رد: طلبات نوتة
الأصدقاء
صباح الخير عليكم
انضم لنا صديق جديد....وليد100 مصرى مغترب فى السعودية.....وكان بيطلب نوتة اغنية"سلامات ياحبايب" للراحل محرم فؤاد....وكلمات الرومانسى قوى مرسى جميل عزيز....وتلحين الكتوراة والتخصص فى تلحين اغانى الوداع والسفر والغربة...طبعا عارفينه...بليغ حمدى...حد ينسى الطير المسافر ل نجاة...خلاص مسافرلشادية...وبلاش تفارق وبودعك لوردة....وحبيبى يامتغرب لفايزة......وكنت على وشك انى اقول ل وليد ...روح لموقع بليغ حمدى دوت كوم...حتلاقى نوت جميلة لبليغ وصور وذكرياته .....ولكنى صعقت واندهشت ...لما عرفت ان الموقع معروض للبيع .....the domain balighhamdy .com is for saleآه والله ...بليغ حمدى للبيع.
انا مش فاهم ليه الورثة بيعملوا كده؟؟؟؟؟؟؟؟؟؟
ليه مش بيحافظوا على تاريخ الرموز دى...وليه الجحود والنكران برغم "حق الاداء العلنى"...!!!!
اتحداك لو تلاقى حد من الورثة عمل اى حاجة للرموز العظيمة دى ...سواء كان فنان أوغيره......كله بمجهودات المعجبين..شئ يغيظ.
هل قام "احمد السنباطى "بعمل موقع لوالده على النت اومتحف فيه عوده الشهير وصوره؟؟؟؟؟؟ح يقولولك اصل المتحف ده مسئولية وزارة الثقافة ...ده مش عذر.
ابن كمال الطويل"زياد"وهو ايضا ملحن وفنان ...ماعملشى موقع لوالده ...ماقولناش متحف...حتى الموجى اولاده كلهم فنانيين...عملوا ايه لأبوهم!!!!
قول بليغ ماخلفشى ...لكن معروف انه كان متبنى -الى حد ما- ابن اخوه هيثم...ليه تيبيعوا الموقع ياأستاذ هيثم....وأين الدكتور مرسى اخو بليغ؟؟؟؟
فى القلب حسرة بالمرارة..
أذن لولا منتدى زى "سماعى " كانت الناس دى راحت فى دائرة النسيان...
لأن لاحكومة بتهتم ....ولاوزارة ولاثقافة ولا تاريخ ولارموز...
وروح اوروربا وشوف المانيا ولا النمسا ولا ايطاليا بتعمل ايه فى الفنانين بتوعها
مفيش تهريج ولا سخافة قميئة....زى اللى عملوه ورثة ام كلثوم ...لما باعوا فيلتها وحطوا الملايين فى جيوبهم...وتتهد الفيلا ويطلع مطرحها فندق...وآل ايه اشترطوا
على ادارة الفندق انهم يعملوا متحف...وطبعا لافيه متحف ولايحزنون....
ولولا الجندى المجهول "عادل صمويل" اللى واهب روحه وعينيه وفكره لكتابة هذه النوت للتاريخ...كأحد النساك فى محراب الفن ....لأنتهى الفن الجميل.
ولولاكم ياأصدقائى-هواة ومحترفين-لاندثرت قيم جميلة من حياتنا لا يقدرها الورثة حق قدرها.
آسف للأطالة وهاهى نوتة "سلامات ياحبايب" لبليغ.
طبعا مافيهاش رشاقة ولاسهولة نوت عمنا المعلم....لكن آهى حاجة توريك السكة
وخلاص...
عمنا النيجيرى سابقا المغاغى حاليا"عزت شحاتة" انت كنت فين ياراجل من زمان؟
اهلا بيك معانا وماتنساش لقاءنا الجميل يوم 8 شهر 8 فى القاهرة .والأستاذ وليد 100
...وطبعا الكل معزوم.
باسم كل الفنانين الراحلين ....اشكر ادارة منتدى "سماعى"
|
العرض الشجري