الطقاطيق والمونولوجات القديمة مكتوبة وروابط لها - الصفحة 7

**Islam Eidrisha** · #61 13/01/2011, 13h39

50
أسمر ملك روحي
السلطانة منيرة المهدية
(نسخة البيضافون)
لحن : محمد علي لعبة

أسمر ملك روحي
يا حبيبي
تعالى بالعجل

مسافر على
فين
وواخد مهجتي
يا حبيبي وياك

رايح على
فين
وواخد مهجتي
يا ضنايا وياك

لو كنت تعلم
بقلبي لاخدتني
يا حبيبي وياك

والله ان سلتك
عيوني قلبي لم
يا حبيبي يسلاك

يا نور عيني
اسم الله
تعالى بالعجل

الروابط

**Islam Eidrisha** · #62 13/01/2011, 14h31

51
الواد ده ماله ومالي
الأسطى بهية المحلاوية
بيضافون كوبانية
الله هالله يا ست بهية يا محلاوية ياروحي
يا عيني ياسي توفيق

الواد ده ماله ومالي يا عين
الواد ده ماله ومالي بس

عزالي ظلموني
وأهلي تركوني
علشانك يا عيوني
وانت ما ترحمني

بيفوت يشغلني
محبوبي يجنني
من وصله يحرمني
علشان ما احبه انا

الواد ده ماله ومالي يا عين
الواد ده شاغل بالي ازاي؟

يا عيني ياسي ابراهيم يا سهلون يا روحي
يا تخت الملوك يا روحي

الروابط
بهية المحلاوية

**Islam Eidrisha** · #63 15/01/2011, 14h44

52
حود من هنا تعالى عندنا
زكي أفندي مراد

حود من هنا تعالى عندنا
أنا وانت نحب بعضنا
جانا الفرح زال الترح
صدري انشرح إنت أنستنا

أنا أهواك وروحي فداك
وانا ما انساك لو طال بعدنا
إنت الحبيب اطفي اللهيب
ربي المجيب جمع شملنا

جود بالوصال يا حلو الخصال
كيد العزال وتعالى عندنا
مسي للسهر زدت في الفكر
وقلت يا قمر نور عندنا

يا حلو القوام بعدك حرام
ونملى المدام إنت وحشتنا
شوف يا غزال من كتر الدلال
صبحت خيال وحياة ربنا

حود من هنا تعالى عندنا
يالله انا وانت نحب بعضنا
جانا الفرح زال الترح
صدري انشرح إنت أنستنا

الروابط

#64 15/01/2011, 21h16

الف شكر استاذ إسلام على المجهود الكبير في كتابة الطقاطيق والمونولوجات , وأرجو تعديل الخطأ الحاصل في اسم ملحن أسمر ملك روحي من محمد علي علبه إلى لعبه وشكرا .

**Islam Eidrisha** · #65 16/01/2011, 08h49

بل أنت السباق دائما بالجهد والنوادر يا أبو حمد يا كريم
تم التصحيح وكل الشكر والتقدير على المتابعة الدقيقة

**Islam Eidrisha** · #66 16/01/2011, 09h07

53
بلاش مناهدة طاوعيني
عبد اللطيف أفندي البنا
كروان مصر

بلاش مناهدة طاوعيني
إيه تاخدي لما تلاوعيني؟
بلاش مناهدة

من بعد حبك يا ضنايا
حللت بيعي وشرايا
سايسي أمورك ويايا
إن كنتي عايزة تعاشريني
بلاش مناهدة

ياريتني طاوعت قرايبي
ولا كنت سلمتك قلبي
تشحططيني وانا إيه ذنبي
وف نار عنادك تكويني

يخلصك كتر نواحي
واسهر وإنتي ترتاحي
وافضل كده سكران صاحي
وبنار عنادك تكويني
بلاش مناهدة

مين اللي قساكي عليا
هو ده شرط المدادية
ده انتي بقى بستين نية
وكم سنة بتحاوريني
بلاش مناهدة

يا روحي يا سي عبد اللطيف يا بنا
اه يا سي محمد افندي يا عمر
يا سلام يا سي سامي أفندي يا شوا

الروابط

**Islam Eidrisha** · #67 16/01/2011, 10h03

54
راحت السكرة وجات الفكرة
عبد اللطيف أفندي البنا
بلبل الشرق

راحت السكرة وجات الفكرة
أسباب غرامي أصلها نظرة

الحب كواني البعد ضناني
هانني زماني ما فرحت مرة

ملكتي فؤادي أوعي ودادي
إنتي مرادي يا حلوة يا بطة

ليلي نهاري أهاتي من ناري
سمعني جاري بكي من برة
مسكين يابني

يا هووو اعذروني يا ناس فيدوني
ليه تلوموني دي نارهم حارة

إن شالله يا لايم تصبح هايم
والحب آلم قلبي له جمرة

حلوة جميلة عنيها كحيلة
بس بخيلة نخيلة ونظرة

الروابط

**Islam Eidrisha** · #68 16/01/2011, 10h31

55
البلبل جاني يترجاني
عبد اللطيف أفندي البنا
كروان مصر

البلبل جاني يترجاني
إني ارجع لحبيبي تاني
غني لي واطرب يا حمام

زعلني وزعلت معاه
وانا قلبي مشغول بهواه
مش ممكن أبدا أسلاه
لو طالت بينا الأيام

قابلني محلصشي عتاب
والبلبل سيبنا وغاب
وقعدنا وبكل أداب
وبكينا وضحكنا قوام

يا بختي هو اللي بعتلي
صالحني والدنيا صفت لي
وعزولي كان غرضه قتلي
ولكنه ما نالشي مرامه

نده لي وجلس ف قبالي
قدم لي المدام وملا لي
وقال لي اتمتع بجمالي
الليلة ولا في الأحلام

الروابط

**MUNIR MUNIRG** · #69 16/01/2011, 10h57

شكرا جزيلا أستاذ إســـلام على هذا المجهود الجبار في جمع هذه الدرر لقيمتها التاريخيه لتدوين مرحله هامه في تطوركلمات من بعض ما غناه روادنا.
وياريت لو تكرمت أنت أو أحد ألأعضاء فى تجميعها (طبعأ بعد ألإنتهاء منها) في PDF FILE

**Islam Eidrisha** · #70 16/01/2011, 11h11

عمي الحبيب منير المنير دائما
شكرا على المتابعة وسعدت جدا أن نال هذا العمل المتواضع شرف القبول لديكم
ما زال أمامنا الكثير للإنتهاء من كتابة نصوص الطقاطيق وأصدقك القول بأن إحداها داومت على استماعها أسبوعا كاملا لمعرفة كلماتها ومنها ما هو محجوز عندي بسبب كلمة أو كلمتين.
شكرا أستاذي وأعدك بعمل ملف بي دي إف بعد كتابة أكبر عدد ممكن من الطقاطيق