نوت متنوعة

[عزت شحاته]

استازى الجميل / عادل صموئيل
صباح الفل .. كلام حضرتك شجعنى ..وكنت متردد ..
في نوتة ( تمر حنه ) .. اعتقد الموازير اللى ف بداية الغناء فى النوتة ناقصه ..
برجاء تلقى نظره وتصحح لى اعتقادى

[عزت شحاته]

المشاركة الأصلية كتبت بواسطة عزت شحاته

استازى الجميل / عادل صموئيل
صباح الفل .. كلام حضرتك شجعنى ..وكنت متردد ..
في نوتة ( تمر حنه ) .. اعتقد الموازير اللى ف بداية الغناء فى النوتة ناقصه ..
برجاء تلقى نظره وتصحح لى اعتقادى

للتوضيح .. المازورتين التالته والرابعه من بداية الغناء .. حدث بهما خلط ما بينهم وبين المازورتين بنهاية المذهب.. لآن اللحن مختلف
ومساء الورد يا عم نوريا صباح .. واحشنا جدا جدا
ويا عم ما توقعنا فى الغلط .. احنا ما نقدرش
وبعدين نوزن بره ازاى وكله من علامه

اخى العزيز
اشكرك للتوضيح بس انا ممكن اوضح ان فايزة احمد غنتها كذا مرة وكل مرة بأحساس شكل وانا فهمت قصدك لأنى دورت على تسجيل تانى لقيتها بتقولها مختلف سنة عما انا كتبتها وانا كتبت لك الجملة دى وايه رأيك ؟
بس هى ممكن تتقال بالطريقتين يعنى مافيهاش خطأ جذرى هى العملية عُربة مش اكتر
بس اللى انا كتبتها الاول اسهل وانت لو عازف شاطروحبيت تعزفها ممكن تعمل تلوين يعنى تعزفها مرة زر ما كتبتها اول مرة ومرة زى ما كتبتها تانى مرة خصوصا ان المرجع بيتعاد 4 مرات عشان عيله جملتين كلام
اما ياعم نور الصباح صباح الخير بالنسبة للميزان وعشان ما حدش يوزن برة حاعمل لكم بعد كده عبوات مدعمة عبوة نص كيلو وعبوة كيلو وممكن عبوة عائلية عشرة كيلو عليها خمسميت جرام هدية
مع اطيب تحياتى عادل صموئيل

[عادل صموئيل]

احبائى
بعد الحاح شديد من عدد من الاحباء
اقدم لكم نوتة
امى ثم أمى
ومع ان الاغنية دى من الاغانى الحديثة من النوع اللى مش بحب اكتبه ولكن احتياج احبائى لها قررت اكتبها
ولولا ان لحنها كل الكوبلليهات زى بعض ما كنتش حاكتبها لأنها تعبتنى جدا عشان افهمها ( وانا مش فاهم انتم بتفهموا الاغنى دى ازاى ) يعنى اول ملحوظة ان طول ما انت بتسمع الوحدة بتتكسر وعادى لأن المطربين بتوع اليومين دول مش بيفرقوا انهم يبقوا برة الوحدة ولا جوة وبيغنى ولا هو هنا
ولى عليها ملاحظات مهمة
اول حاجة فيه بريك عامل زى بلاعة مفتوحة فى وسط الشارع بين المقدمة ( اللى حاولت ابسطها عشان تعرفوا تعزفوها ) وبين غناء اول كوبليه يستحسن انكم تتجاهلوه زى ما انا تجاهلته لأنه بيقلب ويكسر الرتم
تانى حاجة ودى مهمة جدا : حاولوا تتبعوا اللحن الاساسى فى الغناء زى ما انا مبسطه فى الكتابة لأن المطربين فى التسجيل بيتفزلكوا بشكل بيخرجهم برة الوحدة ودى صعبة جدا على التلاميذ اللى حيغنوها يعنى حاولوا تخلوهم يغنوا اللحن الاساسى زى ما انا كاتبه لأن المطرب لو خرج بره وطين الدنيا ممكن يتصرف لكن التلميذ ممكن يلخبط اوى طبعا
مع اطيب تحياتى

انتظروا بكره مفاجئة نوتة من العيار التقيل التقيل جداً

[عادل صموئيل]

احبائى
حان وقت المفاجاة
اقدم لكم اغنية من روائع الروائع ومن الوزن التقيل جدا جدا
النهر الخالد
والأغنية دلا انا بعزفها طول عمرى لكن ما جيت اكتبها اكتشفت انها اصعب اكتر كتير من ما كنت متخيل شكلها مكتوبة واهم مشكلة انى كيف اكتبها مع التبسيط لأن ممكن نفس هذا اللحن شخصيا يكتب بطريقة ما يعرفش يقراها غير المحترفين جدا
وبدات الفكرة برسالة من اخت فاضلة من سوريا الشقيقة اسمها ارجوانة بتقول لى انها بحثت عن نوتة النهر الخالد ما لقتها واذا كان من الممكن ان ادلها على اى نوتة للحن ده يعنى هى ما طلبتش صراحة انى ادونها , لكن اهتممت بالطلب وبسرعة ذهبت الى قسم البحث فى المنتدى لم اجد لهذا اللحن نوتة قديمة من تدوين اى شخص كان , وتعجبت ازاى منتدى سماعى ما يكون فيه نوتة النهر الخالد ومن هنا جاءت البداية ودونت لكم النهر الخالد
اتمنى ان تحوز رضاكم
مع اطيب تحياتى

[armendo]

اصدقائى واعزائى المهتمين باغانى الأطفال اليكم اغنيتين
من كلمات وتلحين الفنان الموهوب نزية محمد
مع تحياتى اخوكم ..........ارمندو

[عادل صموئيل]

اقدم لأخى العزيز نور الصباح نوتة
زى نور الشمس
مع اطيب تحياتى

[عادل صموئيل]

احبائى
اقدم لكن اليوم نوتة لحن من احلى الاغانى العاطفية واكثرها مشاعراً
اغنية
حنين
لوردة , هذا اللحن مع انه مظلوم لأنه كان فى احد الافلام والاذاعة لاتذيعه كثيراً , ولكنه لحن يوقظ المشاعر , انا عزفته مع وردة فى التسجيل من حرارة اللحن كانت تغنى وهى تبكى , وهنا احب اذكر ان كل مطرب له عصر ذهبى , وكان العصر الذهبى لوردة ايام كانت متزوجة بليغ حمدى , يعنى كان يلحن لها لحنا رائعاً كل اسبوعين , يعنى كان فيه دويتات رائعة فى الفن الجميل زى شادية ومنير مراد وليلى مراد واحمد صدقى مثلاً , وكلمة دويتو يعنى ملحن يعمل لحن ومطربة ثم تتكرر التجربة بعد ذلك عشرات المرات وجمال الالحان يزداد , ( لأن كتير ايضا حصل ان ملحن ومطرب يستمرا معا ولكن الالحان الاخيرة اقل من الاولى ) , وانا كعادى او اساس خبراتى النظرة الشمولية يعنى انظر الى الصورة من كل الزوايا واحيانا افكر فى الخلفية التى قد لا تبدو واضحة او لا تسلط عليها الأضواء
انا اشكر الأخت العزيزة ياسمين الشام لأنها طلبت هذه الأغنية ونزلت التسجيل لأنى كنت اتمنى ان ادون هذا اللحن الجميل , واتمنى ان تسمعوا هذا التسحيل غير غناء وردة ركزوا جيدا على الكورس او الكورال , تجدوا درجة عالية جدا من السلطنة غيير مسبوقة من قبل , يعنوا تحسوا فى ادائهم بفرديات مطربين كبار مش مرددين وراء مطرب , واذكر من هؤلاء السيدات اسماء : بوسى وكيتى وانشراح على سبيل المثال , ولما اتكلم عن بوسى اسمها الاصلى بثينة عبد الغنى السيد ( وطبعا مفيش اتنين عبد الغنى السيد ) , وكيتى دى كانت من مجموعة كبيرة من الأجانب فى مصر كانت تعيش بكثافة وتداخلت مع المصريين حتى اصبحوا مصريين وكانوا خبيط من الجنسيت يعنى يونانيين وايطاليين وارمن وروس ابيض وعدد كبير من اهل الشام , وكان الكثير منهم بيعملوا فى مجال الفن ومن اشهرهم الراقصة كيتى وكاميليا , ومن اشهرهم ايضا الكومبارس والراقصات فى افلام ليلة مراد , يعنى لما تشوف الافلام القديمة كان الراقصات نوعين , يعنى تشوف امامك خمسين راقصة لو بيرقصوا شرقى بيبقوا عوالم لكن اللى بيعملوا او بيشتركوا فى الاستعراضات تلاحظ ان معظمهم اجانب يعنى البياض والعيون الخضراء , وبوسى وكيتى وانشراح دول اشتركوا فى معظم الاغانى يعنى من ضمنها عاشق الروح وطوف وشوف وشوف بقى , اقول ايضاً على سر نميس كان الكورال بيحبوا بليغ حمدى لنه كان اكتر واحد بيشغلهم يعنى من النادر ان تخلوا اغنية لبليغ بدون كورال بعكس الآخرين
المهم اتمنى ان تسعدوا بالأغنيية واكرر شكرى للأخت العزيزة ياسمين الشام لأنها اختارت لى ولكم هذا اللحن الرائع
مع اطيب تحياتى

[Anitta]

احب تقديم نوتة حلوة يا بلدى لمن يحتاجها لانها حلوة وارجو مراجعتها

[عادل صموئيل]

احبائى
اقدم لكم بناء على طلب الاخ العزيز عزت شحاته اغنية وطنية من العيار التقيل جداً جدا
مصر التى فى خاطرى
طبعا انا اللحن ده عزفته مليون مرة بس لما كتبته لقيته اصعب من ما كنت متخيل , ممكن عشان انا شاطر شوية فى العزف بيطلع من غير ما افكر لكن فى التدوين لابد ان ادقق اوى واكتشفت حاجات كتير فيه
فيه ملحوظات مهمة جدا لأنى كنت فى حفلات كتير تبع وزارة التربية والتعليم بس شفت مشاكل كتير واخطاء خطيرة احيانا اتمنى ( اولاد عادل صموئيل ) ما يعملوهاش
اول شىء عند بداية الغناء ( مصر التى فى خاطرى ) كانت من التلامذة بتطلع مايعة لأن لو ايقاعها تافى تافى يعنى كروش منقوط ودوبل كروش , عايزكم تدققوا فى تفاعيل ام كلثوم تلاقها مش بتقول التافى محددة يعنى مرة كده ومرة كروش وسكتة دوبل كروش ودوبل كروش , يعنى انا كتبت كده بس ما حبيتش اتفزلك عشان تبقى سهلة عليكم قى التنفيذ
يعنى انت اولا احفظ النغمات كويس واحفظ التقطيع بتاع ام كلثوم يعنى مصر التى فى خاطرى مش غنائية مدلعة عاطفية ولكن عسكرية شوية . واخطر واسوأ عيب بيحصل البريكات اللى فى الكوبليهات لما بيقف الإيقاع يعنى المدرس بيبقى مش فاهم البريك اد ايه والتلميذ مش فاهم حاجة طبعا والبريك بيطول والتلميذ عمره ما بيركب صح على الإيقاع لما يدخل تانى وبتحصل لخبطة واطباق بتتكسر وحاجات كده , فى الاماكن اللى فيها البريك انا كاتبها على الرتم مش عامل بريك لأنها مضبوطة يعنى ما تعملش بريك اابدأ اللحن ماشى زى الفل , وبعدين البريك اللى عملته ام كلثوم لما دخلت على الرتم هى نفسها دخلت دخلة انا ماعجبتنيش يعنى زى ما تركب القطار بعد ما يكون سرعته زادت ومالهاش داعى طبعاً , مع اطيب تحياتى واتمنى تكون رسالتى وصلت عادل صموئيل

[عادل صموئيل]

احبائى
اقدم لتلميذتى المجتهدة انيتا
الجمل الموسيقية الثلاثة الأساسية من موسيقى قضية عم احمد لعمر خيرت
يعنى انا مش بحب اكتب النوع الحديث من الموسيقى لأنى بحس انها تتسمع بس لأن التوزيع بيغطى على اللحن الأساسى اولا وثانياً انك انت بتبقى سامع عشر اصوات وانت بتعزف آلة واحدة فى نفس الوقت يعنى بتعزف صوت واحد منهم واللى بيسمع بيحس اللحن فاضى من غير الزحمة اللى فيه بعكس مثلا لما تعزف اغنية من بتوع زمان ممكن بآلة واحدة تعزف اللحن كله وبتكون مشبع للسامع
وفيه مشكلة خطيرة فى الموسيقى والاغانى الحديثة , فى الأغانى بتاعة الزمن الجميل انا كمدون موسيقى محترف المفروض لما بسمع اللحن اهم شىء اللحن يكون صريح يعنى ايه صريح : يعنى من اول جملة انا لازم احس ان الللحن بياتى او نهاوند مثلا وبسرعة انا لازم احس ان الميزان 4/4 مثلا لأن اول شىء انا بكتب الاميزان والدليل
بعدين الصراحة فى اللحن ان طول ما انا بسمع ابقى سامع ان النغمة دى مى بيمول او سى ناتورال بما لايدع مجال للشك عشان اكتب وانا مستريح , لن الراحة هنا معناها انى اقعد نص ساعة اكتب كوبليه او مثلا صفحة ونص , اما الموسيقى الحديثة والاغانى الحديثة بيبقى اللحن مش صريح يعنى بيراوغ , هنا فى السطر الثالث الجملة بتاعة القانون
هى المفروض انها جملة سهلة جدا جدا لكن هو مشخلعها الشغلعة اللى فيها دى طلعت روحى بس لازم اكتبها لن اللحن كده يعنى ماينفعش اكتبها سادة من غير الشخلعة لأن الناس سمعوها كده , المشكلة اى سامع سى بيمول مثلا اكتبها انتم عارفين ان الكمبيوتر ممن بعد ما اكتب كل مازورة بضغط على المسطرة اسمع المازورة , طبعا بيساعدنى كتير جدا جدا فى الألحان الغربية ( او اللى مافيهاش نغمات شرقية لأن الكمبيوتر مش بيغنى النغمة الشرقية وبعتمد على عينى اكتر انى اراجع النوتة ) المهم ان الكمبيوتر بيغنى اللى انا كتبته اسمع الاقى حاجة تانى ارجع للتسجيل الاقيها سى بيمول ارجع للى كتبته الاقى مش مظبوط , طبعا مفيش عفريت ولا حد عامل لى عمل ومخبيه فى صباع رجل نملة , ولكن عدم الصراحة فى التوزيع الحديث يعنى النغمة الأصلية سى بيمول بجد بيحط تحتها كذا نغمة بتخلى النغمة مش صريحة زى مثلاً فى الألوان فيه لون احمر لو جه عليه ابيض بيبقى بمبى , او ازرق على اصفر يبقى اخضر , المشكلة لو اللون التانى يبقى مش كفاية بيطلع الوان غريبة مالهاش اسم يعنى بتسمع مثلا فستقى او فحلقى او تركواز او شانجاه
دى ممكن تبقى حلوة لما تشترى بلوزة صوف مستورد شيك يعنى ممكن تبقى اناقة , لكن فى الموسيقى انك تشك النغمة دى ايه دى مصيبة يعنى بتطلع جيل اذنه الموسيقية تالفة , يعنى انا شخصيا زمان من 35 سنة سنة كان بيجى لى طالب يقول انا بغنى يا استاذ ممكن تسمعنى الاقيه حلو وفيه كتير حلوين يعنى بيغنى لى حتة عبد الوهاب حتة عبدالحليم وكده ,
طبعا لما بيسمع عبدالوهاب بتبقى النغمات صرريحة يعنى ال سى سى والمى بيمول مى بيمول وبتتربى اذن المستمع على النغمات الصحية , النهاردة لو جه واحد يقول لى نفس الكلام عارفين طبعا حا يغنى لى ايه حاجة لتامر دياب او عمروحسنى ( الأسامى مش تفرق لأن كلهم زى بعض بيتساووا فى الخيابة وماحدش منهم عمل حاجة بقرش يفتكروه بيها بعد ما يموت زى اقل مطرب زمان ) طبعا اللى بيغنى اغنية لتامر طبعا تامر دى بيقول اصلا ال لا بيمول خاسسة يعنى نغماته اصلا مش مضبوطة طبعا اللى حايقلده حا تنقص كمان يعنى بيعلموا الشباب الخيابة بعكس العمالقة كانوا بيعلموا الناس فن , كفاية عليكم كده فاصل ونعود
مع اطيب تحياتى