يبني خنگو كل ضواي
وذبحو بصينيتي شمعه
ووجهك ال يضحك ييمه
مغنتب ومابيه لمعه
والگمر شد نگله جاي يشيل
ضل بلا ضوه جا شنهي نفعه
والبستان ذاك مصوفر
ومسلول زرعه
والعگارب ينگط ابكل درب سمها
وعدنا محسود التلسعه فرد لسعه
والسلف ياكل لحم موتاه يبني
مالگه الخبزه التشبعه
وذني حلوات السلف باگو كحلهن
والرمد طش وترس كل عين وسعه
عندي ابوك اعمى ضرير
وگد خواتك بگن سبعه
يمه شحجيلك ظلمهم
من اجينا نواجهك مصباح جمعه
ويم سجنهم صارت
اعلينا البنادق يبني فزعه
واحد يحط بعيني ياييمه اصبعه
واحد ايجر شيلة اختك
راسها بشارع يفرعه
واحد يگول ام شيوعي
اطوها دفعه
يمه جلاد السجن ساطوره جايع
گصله من زندك وشبعه
يمه ضل لابس حديدك
لاتمل منه وتنزعه
خل بسمار الدرب نابت بجسمك
لاتمل منه وتشلعه
كون اجيك بنار گلبي
جا حديدك كله اموعه
))الشاعر كاظم اسماعيل كاطع))
رد: الفنان فؤاد سالم
العرض الشجري