رد: نوتات الأستاذ نزيه محمد
طيب
نبتدي منين الحكاية ؟
تقول يعني ليه لونجا ؟
ال لونجا هي : قطعة موسيقية ذات طابع سريع ونشط - صورة مصغرة من البشرف .. يعاني ايه بشرف ؟ مش موضوعنا دلوقتي .. ال لونجا موسيقي ألية - يعني مكتوبة اصلا عشان تتلعب ب الة موسيقية .. ممكن يبقي عود , كمنجة , جيتار -- مش فارقة .. المهم تكون لعيب و شاطر
و ال لونجا كلمة مش عربي و لا كلمة تركي انما يقال ان اصل الكلمة روماني منبثق من الموسيقي الغجرية
وغالبا ما تكون اللونجا صعبه العزف وتعجيزيه نوعا ما
وغالبا برضه ملحنين اللونجا هم نفسهم العازفين , لكن طبعا لو لونجا حلوة بتبقي مباراة بين العازفين .. واحد يفتخر انه بيعرف يلعب لونجا رياض مثلا .. يقوم التاني يرد عليه ب لونجا شاهناز لأدهم و علي افندي .. ييجي واحد تركي يرد ب لونجا سلطان يكاه ل يورجو افندي يقوم اللي بعده يرد ب لونجا نهاوند مثلا ل جميل بك الطنبوري -- و ماااا أدراك جميل بك الطنبوري .. دة باشا مش بيه يا شباب و بالمناسبة الطنبوري دي نسبة للألة اللي كان بيلعب بيها الة تركية اسمها الطنبور و ليها كذا شكل .. اختصارا يعني شبه العود
ال لونجا ك قالب موسيقي تصاغ غالبا في ميزان 2 علي 4 و دي مش قاعدة يعني لأن في لونجات علي وزن 6 علي 8 و فيه كمان 5 علي 4 !
و ال لونجا غالبا تتكون من 3 خانات و تسليم أو 4 و تسليم
يعني بتمشي كدة خانة 1 تسليم - خانة 2 تسليم و هكذا
و غالبا عندما تكون 4 و تسليم .. الخانة 4 بتكون ب ميزان مختلف و مركب زي 3 علي 8 كمثال
دي يعني معلومات خفيفة عن ال لونجا و مش كلها طبعا !
نرجع لل سيد محمد نزيه و ال لونجا بتاعته ( لونجا نزيه )
دليل مقام صول مينور
ميزان 2 علي 4
لونجا نزيه تتكون من
1 خانة ... الصراحة خانة 1 شدت ودني انا شخصيا
تسليم .. أنا انبهرت في التسليم .. ب صراحة يعني بالبلدي .. تسليم اهالي ..
خانة 2 .. لسة بيكمل لنا الاستاذ نزيه الحدوتة مع استعراض ل سلم ال كروماتيك و قفلة الخانة بيجهزك لل تسليم تاني!!
خانة 3 يعني الصنعة فيها تبرز أن ال لونجا ما جاتش من فراغ و غالبا يعني في ال لونجات تكون الخانة 3 استعراض
للألة في ال قرارات والجوابات .. السيد نزيه خدنا من فوق ل تحت يجهزنا لل تسليم !! صنايعي شاطر الراجل !
بعد ما قولنا خلاص كفاية كدة .. الراجل ما استكفاش .. رايح فين ! تعالي تاني ! بس مش في الدور التحتاني 
تعلالي يا حبيبي في ميزان 3 علي 8 منه اروش عليك شوية و بعد كدة اسلمك في 2 علي 4
وبعد كدة توتة توتة خلصت الحدوتة .. حلوة و مش ملتوتة
انا قمت ب رفع ملف صوتي Longa Nazeeh guide لل تسهيل علي من يريد تعلم و عزف لونجا نزيه ال جميلة فعلا
و مرفق ايضا توزيعي ل لونجا نزيه (Longa Nazeeh) .. اتمني أن أكون وفقت فيها لأن اللي أنا عامله ملوش دعوة ب قالب ال لونجا المتعارف عليه .. يعني بالنسبة لي تجربة موسيقية و عدت من ضمن تجاربي بس استمتعت يبها بجد
شكرا
التعديل الأخير تم بواسطة : tarak766 بتاريخ 05/02/2019 الساعة 00h10
|
العرض الشجري