البار عمر

**الشيخ الصديق** · #1 14/01/2011, 21h13

بارك الله فيكم اخواني

هل البار عمر نايلي ام لا

من لديه معلومات يفيدها

**rabie_26** · #2 08/02/2011, 10h27

أقدم لكم قصيدة راس المحنة كاملة مكتوبة:

جيت نسالك وانتيا ترد جوابي.......حشمتك بالله كلمني

هذا وطنك ولا جيت براني.......ياراس المحنة لله كلمني

ياذا الراس الباقي في بلاد القفرة.... ندعيك للجواد الخالق القيوم

الباعث الوارث الخالق الايرى.......مادام الدهر والايام ليك تدوم

نزرع فيك الروح وعيدلي كيف جرى........حدثني باللي جازوا عليك هموم

حر انت ولا مملوك حرطان.......يا راس الغربة لله جاوبني

والا انت منسوب للبيت اهل السنة........قلبك طامع في التحرير متهني

والا انت خاين قبضوا عليك خيانة.......باعوك بخيمة ربعين سلطاني

والا مسلم من اصحاب الجنة........والا ظالم من الظلام نصراني

والا انت شاعر معاك اهل القانة........زاهي في جلسة تفسير ومعاني

هذا وطنك والا جيت براني........ ياراس المحنة لله كلمني

طلبك يرعد والخودات في قلالة.......وانتيا متمولك خاطرك هاني

ياذا الراس الفاني غربتك صهدتنا.......يهديك الله كما صار خبرني

تعبد مولاك اوقات في الديانة.......ساجد راكع زاد القاك رباني

والا انتيا خو خرفات كالديوانة.......طاعوك ارواحين الانس والجاني

هذا برك والا جيت براني......يا راس المحنة لله كلمني

لعبت بيك النفس ومشات فالكحلى ........والا من شطرك متابع الفاني

يهديك الله يا ذا الراس عيد علينا.......لن توصل في النوم تشاهدك عيني

والا عندك شي ظلام في ارض خلا......خلفوا منك شيء نغمات درت العيب

كانوا ليك سباب وجاوليك قبالة.......عييت تعافر لا جبرت حبيب

هذا برك والاجيت براني.......يا راس المحنة لله كلمني

اعطى لك مولاك وكان لولا رجلة........عديانك مرهوطة راهبين ارهيب

والا انت مسبب راح رحلك جملة.......كاللي مالو ضاع من العقاب يغيب

والا انت خوجة كتاب عند الدولة.......خطك سايب عند الناس اللي زايغين

والا انت بدعي من صاب للضلالة........مقامك تلقاه في انسان كريب

والا انت وال تنزار من اهل الله.........شايع في الاوطان وطاح بيك طليب

هذا برك والا جيت براني........يا راس المحنة لله كلمني

والا انتيا طالب حافظ كتاب الله.........سافرت تعلم القرءان بالتغريب

استجب واطلب لي فاتحة عند الله.......يجعل لي خالقي فالجنة نصيب

يجعل قبري مع رسول الله......في كون الجنة حذاه طريق

ندعيك للمولى الفرقان بن يا مينة........للي خلقك يا ذا الراس وخلقني

هذا برك والا جيت براني........يا راس المحنة لله كلمني

والا انت خطر وما دريتك انا........ما جبت خبر حتى عشرتك ثاني

قبضك ربي وراك تسال في جبانة........والسابق لحاق مشوم يوناني

شرقي والا غربي ياكثير المحنة.......والا قبلي جيت مسافر الوطن

والا جيت من بين الابعاد مالك قمنة.......والا قاتل روح على اهلك جاني

هذا وطنك والا جيت براني........يا راس الهنى لله جاوبني

والا انتيا كي مولاك مر كالحنة........من قلة واليك جنيت بلعاني

قلت انت ما نصبرش لهذا الهنا.......تمشي في هلك الله وين والاني

الرزق مع الروح انتاج حتى تفنى........حتى يوصل وعد الله يديني

والا قاصد الكعبة مشوق عظمة........ماخليت ذنوبي اذا قبل مولاك

والا تركي من شواش اهل الزدمة........سلطان الديوان اشفى عليك اقفاك

هذا وطنك والا جيت براني......... ياراس المحنة لله جاوبني

والا انت سلطان امير مولى حرمة.......ببلاط وصنادق زاهرين وراك

والا انتيا سارق في ليالي ظلمة........قتلوك الخيان منين جاو القاك

والا انت حقار وما تعمل هنا.......ما تدفع ثمن تقدير ما واتاك

والا انت نجار وكان لي حكمة........ما تقطع في الحطب غير مانواك

والا انت عطار حوايجك ملمومة.......مرجان وحرار والحود دواك

هذا برك والا جيت براني........يا راس المحنة لله كلمني

والا انت سيد واك مولى حكمة.......غلبك شي تقليب بقى المال وراك

والا انتيا عراس براح قول مرمة.......وتفكر الايام يا ماتاك

والا انت حداد من صانعيين الخدمة........تخدم بالهمة مابين منكباك

ياذا الراس الفار في ذا القصرة....... والالة منصوبة والكدر نفال

البوجي وقاد مساك فيه وقارة.......والفصحة تهدر شي على مغناك

هذا برك والا جيت براني.......يا راس المحنة لله كلمني

ياذا الراس الفاني كان ذكرة جمرة.......بعد الحمى والمصران زيد عظام

ما ذامت مولاتك زايخة مشهورة........سقدوا عودك راجع شيع مال ريام

ما غشاتك في غلطة جات الخيرة.....ماهزالتك شي خزرة في حضرة

ما دخلتيشي في تعيان كما نرى........ما شداتك شي بعثان من التمراض

مالك جا فوزك يطول في نوارة.......ما صابت جحدة مكشوف وحداني

هذا برك والا جيت براني......ياراس المحنة لله جاوبني

ما تلعبشي دوروراها تبانة.......تنسى في كرشة مردوم وتعاني

مال جدك تحر من هذه توخر منا.......ذوك ارجال اللوم رمادهم مبني

اهلك جيوش العاصفة العسة زينة......يخرجوا في يوم الخيط عيناني

اهلك حيلى زور اولاد ذوك خشانة......ننعت لك مرة للشيخ قراني

والا طولى زيد اوفات لك مولانا.......تصبر للقضا طفلات سلطاني

هذا برك والا جيت براني......يا راس المحنة لله جاوبني

تقلع ظيم المغبونين والشنقانة........وتكسي الايتام خصا لتك ثاني

انزل حوس عليه وفات من ولفانا.......كما تبدو مالك روح ناداني

والا كنت بن شسبر من ورانا.......وعلى وجه رسول الله بالتخيار

توصل قبرك في سدج حورية.......ذاك الزين نهار القنا ما صار

هذا خورج الخبزين ذاك الدنيا.......خلقوا من كون الجنة لنا فخار

هذا برك والا جيت براني ........يا طريق المحنة لله جاوبني

والا انت مجاهد في بلاد القفرة.......وعلى وجه الله بالتخيار

والا يهودي خارج من الملة.......لا يورني وجهك حتى ليوم العار

يا هذا مازال خو شركة مقفية......تخلد في سكار نار كيما صار

والا انت عالم وفاهم الشرعية.......تعرف حق الله ولا تدير العار

والا كنت تطرد في الجموع قوية.......هذا يشق ذاك يسلك في الاشعار

هذا برك والا جيت براني........يا طريق المحنة لله جاوبني

والا دلاك لكل بيت في الهاوية........لا تحشم من الملح ولا حد الجار

والا مولى رزق متابع الدونية.......وامساك الزكاة ومالك الاعشار

والا كنت تكري مع العراية.......يا ويحك في يوم الشوم والقرار

والا انتيا تاجرمحتا برك مفلس.......ما نفعك ذا المال ولا نتاع مولاك

درت الدين على اولادك جيت تخلص.......كذا من مشحاح ولى المال وراه

والا طالب زور وانتيا رايك ناقص....... واللي راضي واش ادى خبار دواه

هذا برك والا جيت براني.......يا طريق المحنة لله كلمني

والا كنت انتيا في بلدك رايس.......خاطرك شاع في ناسك ما شفت شناه

بن مرزوق الجاه نعيدلك ذا المحنة.......وانطق لي بجواب حزين حدثني

جده بن مصر متربي في قسنطينة........يسمى سيدي المختار بن هني

يمه فوق جبل الاوراس ماها يغنى.......ضوها بالازراب عضاه توحشني

هذا برك والا جيت براني.......يا راس المحنة لله جاوبني

انا اسمي الهاشمي بنونة..........مولى حكمة ذاك كبير طوقني

جيت مكبب قاصد المدينة.......اوصلنا لجدة صدوا وخلوني

اتلاقيت انا بن راكد وتفارقنا.......خرجوا عني ذا الغربان قتلوني

اطيشت وبقيت في الارض العريانة.......حتى جاو اصحاب الخير دفنوني

عاشرت بقبري وسافرت في مياه سنة.........حين احمى الامواج خسار جرجرني

هذا برك والا جيت براني.......يا راس الهنا لله كلمني

ثلاث سنين عقاب وانا يا في الهنا........كي بقى لي مكتوب يلحقني

يلحقني مكتوب اللي مقدر لنا........حتى نوصل في يد امراة وتحرقني

نرفد ذاك الراس وقال نديه انا....... في طوع الله ندير فيه الخير

حطوا في صندوق وقال يا فطانة.......رافدته امراته ومشات في تغيير

راسلها متمكن تضحك عجلانة.......وطعنها تخميمة في الحظير

هذا برك والا جيت براني.......ياطريق المحنة لله كلمني

اداته لعجوزة خاينة كهانة.........قالت لها يا بالك واش راه يصير

هذي بكري كانت زوجته.......واتفكر ها منين كان صغير

وشرطت لها قلبه حاظي معنى.......شعلت في جوفه يجهاد نار تطير

احرقيه وما كان غير انت مغبونة........وارماتو تديه الريح فوق الطير

هذا برك والا جيت براني....... يا راس المحنة لله كلمني

اغفر يا رب للراس واغفر لنا........وارحم بن مرزوق العطشان غريب

الصلاة على الرسول طير الجنة........صلى الله عليك الفين بالمثني

كي ترجوه يوم الصهدات يشفع فينا........والحربة اللي بيه يمنعني

اغفر يارب للحاضر واللي سمعنا........اغفر اذا دخلوا في ابواب الخير

هذا برك والا جيت براني.......يا راس المحنة لله كلمني

**ader74** · #3 19/04/2011, 00h55

اقتباس:

المشاركة الأصلية كتبت بواسطة الشيخ الصديق

بارك الله فيكم اخواني

هل البار عمر نايلي ام لا

من لديه معلومات يفيدها

السلام عليكم ورحمة الله وبراكاته

اخي البار عمر ليس نايلي وانما من ناحية اولاد جلال ولاية بسكرة

**شاعر الزيبان** · #4 03/09/2019, 01h32

اقتباس:

المشاركة الأصلية كتبت بواسطة ader74

السلام عليكم ورحمة الله وبراكاته

اخي البار عمر ليس نايلي وانما من ناحية اولاد جلال ولاية بسكرة

.....
البار عمر من عرش اولاد ساسي التابع لبلدية راس الميعاد ولاية بسكرة وعرش اولاد ساسي فرع من اولاد نايل ...

**شاعر الزيبان** · #5 16/07/2020, 19h40

ونتمتى من بلدية اولاد ساسي ، رأس الميعاد حاليا ،احياء ذكرى وفاته باقامة مهرجان بحجم البار عمر ...

**ader74** · #6 12/05/2021, 22h05

اقتباس:

المشاركة الأصلية كتبت بواسطة شاعر الزيبان

.....
البار عمر من عرش اولاد ساسي التابع لبلدية راس الميعاد ولاية بسكرة وعرش اولاد ساسي فرع من اولاد نايل ...

السلام عليكم ، يا اخي انا ابنه و اهل مكة اذرى بشعابها . الوالد رحمه الله و موتى المسلمين ، مولود في ٢٣١ـ١٢ـ١٩٢٣باولاد جلال ولاية بسكرة.