الطقاطيق والمونولوجات القديمة مكتوبة وروابط لها

**Islam Eidrisha** · #1 06/06/2011, 12h41

194
لحن الخطابين
تعا قول لي يا شيخ قندوفلي
الشيخ سيد درويش

تعا قول لي يا شيخ قندوفلي

لحسن عقلي بقى ترلاللي

النحل يا هوه ..

إيش تعمل ده الحال طول

أوعى تقول قف ده فلفل

قحو قحو ..

ده ما ليش بقشيش
سفلقة ولا فيش

وجواز وطلاق
راح كله فنيش

الخطابين يا مسلمين
متنيلين متخوزقين

سلقط ملقط يا شيخ بهلول

ما احناش لاقيين حق المنزول

شباننا في الايام دي محفلطين

ومقلوظين ومزبلحين

بيعشقم بعضيهم
ضربة تجيهم في كلاوهيم

آمين آمين

لابسين عياقات مش بنطلونات

دي شمازيتات حاطين وردات

ياحكومة بحق العيش والملح

أهو دول لازم ينطسوا عقاب

يرافقوا لهم نسوان قبحات

لايقولوا هباب ولا كتب كتاب

الناس دلوقتي خربت ذمتها

وبقت كاوتش .. السلعو

يطلقوا النسوان ستين طلقة

ويقولوا معلهش .. يا شيخ ولو

لا بيعرفوا شرع ونصب ورفع

وعيشة مرع وبامية وقرع

نازلين لهيط في قرنبيط

ويقولوا ف أخر الزمر طيط

يامصري قوم يكفاك ظريط

بحق يا حتة عبيط

بشواتنا وبهواتنا
بيجوزوا افرنجيات .. قحم قحم

واحنا نعقد لهم ألا مودة
بالسبع لغات .. شرم برم

كومسيه كومساه أن دي ترواه
البيلي بيلي باه الله الله

إشفع إركع حلم كلم
صعفص هات فص

ياشيخ قبقاب

بلا خطابين بلا دياولو

يا الله نشعر ف ابو زيد ودياب

كومسيه كومساه أن دي ترواه
البيلي بيلي باه الله الله

الروابط

**Islam Eidrisha** · #2 06/06/2011, 13h04

195
لحن العربجية
أوعى يمينك .. أوعى شمالك
الشيخ سيد درويش

أوعى يمينك أوعى شمالك

أوعى الأزمة توقف حالك

أوعى وشك أوعى ضهرك

أوعى فوقك أوعى تحتك

أوعى لجيبك م الحرامية

واوعى لروحك م الحانوتية

أوعى الكوكايين يلحس مخك

أوعي م الموج ألا يطسك

أوعى م الروماتيزم ف رجلك

أوعى الجوزة تطير عقلك

يمينك شمالك أوعى

يا اللي ماشية خطوة خطوة

طالعة فيها عاملة حلوة

غطي إيدك غطي رجلك

غطي وشك غطي صدرك

إوعك تترقصي ف السكة

إوعي تقولي لي ألا فرانكة

إوعي تتغمزي بعنيكي

والناس ملمومين حواليكي

الراجل لو بصبص ليكي

إيه ذنبه دة الحق عليكي

يمينك شمالك أوعى

وردة وردة وردة وردة

يا افندي حودة حودة

يا الله وسع بلاش زحمة

إسمع اسمع مني كلمة

إن كنت صحيح بدك تخدم

مصر ام الدنيا وتتقدم

لا تقول نصراني ولا مسلم

ولا يهودي يا شيخ اتعلم

اللي أوطانهم تجمعهم

عمر الأديان ماتفرقهم

يمينك شمالك أوعى

الروابط

**Islam Eidrisha** · #3 06/06/2011, 13h51

196
لحن الصعايدة
يا ولد عمي يا بوووي
الشيخ سيد درويش

أسطوانات ميشيان
لحن الصعايدة
الشيخ سيد درويش

يا ولد عمي .. يا بوووي
هات البازابورت ويا الله بنا
يا اسماعيل لا الوجت يفوت
غربة إيه دي مصر أولى بنا
بعدها ما بيحلى لنا الجوت
عهد الله وعهد الأنبيا
ما نقوتهاش ولا بالنبوت
هي السمكة تفوت الميا؟!
ده احنا من غير مصر نموت
يا ولد عمي .. يا بوووي

لفينا لما استكفينا
من جرجة لمالطة لمدراس
والله بركة اللي استعفينا
وخلصنا من وجع الراس
كل بلد أفقر م التانية
وحياة سيدك أبو العباس
لولا انت يا مصري في الدنيا
ما كنا نلاجي ولاد ناس
يا ولد عمي .. يا بوووي

ست سنين فايتين أولادنا
دوجنا الويل في أكل العيش
و ادي احنا راجعين لبلادنا
لو حكمت نلبس في الجيش
بعد ما كان الافرنجي بيرمح باه
والمصري بيزحف بشويش
حبة ف حبة بجينا سجوريا
وصاحبنا لا فيش ولا عليش
يا ولد عمي .. يا بوووي

الله لو كانوا الأغنيا
يتلموا ويمضوا لنا شيكات
والنبي تو ما عجدوا النية
تتفرج ع الفوريكات
وتعيش مصر ف عيشة هنية
دولة وتحكم ممتلكات
ما دام في قلوبهم حنية
ع الفجرا تحل البركات
يا ولد عمي .. يا بوووي
يا ولد عمي .. الحجني يا بوووي

الروابط

**Islam Eidrisha** · #4 06/06/2011, 14h29

197
لحن الرشايدة
إوعك تصدقي
الشيخ سيد درويش

إوعك تصدقي إنك رايحة تلاقي
رشيدي حبشتقي زي محسوبك
ولو أني تقي ومن ضهر تقي
لكن حبرتقي فللي على ذوقك
ما تقربي عليا يوه اتلم شوية
ما اقدرش يا عنيا ع الحندقة دية
قال المزيكاتي عن لسان الحاتي
في غزل البنات القول الآتي
ما أحلى التلاقي عند من يلاقي
دهن في العتاقي بين الحموات

يا أم حسين جيف مي Give me بوستين
يا قرة عيني سيلفو بليه S'il vous plaît يا بطة
انتي يا قطقوطة أحلى من القوطة
شفتك المظبوطة ياما نفسي في لهطة لييهههط
يا اختي على بطتهم ده انا اموت في قيافتهم
يا حلاوة هيئتهم زي الطبلية
ما هذي اللطافة يا ذات الخفافة
مدعوقة الكنافة جنبك انتي
فيهم إيه يتعيب ده انا جسمي اتسيب
ما يكيفنا طيب يا اختي غير دوله
ضحكة ديليكاتي روحنا سبعة سباتي
أيتها الحموات ما ترقوا شوية

الروابط