طلبات نوتة أ / عادل صموئيل الجزء الثانى

[guest]

يا استاذ عمرو

الحقيقة قطعت قلبي لما شفت كلامك

مبدئيا .. لحد الرد ما يجيلك من سيد عادل اللي أنا متأكد انه دلوقتي بيفكر في حل لل مشكلة بتاعتك و هيجيبلك رد من الاخر فيه الخلاصة
عاوز اقولك يا اخي العزيز
كل مشكلة .. و ليها حل
انا مش شايف ان مشكلتك دي تستدعي ان تسبب لك الم نفسي زي ما قلت ! دا انت يا رجل بتعزف من النوتة و بس ! دا مستوي متقدم جدا في نظري
1.خد اجازة من المزيكا تماما .. ( راحة سلبية 10 ايام او اسبوعين ) ما تحاولش تلمس فيها التك الموسيقية
2.حاول تسمع ل نوع مختلف من الموسيقي اللي انت متعود عليها .. يعني لو بتسمع عربي .. جرب انجليزى .. بتسمع انجليزي .. غير للهندي .. او التركي .. جاز .. مش بهرج علي فكرة
بتسمع روك ؟ اديها شوية chillout
من غير ما تحس هتلاقي نفسك بتكون جواك مخزون موسيقي متنوع
3.انسي موضوع الماكينة دة .. لما تسمع لحن او اغنية .. انسي النوتة و الموازير و الكلام دة .. ما تحاولش تحلل
سيب احساسك يجري مع الموسيقي .. اياك تفكر مثلا في الكمنجة اللي في اللحن انها دو ري مي ... غوص ب كيانك جوا الموسيقي
4.لو عاوز تلعب سماعي .. دندن اللي عاوز تلعبه ب لسانك و بقك .. هتقوللي انا مش بغني .. هقوللك ما تغنيش .. دندن اللحن مجرد دندنة
و بعدين امسك الالة بتاعتك .. دندن الموسيقي ب لسانك و حاول تلاقي الدندنة دي علي اوتارك او مفاتيحك لو بتلعب اورج او بيانو .. لازم تعرف ان الموسيقي كلها 7 حروف في الكرة الارضية كلها يعني مثلا لو الجملة يا ليل ماشية دو ري دو
و انت لعبتها دو ري مي استطعمها ب ودنك.. هي ؟ لا .. ارجع تاني و انزل تون .. بقت دو ري ري .. مش هي .. انزل تاني دو ري دو .. شفت ؟ جت معاك ولا لأ ؟

يا سيد عمرو رغم ان النوتة مهمة جدا مفيش جدال .. بس الاحساس مهم جدا برضه .. انسي الماكنة .. و سيب ل نفسك فرصة للموسيقي تتمكن منك .. سيب الموسيقي تسيطر عليك .. روح معاها و تعالي .. و فكر في التك الموسيقية ايا كان حضرتك بتلعب الة ايه .. تعامل معاها علي انها صاحبتك .. و حبها .. ينفع تقول لصاحبتك كلام محاسيسي كدة انت حافظه او قاريه ؟ و لا بتقول اللي طالع من قلبك ؟

حس اللحن .. العبه ما تقراهوش .. و لو غلطت في تون كدة و لا كدة .. كلم صاحبتك ( التك) و قولها انا كان قصدي اقوولها كدة و العبها تاني

علي الفكرة الموسيقي قبل ما يكتبوها حسوها .. و بعد ما كتبوها حللوها .. و طلعوا السلالم و المقامات و الهارمونيات و الخ الخ

اتمني اكون ساعدتك ب كلامي يا عمرو يبه