الطقاطيق والمونولوجات القديمة مكتوبة وروابط لها

**Islam Eidrisha** · #1 26/07/2011, 13h57

226
عجبي على الخدين
صالح أفندي عبد الحي
كلمات : عبد الفتاح عسل
لحن : عزت الجاهلي

عجبي على الخدين بالورد شبكوني
وعشقتهم الاتنين من قلبي وعيوني

جمال وبتشوفه عينيا تحلف بحسنه للأيام
مفيش كده ولا في الدنيا خفه وجمال ولا في الأحلام
واسرح في دنيا ودنيا تانية يغني قلبي وتقول عينيا
وعشقتهم الاتنين وشبكوني
عجبي على الخدين
بالورد شبكوني

ورد الخدود ياما ليالي سهرني ولا نامت عيني
وكل ده كان يحلى لي إكمن حسنه بيرضيني
واسرح في دنيا ودنيا تانيه يغني قلبي وتقول عينيا
وعشقتهم الاتنين وشبكوني
عجبي على الخدين
بالورد شبكوني

قمر جميل نور حواليا قالت له عيني القلب مال
قلت النهاردة فرحة وهنية ما دام يا قلبي حبيت جمال
واسرح في دنيا ودنيا تانيه يغني قلبي وتقول عينيا
وعشقتهم الاتنين وشبكوني
عجبي على الخدين
بالورد شبكوني

الروابط

**Islam Eidrisha** · #2 26/07/2011, 14h45

227
قالوا الجمال ألوان
صالح أفندي عبد الحي

قالوا الجمال ألوان يسبي العيون ويروح
قلت الجمال إنسان يصون هواه بالروح

حبيبي أحن إليه ويحب قربي
أعيش في جنة عنيه ويعيش ف قلبي
غنى الهوى غنوته بين مهجتي ومهجته
راعى وداد حبي وسنين تطول عليا
واللي في روحي وعنيا
هو حبيب قلبي

قلت الجمال معنى ودنيا تجمعنا
نلقاه ف أرواحنا ربيع يمتعنا
لو كنت اهوى الصور طول ما النظر في النظر
وبعدي غير قربي ما كنت لما أميل
ما شوفش عمري جميل
إلا حبيب قلبي

على القلوب مكتوب تعشق جمال الحياة
وجمالها في المعبود اللي الفؤاد يهواه
يا ما بشوف في الكون من كل فن ولون
ولا فيش جمال يسبي واللي الجمال كله
في نوره وف ضله
هو حبيب قلبي

الروابط

**Islam Eidrisha** · #3 01/08/2011, 11h56

اليوم غرة شهر رمضان المعظم
كل عام وأنتم بخير
رمضان كريم
228
وحوي يا وحوي
أحمد عبد القادر

وحوي يا وحوي إياحا رحت يا شعبان
وحوينا الدار جيت يا رمضان
وحوي يا وحوي
إياحا

هل هلالك والبدر اهو بان
يا الله الغفار
شهر مبارك وبقى له زمان
يا الله الغفار
ما احلى نهارك بالخير مليان
وحوي يا وحوي
أياحا

جيت بجمالك سقفوا يا عيال
يا الله الغفار
ما احلى صيامك فيه صحة وعال
يا الله الغفار
نفدي وصالك بالروح والمال
وحوي يا وحوي
أياحا

طول ما نشوفك قلبنا فرحان
يا الله الغفار
في الدار خيرك أشكال والوان
يا الله الغفار
بكرة في عيدك نلبس فستان
وحوي يا وحوي
أياحا

هاتي فانوسك يا اختي يا إحسان
يا الله الغفار
آه يا ننوسك في ليالي رمضان
يا الله الغفار
ماما تبوسك وباباكي كمان
وحوي يا وحوي
أياحا

الروابط
أحمد عبد القادر

**Islam Eidrisha** · #4 02/08/2011, 13h17

229
صيد العصاري يا سمك بني
الست ودودة المنيلاوية

صيد العصاري يا سمك بني
تلعب في المية لعبك يعجبني

يا سمك بني

صيادك ماهر بياعك شاطر

ووجودك نادر محلاك يا بني

يا سمك بني

يا واخد السايح في البحر المالح

عن غيرك بارح يا جميل يا شاغلني

يا سمك بني

شوف حكمة سيدك يعجبني صيدك

محبوبي يريدك خليه يقابلني

جميل يا شاغلني

يا سمك لك نهضة يا لون الفضة

أنا بيتي اتعطر منك يشغلني

يا سمك بني

يا لون اللولي طولك من طولي

ليه تفارق دولي وانا لك مستني

يا سمك بني

تصبح من بدري في المية البحري

تتربي وتجري يالله كلمني

يا سمك بني

لا بلطي يعادلك ولا بوري قدك

يا ما احسن قدك شغلك جنني

يا سمك بني

الروابط
ودودة المنيلاوية

**Islam Eidrisha** · #5 22/08/2011, 11h51

230
الورد ريحته بتنعنش
الست ودودة المنيلاوية

الورد ريحته بتنعنش

وشرابه للجسم يفرفش
أنا احب الورد

الورد من إيدي لإيدك

والزهر والفل عبيدك

وفؤادي بالحق يزيدك

ما يصحش يا جميل ما ترقش

أه أنا احب الورد

يوم شوفته بالعين ورأيته
مع زهر الرمان أنا جيته

على نهد المحبوب ضميته

ولعبنا وقعدنا نهبش

آه أنا احب الورد

هالله هالله يا ست ودودة

وجناته وخدوده تجنن

ودعيته ولقيته حنين
والزهر حين شافه صهين

غيره فى البستان ده محدش
آه أنا احب الورد

محبوبي تشبه له خدوده

يا ما احلى يا ما احسن عوده

قلبي يحب إلا إنه يعوده

ولو ان العزال بتطفش

آه أنا احب الورد

عزالي من حبي في غيرة

وحالتهم يا اخواننا خطيرة

خليهم يا قلبي ف حيرة

واتهنى بحبك ما تردش

آه أنا احب الورد

الروابط
ودودة المنيلاوية

**Islam Eidrisha** · #6 22/08/2011, 12h37

231
ليالي رمضان
الست فتحية أحمد
كلمات : فتحي قورة
لحن : محمود الشريف

ليالي رمضان يا ما احلاها

بعهد جديد قابلناها
تغيب عنا ونستنى
وتصفى الدنيا وياها
ليالي رمضان يا ما احلاها

حداشر شهر في غيابه
نعد اللحظة والثانية
وادي احنا خلاص فرحنا به
ونور نوره ع الدنيا
بتوفي الوعد ويانا .. ليالي رمضان
ونورها الحلو هنانا .. ليالي رمضان
تعالوا نغني في هواها
نعيد الماضي بلقاها
ليالي رمضان يا ما احلاها

الروابط
فتحية أحمد