طلبات نوتة

**عادل صموئيل** · #1 02/07/2011, 18h40

احبائى
اقدم لكم نوتة من التقيل المتوسط
من روائع عبد الوهاب ونجاة الصغيرة
القريب منك بعيد

هنا فيه ملحوظة فى السطر الثانى يوجد سبعية ( يعنى 7 دوبل كروش فى نوار ) وهى تقسيم شاذ
يعنى طبعا الهواة ممكن يخاافوا من شكلها انا كتبتها مرتين وكتبت ثالث سطر بدون حليات وانتم اعملوه زى ما يريحكم ومشكلة السبعية انها صعبة جدا على اى آلة منفردة ولكن حلوة فى فرقة بحيث ان لما يكون عشر كمنجات واحد يفلت منه المى وواحد يفلت منه الفا فى الآخر حاتتطلع وهى المقصود انها تسمع زى موجة فيضان مش نغمات محددة زى 3 دوبل كروش مثلا يعنى ترررررررررررررررم .
اما الملحوظة الثانية اللى عملها العبقرى عبد الوهاب انه استخدم لازمة الكوبليه 3 مرات ولكن لعب فى توزيع الآلات بحيث اصبحت 3 لزمات مع تحوير فى اداء الصولو وده من عبقرية عبد الوهااب انك ماتسمعش اللازمة مرتين متكرريرن تكرار نقل مسطرة
اتمنى ان تسعدوا بها
مع اطيب تحياتى

**عادل صموئيل** · #2 03/07/2011, 19h04

احبائى

اقدم لكم نوتة من اروع ماغنى عبد الحليم حافظ

انا لك على طول

الاغنية دى لما تسمعها يتهيأ لك انها سهلة

لكن لما جيت ادونها لقيتها اصعب من الصعوبة لكن كعادتى بذلت كل المجهود انى ادونها وتكون سهلة لأن أهم شىء عندى ان يستفيد من النوتة كل اعضاء المنتدى , ومكامن الصعوبة فيها اول شىء طبيعة اللحن نفسه , يعنى مفيش ايقاع , ويتهيألك انه ادليب ولكنه مش ادليب يعنى موزون لكن بطريقة صعبة , يعنى حاجة هى موزونة لكن تشبه الادليب ان الايقاعات مش محددة بدقة , لذا يلزم اهم شىء انك تكون حافظ الاغنية جيداً , ومع النوتة تتأكد من الحروف وتعزفها بروح اللحن اللى انت حافظه , ومن اكتر الحاجات اللى تعبتنى جملة المذهب , انا لك على طول , المفروض فى اى اغنية انها بتتكرر كل مرة نقل مسطرة , يعنى انا ممكن فى التدوين اعمل سينيو او اظللها وانقلها فى المكان المطلوب , لكن فى اللحن ده شىء غريب انها كل ما تتعاد تيجى بشكل مختلف , والمشكلة الاخطر انها من توزيع اندريا رايدر , وهذا الفنان العظيم انا كنت بحب توزيعه لكنه كان الوحيد المستعصى اللى مش ممكن اى حد مها كان يفهم اسلوبه , قلت من قبل انى كنت المسؤول عن قسم النوت الموسيية فى الفرقة الماسية , يعنى كان عندى غرفة فيها دواليب فيها كل شغل الفرقة من يوم ما بدأت , لكن الوحيد اللى ماللقتش له نوت هو توزيعات اندريا رايدر , كان بمثابة العفريت او الشبح بتاعى , يعنى كنت ايام طويلة ابحث فى النوت القديمة مالقتش ولا ورقة ولا سطر حتى , مع انى وجدت كل شفل على اسماعيل وكل الموزعين , ولما عملت تحريات مباحثية ( لأن اندريا رايدر توفى قبل ما التحق بالفرقة الماسية ) اكتشفت انه كان بييجى الاستوديو ومعاه شنطة سودة صغيرة تحت باطه ويوزع الورق على الفرقة , وبمجرد التسجيل ينتهى بسرعة يلم الورق ويحطه فى شنطته ويحطها تحت باطه ويختفى , واى عارف بتبقى قدامه وقته هو بس طبعا , والسر الخفى بيكون اما فى البارتاتورا يعنى الورقة بتاعة المايسترو اللى بيقود منها لن كل الشغل مكتوب فيها تحت بعضه , او انك تجمع كل الورق بتاع كل الآلات وتشوف هنا عامل ايه وهنا عامل ايه , وكاتب للنحاس ازاى وللخشب والوتريات ازاى , لكن البارتاتورا هى اللى فيها السر , يعنى اندريا رايدر كان اعظم موزع عرفته مصر ومع انه كان خواجه اجنبى يعنى لكن كان خبير فى الموسيقى الشرقية , فيه سر خطير فى اللحن ده كمان , انك لما تسمع عشان مفيش ايقاع هو عمله بطريقة الموسيقى الكلاسيكية , واستعان بعازفين اجانب من اللى كانوا فى الاوركسترا السيمفونى , حتى لما تسمع صولو البيانو تلاقى عامل له حاجات كانك بتسمع بيتهوفن او شوبان مش موسيقى شرقية , وكمان سر مهم بيويك عبقرية الملحنين العباقرة , الحركة بتاعة اللحن ده يعنى التوزيع بالطريقة دى , والعازفين الاجانب دول وكان اللحن ده كله فى التسجيل ما يكلفش 150 جنيه ايامها , الملحن الغبى كان عمل خمسين لحن بالطريقة دى , بس فيه مشكلة انه حايبقى فوق مستوى الشعب وكده يسقط , يعنى قمة نجاح اى فنان ايه ؟ انك واى واحد عادى ممكن يدندن الاغنية , واى عازف عادى ممكن يعزفها , لكن لما واحد يعمل الحان معقدة لاحد حايعرف يغنيها ولاحد حايعرف يعزفها , بالتالى مش حيكون موجود فى القاعدة الشعبية , لكن الملحن العبقرى لما يعمل لحن زى ده وبالطريقة دى مرة كل تلات اربع سنين بيعمل شغل , وهنا تأكيد ان العباقرة دول كانوا مش موهوبين فقط ولكن اذكياء جدا , يعنى كل المواهب من غير ذكاء ماتساويش حاجة , بمعنى ممكن فنان 100 % وغبى , وفنان 60 وذكى جدا يعرف يقدم ايه ياكل الجو من الفنان الى 100% وغبى , ختاماً اترككم مع هذا اللحن الجميل , وانا حاليا حبدا فى تدوين اغنية من العيار التقيل جدا جدا مع اطيب تحياتى

**عادل صموئيل** · #3 07/07/2011, 04h47

احبائى

اى دمعة حزن .... لا

16 صفحة

اقدم لكم اغنية من العيار الثقيل جداً , وتتميز او تختلف غيرها انها اتولدت على ايدى من اول حرف فيها
عملنا عليها اكتر من 45 بروفة لتخرج لكم على هذا الشكل , تخيلوا 45 يوم وانا ادونها جعلت اتذكر مع نفسى ذكرياتى الخاصة كل يوم من البروفات قبل البروفة عملت ايه وقابلت مين وبعدها ... لو تلاحظوا ان الفرقة الموسيقية لها نكهة خاصة فى هذه الاغنية ولم تتكرر إلا فى فاتت جنبنا وهى وجود عود كهربائى وكان اسمه المرحوم ابراهيم عشماوى واللى عمل صولو جميل فى المقدمة , وزمان كان اى آلة كهربائية لها امبليفاير حجمه قد حجم الغسالة امام العازف , واعتاد ابرارهيم عشماوى انه بيرب قهوة كتير فى خمسينة وبيحط الفنجان على امبليفاير العود , واذكر مرة ان عشماوى دخل الصولو سريع عبد الحليم قال له انت تشرب قهوتك وتدلع نفسك وتدخل الصولو بطىء , من اهم الذكريات وكما تعرفون كنا بنعمل البروفات فى بيت عبد الحليم , فى السنة دى عملنا اغنيتين , عبد الحليم كان حاسس انه عمره ابتدا فى العد التنازلى وكان عايز يترك للذكرى والتاريخ اكبر عدد من الاغانى , كان معها اغنية فاتت جنبنا لعبد الوهاب , وعبد الوهاب بيمثل لكل الموسيقيين كباراً وصغار الجبل الشامخ واحسن موسيقار بيعمل مقدمة موسيقة , ولا انكر ان بليغ مهما كانت مكانته كان مرعوب لأنه ازاى يعمل اغنية مع اغنية عبد الوهاب والمقارنة مشكلة خطيرة , بليغ كان صاحبى وانا حسيت انه مرعوب , انا كنت بروح بيت عبد الحليم كتير وواخد ادخل كل مكان فيه حتى المطبخ وكنت مصاحب الطباخ ( على فكرة لما تصاحب الطباخ ميزة مهمة ) , المهم كنا بنعمل بروفة فاتت جنبنا من الساعة خمسة ل ستة ونص , ونشرب شاى نص ساعة ونعمل بروفة بليغ , كان بيت عبد الحليم زى بيتى بالضبط يعنى عطشان ادخل افتح الثلاجة واشرب , ومرة دخلت المطبخ اثناء بروفة عبد الوهاب اكتشفت ان بليغ كل يوم ييجى يستخبى فى المطبخ عشان ماحدش غريب يشوفه ويسمع شغل عبد الوهاب , ولأول مرة فى تاريخ بليغ حسيت انه مش مقتنع بأجزاء كتير فى لحنه وابتدا يغير فيه لدرجة ان المقدمة الموسيقة اللى بتسمعوها دى رقم خامسة وبحالها , وكانت تطول وتقصر , مرة عملها سطرين , وحاجة تانية , انا حسيت ان اى دمعة حزن طويلة اكتر من الازم , لكن بليغ عملها يمكن عشان تبقى اكبر من اغنية عبد الوهاب , يعنى فاتت جنبنا تحسها مضغوطة او مش ممكن يتشال منها حاجة , لكن انا لو سابونى ممكن اشيل من اى دمعة حزن اكتر من ثلثها على الاقل , المهم عملنا البروفات على خير , جينا يوم التسجيل , كان تسجيل عبد الحليم بيبقى مش اقل من 18 ساعة , كان مهندس الصوت زكريا عامر بيسمى اليوم ده العكمة , ومعناها بالمصرى يعنى اليوم اللى مش بيخلص بسهولة , يعنى عبد الحليم كان بيفضل يعيد يعنى يبتدى الكوبليه مثلا احنا احنا احنا ... بيعيدها من بعضها ممكن 700 مرة , كان التسجيل على شريط بكرة , طول الشريط نصف ساعة وجنبه ماكينة تانية قبل ما يخلص الشريط الاول بيشغلوا التانى عشان ماتروحش فتفوتة من الاغنية ودى طريقة التسجيل فى الحفلات , لأن اطول شريط فى الإذاعة طوله نصف ساعة , والعجيب ان الشرائط دى مازالت باقية لحد الآن بدون مونتاج لأن من المستحيل ان يتعمل لها مونتاج , لأن الجملة بتاخد وقت طويل والجملة اللى بعدها بتكون بعد ساعة مثلا ,,,,
المهم عشان عبد الحليم مريض وبيتعب واحنا طبعا كبش الفداء كنا بنبتدى نسجل احنا المقدمة الموسيقة , وطبعا كان التسجيل مش تراكات زى دلوقتى , يعنى كل الفرقة والمطرب مع بعض لو حد غلط او حصل اى حاجة نعيد من اول الجزء , كنا بنبتدى نسجل المقدمة من الساعة خمسة مساء ونسجلها مش اقل من 15 مرة كاملة مافيهاش الهوا , وبعد ما نخلص المقدمة نستريح وهم يكلموا عبد الحليم ييجى من البيت , من الحاجات الطريفة واللى طلعت روحنا فى التسجيل , ان عازف المزمار البلدى ما عملش معانا البروفات ولكن بليغ جابه ع التسجيل على طول , وكان مش بيقرا نوتة , وبليغ حفظه الصولو , وابتدينا نسجل وصلنا عند الصولو راح عازف المزمار وكان اسمه محمد خواتم عزف الصولو بتاع اغنية زى الهوا لأن الاتنين شبه بعض , عملنا ستوب ومن الاول كل مرة نيجى عند الصولو يروح عازف اغنية زى الهوا لما روحنا طلعت , كنا حانعمل اعتصام , وبليغ حلها انه خلاه يعزف الصولو عشر مرات لحد ماظبطه , طبعا الحاجات دى عمرها ما بتحصل فى الفرقة الماسية , يعنى عندك مجدى الحينى مش بيقرا نوتة بس عنده ملكة الحفظ يعنى الملحن بيقابله من غيرنا ويحفظه الصولو , بس برضه بتحصل مشكلة خطيرة , بيبقى حافظ الصولو بس مش عارف مكانه فين يروح داخل غلط او متأخر , واحنا نعيد ويتقطع قلبنا .... ياه ده احنا كنا شهداء ...بجد , لكن لما الواحد بيسمع الاغنية بعد كده فى الراديو اكيد بينسى التعب , يعنى انا لو سمعت البرنامج العام فى الإذاعة افتخر انه مش ممكن يمر ساعة ما يذيعوا اغنية او غنيتين انا عزفت فيهم , طبعا بحس بالفخر لأن ده جزء من تاريخ مصر وانا اشتركت فيه , وبشعر بالقرف لما اسمع اللى جم بعدنا يعنى حرام بعد العباقرة دول ييجى ال ..... اللى بيشنفوا اذاننا بالعواء والمواء والصهيل والنهيق , وكان نفسى يعملوا لى تمثال بس المشكلة الميادين كلها مليانة يعنى مفيش مكان يحطوه
والآن اترككم مع اى دمعة حزن , طبعا انا كتبتها بأبسط طريقة ممكنة يعنى طبعا النوتة لتاعة الفرقة الماسية مكانتش سهلة جدا كده , لكن ارجو مراعة السرعات اللى انا كاتبها ودليل المقامات وعلامات التحويل الكتير وربنا معاكم , طبعا بالنسبة لأحبائى المبتدئين ممكن يقلبوا فيها ياخدوا منها جمل سهلة لأنها ككل صعبة جدا طبعا
ومع اطيب تحياتى

**عادل صموئيل** · #4 08/07/2011, 04h34

احبائى
اقدم لكم اغنية
mother

واهديها بناء على طلب من الاخت memahima

الأغنية دى اغنية اطفال رائعة دينية اسلامية مستوحاة من حديث للرسول صلى الله عليه وسلم
بالنسبة لأى مدرس موسيقى فى مدرسة لغات حايتجننوا عليها
هى موجودة هنا من كذا صفحة فاتت لكن رجاء الاخت العزيزة لما تعزفيها التزى بالنوتة بتاعتى دى , لأن فيها سكتات مش عارف ليه بتكسر الايقاع يعنى هى الاول دوختنى مش عارف ميزانها كام لكن لما شلت السكتات اللتى كانت بتطول الموازير من غير حساب اتظبطت
بس عايز منك خدمة لأخواتك الاحباء فى المنتدى ممكن لو سمحتى تنزلى لنا كلماتها عشان زملائك ينفذوها
مع اطيب تحياتى

**عادل صموئيل** · #5 08/07/2011, 22h20

احبائى
اقدم لكم لحن لفريد الاطرش

سألنى الليل

اللحن ده سهل جدا لكن فيه مشكلة الادليب محتاج انك تكون حافظ جدا اللى بيغنيه فريد وتستشهد بالنوتة
ومشكلة فريد انه عشان مطرب قدير بدرجة مش ممكن نقدر نحسبها اد ايه انه فى الادليب وحتى لو الجملة سهلة جدا هو بإقتداره بيحط فيها مقامقات وتفعيلات مش ممكن تتكتب
لذا بيحتاج ان اللى يعزف النوتة او يغنيها يكون بقدر الامكان حافظ اللى قاله فريد
مع اطيب تحياتى

**عادل صموئيل** · #6 13/07/2011, 22h13

احبائى

اقدم لكم نوتة

االبنات البنات

لسعاد حسنى

واللحن ده بيبن اداء سعاد حسنى الفائق

وهات لى اى مطربة دلوقتى تقدر تقوله

اللحن ده فيه ميزة خطيرة

يعنى المفروض لما تكون ممثلة مش مطربة اصلا واللحن المفروض انه كوميدى او على الاقل فيه خفة دم ... الملحن بيعمله سهل اوى , يعنى بيكون اكثر امانا عشان يتنفذ صح بقدر الامكان

وهنا بيبان قدرة سعاد حسنى انه عمل لها لحن انا بعتبرهصعب او على الاقل مش اى حد وخلاص يقدر يغنيه .

فيه حاجة مهمة , انا التدوين بتاعى من مميزاته حاجة , وانا بدون بكون واخد بالى كويس اوى ان مين اللى حايستعمل النوتة , يعنى مرة واحد قال عادل صموئيل ده عامل زى الترزى بيفصل النوتة بالضبط على اللى حايعزفها ممكن يكون موسيقار كبير وممكن يكون تلميذ فى ابتدائى , وانا هنا فى الصفحة التانية بعد ما كتبتها بالسرعة اللى كتبت بيها الصفحة الاولى , بصراحة لقيتها صعبة شوية قمت مسحتها واعدت كتابتها تانى يعنى خليت السرعة 170 واعدت الكتابة خليت الزمن الضعف يعنى النوار تبقى بلانش والدوبل كروش تبقى كروش

شكلها بيبقى اسهل كتير جدا , واللى خلانى عملت كده ان اااااااااالاغنية متسجلة على اورج فقط , وعازف الاورج بيتفزلك فى اللزم وبالذات لما يكون لوحده , يعنى اللزم بتكون فيها رغى كتير وعشان ماتبقاش صعبة دونتها تانى , هى مش صعبة لكن محتاحة تتفصص وهم معظمهم شبه بعض

مع اطيب تحياتى

**وائل علوي** · #7 15/07/2011, 00h01

اخي العزيز عادل
بعد التحية والسلام
اتمنى ان تكون باحسن حال
لي طلب عندك صغير وهو اعادة كتابة نوتة وحياتك يا حبيبي
لسيد مكاوي
النوتة المرفقة جيدة من ناحية المقام و الحروف وهي سليمة بنسبة كبيرة ولكن بها عيبان اساسيان وهما سوء الخط طبعا و سرعتها اعلى بكثير من السرعة الاصلية يعني زمنها ملخبط
عشان كده ان طلبتها من حضرتك وياريت تلبيها اكون شاكرا لك افضالك عليا
اخوك وائل

**عادل صموئيل** · #8 15/07/2011, 09h01

احبائى
يسعدنى ان اقدم لكم نوتة
فاتت جنبنا

والاغنية دى انا اتكلمت عن ظروفها لما قدمت لكم نوتة اى دمعة حزن
لكن فى الحفلة حصل حاجتين من الحاجات اللى مش ممكن تحصل ابداً وتتحفظ فى التاريخ
احنا لما بنكون على المسرح ( وفى الحفلة دى كان مسرح مقام على ملعب نادى الترسانة ) بيكون تحت المسرح مباشرة جهة اليمين فريق الإذاعة بيتكون من المذيع بتاع الراديو وجنبه مهندس صوت معاه ميكسر كبير متصل بكل الميكروفونات اللى على المسرح وبيخرج وصلة لجهاز بيودى لجهاز الارسال ووصلة لعربية التليفزيون اللى بتكون خارج الحفلة وفيها المخرج بتاع التليفزيون ووصلة عن طريق كابل التليفون بتتجه مباشرة لمبنى الاذاعة والتليفزيون , وهناك بيسجلوا الحفلة للطوارىء , غير طبعا من ضمن طاقم الاذاعة مهندس صوت تانى واخد وصلة من الميكسر وقدامه جهازين تسجيل كل جهاز عليه شريط وقبلان نبدأ العزف بديقة بيدور الجهاز الاول بيسجل وقبل ماتخلص البكرة اللى على الجهاز الاول ومدتها 30 دقيقة بيكون شغل الجهاز التانى عشان مايفوتش حرف من الحفلة وفى المونتاج بيكونوا الاغنية من الشرائط دى , بس طبعا الاول بينسخوهم كذا مرة ويتركوا الاصل لأن المونتاج كان بالمقص يعنى الاربع بكرات بيطلع منهم بكرتين , وبمجرد ماتخلص بكرة الجهاز الاول بيشيل الشريط ويحط شريط جديد انتظاراً لقيل ماتخلص بكرة الجهاز التانى بدقائق وهكذا يعنى ممكن الأغنية تاخد 4 شرائط او خمسة حسب طول الاغنية , ودى طريقة التسجيل المتبعة فى الاذاعة عموماً , بقول الكلام ده ليه اولا معلومة يمكن تحبوا تعرفوها ولكن تمهيد للحدث الجلل اللى حقوله , طبعا انا قلت كابلات واجهزة كتير طبعا دى حفلة اذاعة وتليفزيون ع الهواء , لازم بيكون الكهرباء من ماكينة كهرباء خاصة مش من التيار العادى اللى ممكن يتقطع , ولازم تكون فيه ماكينة توليد احتياطية واقفة جنبها لو حصل عطل تتوصل فى ثانية , والكابلات اللى ماشية على الارض بيكون معاها فريق كبير من العمال المساعدين والفنيين بيثبتوها فى الارض عشان ماتتحركش , وبيثبتوها باجهزة خاصة بحيث ان الكابلات تصبح كانها ملزوقة فى الرض لو حد مشى عليها ماياخدهاش فى رجله , اما بالنسبة للفرقة انا قلت انهم على يمين الفرقة ليه ؟ لأن الآلات الكهربائية الاورج والجيتار بتاخد كهربا من عند مهنس الاذاعة مش من اى فيشة وخلاص , المهم حانبتدى , دايما قبل رفع الستارة فيه تقليد بيقولوا نقرأ الفاتحة ومايعادلها عند اخواننا المسيحيين , قرينا الفاتحة واتفتحت الستارة وعبد الحليم قال اللى عايز يقوله وانتم عارفين بيحب يقود الفرقة , ادا اشارة البدء ونزل بإيده المفروض ان اول حرف زى ما انتم عارفين كورد من الجيتار , الجيتار قاعد جنبى عمل الكورد ماطلعش صوت مافيش كهربا , وعلى فكرة لو عندك تسجيل كامل للحفلة تسمع الكورد ده من غير كهربا فى الاول , عارفين يعنى انا وكلنا متعودين ان اشارة البدء بنسمه كورد الجيتار زى القنبلة ماسمعناش حاجة , حصل لنا حاجة شبه سكتة قلبية , يعنى لما تسمع اللحن وشوف فيه شغل جيتار اد ايه بين صولوهات منفردة وصولوهات مشتركة غير ان ليه دور فى الرتم طول الاغنية , قعدنا نص دقيقة مذهولين , يعنى الاغنية باظت , لأن لو اشتغلنا من غير جيتار , مش حاتبقى الفرقة الماسية ولكن تبقى فرقة حسب الله , مش من الناحية الفنية ولكن تخيل حضرتك انك بتعمل بروفات على اللحن ده خمسة واربعين بروفة واتسجل فى يوم كامل وانت طول الوقت بتسمع جنبك شغل الجيتار , لو عزفتها من غير شغل الجيتار حاتحس طول الوقت انك انت غلط او فيه حاجة ناقصة , وكمان مين اللى على المسرح حاينظم مين يقول مطرح الجيتار , طبعا الانظار اتجهت تحت لبتوع الإذاعة , اتارى عامل متخلف شغلته يبقى جنب الاسلاك اللى طالعة المسرح , حبكت قبل رفع الستارة بلحظة انه يجيب كباية شاى وهو داخل خد السلك بتاع الجيتار فى رجله , طبعا ممكن حد ما يقرش الظرف ده ولكن مع عبد الوهاب وعبد الحليم دى تبقى كارثة , ولو عبد الوهاب موجود كان منع غناء اللحن بالطريقة دى , كمان حصلت كارثة تانية , انتم عارفين ان الفرقة الماسية 12 كمان لكن عبد الحليم كان بيجيب عشرين كمنجة تانى من الخارج يعنى شوية من فرقة الموسيقى العربية وفرقة صلاح عرام , ودول كانوا مش ثابتين يعنى مش هم هم كل مرة , هم كانوا شاطرين وحلوين جدا لكن كانوا بيختلفوا عن الفرقة الماسية اننا حافظين عبد الحليم , يعنى عبد الحليم بيعمل مايسترو لكنه طبعا مش مايسترو يعنى شوية هزار على خفة دم يعنى حركاته نصها بينى وبينكم غلط , وكنا مش بناخد على حركاته , يعنى قدامنا النوتة وحافظين اللحن من كتر البروفات , يعنى حتى فى غاتت جنبنا دى عمل حركة فى ايقاع راح واخد مزهر من عازف وقعد يطبل معاهم والعازف جاب مزهر تانى من جنبه على الارض طبعا الحركة دى احنا فوجئنا بيها بس اكيد كان متفق مع عازف المزهر عشان كده جاب معاه مزهر تانى , المهم خلصنا المقدمة والمذهب وجينا نعزف الكوبليه الاول بتاع مرة تانية برضه صدفة , فيه لازمة انتظار ( ومعناها المازورة او اتنين بيتكرروا كتير قبل الغناء مباشرة ) ومالهاش حد معين فى التكرار يعنى ممكن فى النوتة مكتوبى 4 مرات وعبد الحليم وام كلثوم وريد ممكن يخيلك تعزفها 22 مرة لحد ما يبقى جاهز , او يكون بيشاور بإيده نبطء شوية او لحد ما الناس تسكت وتبطل تصفيق
المهم حاجة فنية لما تكون حتعيد الازمة كلها تانى لازم تلتزم بالمكتوب فى النوتة وإلا ..... لكن لما يكون انتظار للغناء عينك وانت بتعيد ع المطرب لأنه حايعمل اشارة انه حايقول , المهم فى الازمة دى بتقول دو مى فا صول
وتتكرر اربع مرات ونعيد الازمة او موسيقى الكوبليه مرة تانية , عبد الحليم طبعا بيهزر جه بعد ماعملنا اتنين من الاربعة قبل مانكمل التانية عمل اشارة إعادة من الاول , وهنا حصلت الكارثة العازفين اللى من الفرقة الماسية بياخدوا عبد الحليم على قد عقله لكن ماليش دعوة بيه انا بشتغل على النوتة , والعازفين الغرب افتكروه مايسترو بجد وراحو عايدين من الاول , وتسمع بقى اطباق بتتكسر وعربيات بتخبط فى بعض , يعنى دى فى اى فرقة بتحصل كتير لكن فى الفرقة الماسية ماتحصلش كل عشرين سنة , كفاية ولا اكمل ؟
كان فيه عادة ايام ام كلثوم ان فى البروفات كل يوم الصحفيين بيحضروا البروفات وبيوصفوها وصف دقيق وكان جريجة الاهرام مفرغة صفحة 3 لبروفة ام كلثوم , زكانوا كل يوم بينشروا كلمات الاغنية بحيث ان الشعب على يوم الحفلة بيكون حفظ الكلمات , ولما توفيت ام كلثوم , انتقل التقليد ده لعبد الحليم , بس حصل حاجة غريبة , ان عبد الوهاب خلا الصحفيين يحضروا البروفة جزء من الوقت واخدوا الكلام ونشروه لكن مانشروش نهاية القصة ,
يعنى واحدة ضحكت امام انتين اصحاب لكن هى بتضحك لمين فيهم والراجل اتجنن ياولداه هى بتضحك ليه ولا لصاحبة , وكان ده السر اللى كان الناس مترقبينه قبل الحفلة , ولو تلاحظوا انه لما قال بضحك لك يا اسمرانى الشعب اتنطط , وباين الصوت اوى , كل واحد حس انه طرف فى القصة والبنت بتضحك له هو ,
ودى من العبقريات بتاعة عبد الوهاب انه لازم فى كل اغنية يحط شىء او عفريت بحيث ماتبقاش تقليدية , يعنى لو الناس علافت النهاية قبل الحفلة اكيد مش حايوصلوا للترقب اللى خلاهم اتجننوا , يعنى الذكاء بتاع عبد الوهاب
حس انها لماتكون اغنية عاطفية انت بتتمتع بحلاوة الكلام , لكن لما تكون قصة من النوعية دى اكدي حايشدك تعرف ايه النهاية , انا آسف للإطالة ولكن الذكريات بتحكم , وبجد لو الايام دى حسيت ان حاييجى فى يوم وكل الناس دى تموت وافضل انا اتكلم عنهم , لكنت سجلت كل لحظة وكل ثانية لأن كل لحظة كان فيها عبقرية لن تتكرر .... الله يرحمهم
وآسف على الإطالة مع اطيبب تحياتى

**عادل صموئيل** · #9 16/07/2011, 22h36

احبائى
بمناسبة قرب حلول شهر رمضان المبارك
اتقدم لكم بأطيب التهانى والتمنيات لكل اخوتى الاحباء فى الامة العربية والإسلامية
واقدم لكم

اهه جه ياولاد

هى سهلة جدا لكن يلزم فى تنفيذها وجود 3 مجموعات يعنى اللحن بيغنيه الثلاثى المرح وكورال رجال وكورال اطفال
وعشان يطلع بنفس الدرجة لازم تكون انت ال 3 مجموعات
مع اطيب تحياتى

**عادل صموئيل** · #10 25/07/2011, 17h32

احبائى
اقدم لكم نوتة
من حبى فيك يا جارى
لحورية حسن
ودى مطربة قديمة قديرة يعنى تجمع كل البنات اللى بيغنوا دلوقتى , وبعدين تحطهم فى الخلاط , بعدين تضربهم فى قلب بعض , بعدين كل الناتج يساوى واحد على مليون من حورية حسن مع انها ما اخدتش شهرة واحد على الف من الشهرة اللى اخدتها اى واحدةمنهم
بس ماتنساش بعد ما تنزلهم من الخلاط تولع فيهم
مع اطيب تحياتى