الطقاطيق والمونولوجات القديمة مكتوبة وروابط لها

**Islam Eidrisha** · #1 08/01/2011, 07h10

23
انت من هنا .. وانا من هنا
عبد اللطيف أفندي البنا

انت من هنا وانا من هنا
ما دام ما صونتش حبنا
دي عين وصابت يا وعدنا

ما كانش طبعك بالشكل ده
كسرت خاطري وليه كده
شمت فيا كل العدا
وحرمت أهلي تيجي عندنا
دي عين وصابت يا وعدنا

طيرت نومي من العتاب
حلمك عليا ده القلب داب
خليت حياتي ذل وعذاب
الله يعوض صبرنا
دي عين وصابت يا وعدنا

الروابط

**Islam Eidrisha** · #2 08/01/2011, 08h08

24
على عينك يا تاجر
عبد اللطيف أفندي البنا
كروان الشرق

على عينك يا تاجر
أنا خفة أنا دحة أنا حلوة
ومهري غالي يا شاطر

العيون غزلاني تجرح
والنهود رماني تسبي
والخدود تفاح تفرح
الحبيب يجني ويقطف
والعزول يهري وينكت
أهو فلفل أهو شطة أنا بطة
وعلى عينك يا تاجر

الحبيب يشكي ويبكي
والدموع مع ناري تهري
الوصال مطلوب في ظلي
والدلال طبعي ولازم
الحبيب يسكت ويصبر
على ناره على كيفي أده حالي
وعلى عينك يا تاجر

الروابط

**Islam Eidrisha** · #3 08/01/2011, 08h22

25
يا حليلة يا حليلة
أهو وحده جاني الليلة
عبد اللطيف أفندي البنا
بلبل الشرق
هالله هالله يا سيدنا

يا حليلة يا حليلة
أهو وحده جاني الليلة

أبعتله مرسالي
ويقول له يا غزالي
من فضلك تعالى لي
ودواه وانا مالي
قبل المكاتبة من غير مناسبة
أهو وحده جاني الليلة

لما الليل اتمسى
محبوبي جه ومسى
وسهرنا في مؤانسة
وفرح ومجالسة
نساني قربه وفضلت جنبه
واهو وحده جاني الليلة

طول عمره يهواني
وليلتها هناني
وسقيته وسقاني
وزهاني ولهاني
وده مصدق الفجر شقشق
أهو وحده جاني الليلة

عشمني وودعني
وحلف لي يمتعني
من وصله يشبعني
من راح يمنعني
أهنى أزيده روحي في إيده
واهو وحده جاني الليلة
غصبا عنه يا روحي

الروابط

**Islam Eidrisha** · #4 08/01/2011, 08h35

26
بعد العشا
السلطانة منيرة المهدية
ألحان : محمد القصبجي

بعد العشا

يحلى الهزار والفرفشة

يا حلو فاكر وادي القمر

زعلت من غير سبب

انسى اللي فات وتعالى بات

مستنظراك ليلة التلات بعد العشا

تلقى الحكاية موضبة

بإيدي قايدة الكهربا

واقعد معاك على هواك ولا فيش هناك

غيرنا وبلاش كتر الخشا

أوعى تسهيني بقى

واحنا في عز النغنغة

وتمد إيد وهزار يزيد عارفاك أكيد

إيدك تحب الزغزغة

الروابط

**Islam Eidrisha** · #5 08/01/2011, 08h44

27
كلام في سرك
الآنسة نبوية غزال

كلام في سرك ما حد يدرى
ده بابا وافق وماما روخره
كلام في سرك

من يوم ما شوفتك وعرفتك
يا ما جه خطاب
ما اديتش كلمة وفضلتك
وبعت جواب
علشان تلحق تبعت ماما
تعتب تشفع خير في سلامة
ده بابا وافق وماما روخره
كلام في سرك

أول ما هلت يا حلوللي
شفتها حنيت
دخلت اغير على مهلي
في أوضة التواليت
وطلعت لهم زي القمرة
ورمشت لهم أول نظرة
ده بابا وافق وماما روخره
كلام في سرك

الروابط

**Islam Eidrisha** · #6 08/01/2011, 08h53

28
قوم هات لي بدلة
الست نعيمة المصرية

قوم هات لي بدلة لازم تكون
لونها بديع توت عنخ أمون

الله عليها مالهاش مثيل
قوم اشتريها واعمل جميل
موضة جديدة تفصيل جميل
منظرها بهجة ف نور العيون

اضحك واهزر واعمل دلال
والبس وأخطر زي الغزال
ما دام حبيبي جاد بالوصال
فداه حياتي والروح تهون

أنا على كيفي ماليش شريك
وآدي فؤادي ما بين يديك
انت حبيبي انت المليك
انظر وشوف كل الفنون

ألبس واتغندر واطلع معاك
نروح الزمالك نقعد هناك
ناخد معانا ويسكي وكونياك
والحظ كله لازم يكون

الروابط

**Islam Eidrisha** · #7 08/01/2011, 09h12

29
فرغ الهزار ما بقى الا الجد
الست نعيمة المصرية

فرغ الهزار ما بقى الا الجد
وكل شئ يا حبيبي له حد
فرغ الهزار

وعدتني إنك تخطبني
وليل ونهار راح تطلبني
ومن بابا راح تطلبني
قول لي ليلة أقابلك أقول له
مش قادرة عن حبي وذله
فرغ الهزار

أنول مرامي وتنول مرامك
واكيد حسادي وتكيد حسادك
ده الجواز يا حبيبي جنه
اعمل معروف أنا بتمنى
فرغ الهزار

أنا حبيتك حب شريف
لما لقيتك رقة ولطيف
ارحم فؤادي حرام عليك
يالله اخطبني أبوس إيديك
فرغ الهزار

اللي يلومني في غرامي
يارب يدوق ذلي وهيامي
حبيت وهو الحب حرام؟
يكفى بقى كتر الملام
فرغ الهزار

الحب قاسي والله عليا
إيه العمل رق شوية
سلمتك قلبي وروحي
أوعى تثبت فيا نوحي
فرغ الهزار

الروابط

**auditt05** · #8 08/01/2011, 09h12

إسلام بك
هذه مساهمة منك (و طبعا الكتور أنس هيدخل معاك بتقله) للحفاظ على هذا التراث الذى أصبح على وشك الإندثار
عمل رائع أنتظرة على شوق من زمان
ملحوظة - هل عندك كتابى صالحة المصرية و حبيب زيدان, فإن لم يكن فكيف أوصلهم لك

**Islam Eidrisha** · #9 08/01/2011, 16h32

شكرا يا دكتور محمد يا حبيبنا
تشجيعكم ومتابعتكم أكبر حافز على المواصلة والمداومة
وسعادتي لا توصف بأن يلقى العمل قبولا لديكم ولدى كل السميعة
أكيد الدكتور أنس هينزل بتقله بس هو قلقان حبتين من الرقابة

ورجاء من الجميع من لديه تصويب أو إضافة معلومة جديدة أن يدلي بدلوه
وأنا في انتظار الكتاب يا رائد السميعة