ليه خيالك .. وأعمال أخرى

**سمير حسين** · #1 08/08/2010, 18h08

.. تقريبا النهارده عيد ميلادى ..

النهارده بالنسبه ليّـــــــــــــــــا
شىء حصل ومر عـــــــــــادى
ناس كتير زيى النهـــــــــــارده
شايلة الهمـــــــــــــــــــــــــــوم
وعـــــــــــــــــايشين ف وادى
...
وحـــــــــــدى قاعد ف خلوتى
ما بين همومى وشكـــــــــــوتى
لا سمعت مـــــــــــــــــرة رنتى
ولا حــــــــــــــــد قرب ناحيتى
...
سألت نفسى ؟ إيه اللى نــــابك
حزين وتشكى من طول عذابك
يا عم أنسى ... ما الكل ناسى
إن النهارده عيـــــــــــد ميلادك
...

#2 08/08/2010, 22h52

يا سيدي كل سنة وانت طيب واحنا مش ناسيين عيد ميلادك

بس احنا قلنا نتقل عليك شوية

عشان تطلع لنا حاجة جديدة

**سمير حسين** · #3 09/08/2010, 18h51

.. خليك مسامح ..

التـُقل صنعة يا عمنـــــــــــــــا
فاكر زمان أيام ما كنت بتحبنا
وتفوت تسلم وتودنــــــــــــــــا
ولا يوم بعدت عننــــــــــــــــا
...
وكنت شايل همنـــــــــــــــــــا
تسأل علينا وتحبنـــــــــــــــــا
وف لحظة ليــــــه دا كله راح
ولقينا رُحنا لوحدنـــــــــــــــــا
...
إن كنت زعلان مننـــــــــــــا
حقك علينا كلنـــــــــــــــــــــا
خليك كبير ولازم تســــــامح
دا مسيرنا برضه لبعضنـــــا
..

#4 10/08/2010, 03h20

شوف يا عم سمير أي حاجة بتكتبها بأقرأها على طول ومتابعك

واذا احتاج الأمر بتلاقيني وبعدين انا عندي شغل عن شاعر كبير

عقبال ما اضيف شعرك لأشعاره ومش انا اللى متابعك بس فيه عيون تانية بتابعك

وعاملين زووم عليك وانت حر ... خلى بالك .... بعدين تقع .... حتلاقيهم جايين سانين السكاكين

وان تطورت برضه حتلاقيهم جايين بس سانين أسنان الأقلام

كل سنة وانت طيب

**سمير حسين** · #5 10/08/2010, 17h18

.. هلال رمضان ..

هل الهــــــــــــــــلال فى السما
فرح العبـــــــــــــاد فى الأرض
صوت الآذان ملحمــــــــــــــة
كله يقوم للفـَــــــــــــــــــــرض
...
هل الهــــــــــــــــلال فى السما
فرح البشر بضيـــــــــــــــــــاه
وف كل زاوية ومسجــــــــــــد
أصوات تنـــــــــــــــــــادى الله
...
إنصرنا يا ربنــــــــــــــــــــــا
على كل من يعادينـــــــــــــــا
قربنا من بعضنــــــــــــــــــــا
حبب عبادك فينــــــــــــــــــــا
...
أقبل صلاتنا وصومنــــــــــــا
والصدقة والحسنـــــــــــــــات
زيد الإيمان فى قلوبنــــــــــــا
والرحمـــــــــــــــة والبركات
...

يــــــــــــــــــــــــــــــــــــــارب

**سمير حسين** · #6 11/08/2010, 18h51

.. شكرا لكم جميعا ..

عيد الميلاد كان أحلى عيــــــد
وكأنه حالة مولود جـــــــــديد
كل الحبــــايب سألوا وباركوا
وقضيت ف يومهـا أحلى عيد
...
د حسن جاب سيمفونيــــــــــــة
خلطة جميلة عملهم هـــــــــدية
حليم وثومة وكلمـــــــــــة سمير
كان ليها أكبر أثر عليـــــــــــا
...
وعم باشا كلامه حـلـــــــــــــــو
رقيق وأحلى من البغـــــــــاشة
كلم حبايبه علشـــــــــان يجونى
وفى الحقيقة عمل إنتعــــــــاشة
...
مدام عفاف دى حكاية تانيــــــة
عملت لى زينة وورود كتــــيرة
خطوط جميلة وأشكال غريبـــة
رسومات بترقص ف كل ثانيـة
...
عم الريحــــــــانى ده شكل تانى
عمل لى حفلة مجننــــــــــــــانى
ما هو أصل أسمه بالنسبة ليــــا
غالى وهوعــارف معناة كلامى
...
أخونا ماضى ابن الحبــــــــايب
بجد شهم ورمز الرجـــــــــــولة
يارب يرجع كل اللى غـــــــايب
لأرضنـــــــــــــا أرض البطولة
...
الأخت ثومة بنت الســــــــــودان
النيل جمعنا واللون كمـــــــــــان
أنا أصلى منهم ولونى أسمـــــــر
وكأنى فعـــــــــــــــلا م السودان
...
آخر الكلام .. أجمـــــــــل سلام
لصديق جميل وآخـــــــــر تمام
بعت تهانى وأحــــــــــــلى كلام
شكرا جزيلا لأخــــــــويا إسلام
...

**سمير حسين** · #7 12/08/2010, 18h23

.. فكرة ..

فكرة جـــــــــــــــــــديدة
جت على بــــــــــــــالى
من ساعتــــــــــــــــــين
الفكــــــــــــــــــر نادانى
قلت أنا حا أعمــــــــــل
حاجة جــــــــــــــــديدة
علشان بيهــــــــــــــــــا
أسلى صيـــــــــــــــامى
...
عزمت واحـــــــــــــد ع الفطار
كانت معرفتـة إنتحــــــــــــــــار
اللحمة كانت من نصيبـــــــــــه
وسابنى أقزقز ف االخيـــــــــــار
...