النوتة وانتم تشوفوها ممكن حد يقول شكله سهل الصعب فين ؟

هو شكله العام سهل لكن فيه بعد موازير صعبة جدا وتفعيلات جايز انتم اول مرة تشوفوها بس ماتتبسطش اكتر من كده .. مش دى المشكلة .. المشكلة ان اداء عبد الوهاب هنا كان اكتر من معقد واكتر من رائع بحيث انى يمكن دونت الجملة الواحدة اكتر من خمس مرات ومسحتها وحسيت انى ضئيل جدا جدا بالنسبة للى بيقوله عبد الوهاب ..

فى اللحن ده وانا منزل لكم التسجيل اللى عندى لو تلاحظوا انو تسجيل استوديو وعادة تسجيل الاستديو حتى مع ام كلثوم بتكون الاعادات محددة جدا .. لكن هنا فيه حاجة غريبة ان عبد الوهاب قعد يعيد ويجود كأنه فى حفلة يعنى اللحن ده حوالى 7 دقائق التسجيل واخد 23 دقيقة

طبعا انا بتكلم فى حاجات ماحدش بياخد باله منها ... بس هنا بجد فيه حاجة غريبة ان عبد الوهاب مطول جدا فى التسجيل بشكل غير معتاد فى الاستيوهات .. بس طبعا التطويل والاعادات جايب نتيجة يعنى شوفوا روعة الاداء العبقرى

من الاسرار اللى برضو حقولها لكم واللى بعرفها بخبرتى حتى لو ماحضرتهاش .. ان اللحن ده العازفين اما حافظينه او هو عامل اكتر من 30 يروفة بحيث العازف ما يبصش فى النوتة ويركز مع عبد الوهاب ,, وانت لو عندك خبرتى حاتحس ده وانت بتسمع

لما نيجى للحاجات الغير طبيعية او الاختراعات اللى فى اللحن حنلاقى موسيقى الكوبليه الاول

تحس الايقاع عامل حاجة زى جنازير الدبابات يعنى تحس جيش داخل عليك وده اللى كان بيدى قوة عظمى للنشيد او الاغنية الوطنية زمان .. وانا فى 25 يناير الاناشيد الضعيفة اللى اتعملت قلت ان الموسيقى اللى بالاورج وجيتار دى تافهة مش راكبة على الدبابات اللى فى الصورة ... هنا جدير بالذكر فى حرف خطير جدا فى لازمة انتظار الكوبليه الاول المفروض انالمى بيمول لكن عبد الوهاب خلا العازفين يلمسوا المى ناتورال .. يعنى انا حاولت انى اعمل الحلية دى اتمنى توصل لكم

عمواما اللحن ده صعب جدا جدا لكن لو حفظته وتحاول فيه جزء جزء ان شاء الله حايطلع

وللمدونين الجدد لاحظوا الاخراج هنا يعنى عشان لو فى فرقة لازم ماتعملش قلب للصفحة وسط ما الموسيقى ماشية .. لاحظوا انى فى المقدمة خلطت الجزء الادليب وقلبت الصفحة

لما نيجى لأخطر شى اطلاقا وهو موضوع النشيد ده كان ايام عبد الناصر الاولى اللى كان بيحلم بالوحدة العربية اللى لو كانت حصلت ساعتها ... اول حاجة كانوا الصهاينة هربوا من اسرائيل يعنى من غير حرب يعنى اكيد حايخافوا لأن وحدة من 16 دولة كانوا حايتعملوا ساندويتش وساعتها ولا امريكا ولا اى حد كان حايلحقهم ده بالعكس كانت امريكا حاتخاف تهوب ناحية المنطقة إلا بالادب لأن عارفين 16 دولة يعنى ايه يعنى اقوى كتير من امريكا

لكن الخيبة فى الحاكام العرب اللى كل واحد همه كرسيه

ومن كلمات الاغنية : عزة الشرق وبأس العرب

وصعب عليا كلمة بأس العرب ... فين بأس العرب النهاردة .. العرب اللى مقطعين بعض عشان مطامع زائلة وماحدش بياخد معاه حاجة لما يموت ... طب بيقطعوا بعض على ايه ..

وافتكرت زميلى نابوليون بونابرت اللى كان نفسه يعمل امبراطورية

تخيلوا ياعرب النهاردة لو طلع واحد زى نابليون بونابرت وحب يعمل امبراطوية ممكن يحتل ال 16 دولة عربية فى 16 يوم ( وفيه دول ممن يحتل ال3 دول فى يوم ) وبتكلم جد مش بهزر قول لى اسم دولة النهاردة ممكن تصد عدوان ؟؟؟ لأن كل دولة مع الاسف جيشها عمال يصد فى اللى جوا البلد وبينضرب ويضرب من الامام والخلف وكان كل دولة بتقول للمحتلين اتفضلوا احتلونى انا جاهزة ... سا عم ده حتى الدول الصغيرة اللى عمرها ماحاربت ومش بتاعة حرب يعنى جيشها بتاع عروض عسكرية بتدفع فلوس عشان تولع دول اخرى

يعنى خيبة على خيبة على خيبة ... فاكرين زمان عظمة على عظمة على عظمة

مع اطيب تحياتى وبلاش الاقتباس