ليه خيالك .. وأعمال أخرى

**سمير حسين** · #1 16/06/2010, 21h35

.. عتاب ..

شهرين ولا مــــــرة تكلمنى
قال يعنى عامل مخاصمنى
بتسوق فى دلالك وبتبــــعد
ما هو بُعدك دا اللى مجننى
...
زعلان من حــاجة ؟ فهمنى
دا جفــــــاك وبعادك يألمنى
أبعت مرسال أو حتى عتاب
وبأى طـــــــــــريقة تطمنى
...

#2 17/06/2010, 09h53

الكلام ده حلو وفيه شكل غنائي وكمان معمول على شكل رباعية وفيه جديد بالنسبة للمحتوى

سلام

**سمير حسين** · #3 17/06/2010, 11h45

الأستاذ / الباشا .. تحياتى .. والله أنت الوحيد اللى بترفع من معنوياتى .. بس فيه حاجة غريبة مُش عارف أفسرها وهى إن الخواطر دائما تجينى أول ما أحط رأسى على المخدة عند النوم وأقوم أكتب وعلى فكرة لا أحفظ ما أكتبه وأنساه .. مطلوب من سيادتك تفسير ذلك بحكم أنك تقريبا المُحلل النفسى والفنى لى .. مع خالص تحياتى ...

**سمير حسين** · #4 17/06/2010, 19h36

.. عمال أخس ..

الهدوم وسْعت عليّــــــــا
كل يوم عمــــــــال أخس
طول نهارى وليلى أفــكر
وإنت مالكـــيش أى حّس
....
من زمان أنا كنت حاسس
إنــــــك إنتِ مُش نصيبى
بس لازم تعـــــــــــــــرفى
إنى حبيـــــــتك إنتِ بس
....

**سمير حسين** · #5 18/06/2010, 00h09

.. شكرا د . حسن ..

د . حسن راجل كـــــــــــــريم
طلبت منـــــــــــــــه طلب مهم
غنوة حــــــــــــــلوة لعبد الحليم
رد بلبـــــــــــــــــاقة وبكل ذوق
عرفت إنه راجـــــــــــــل عظيم
....
شكـــــــــرا جزيلا ردك سؤالى
عن غنوة هى ( إحتار خيالى )
موجودة عندك وعشان خاطرنا
أرفع كلامها علشان دى ليهــــا
ذكرى جميلة عايشة فى بـــالى
....

**سمير حسين** · #6 18/06/2010, 19h03

.. الفـــــول ..

اللى واكل الصبح فـــول
من طريقته يبــــان عليه
كل ما يسمع كلامـــــــك
ِيبُص لك فاتح عنيـــــــه
...
وان سألته إزى حـــالك
يمد رجله بدل إيديـــــه
وتلاقيه ممكن يقـــــولك
لو سمحت أنا إسمى إيه
...

**سمير حسين** · #7 19/06/2010, 20h46

.. مُش عارف أنام ..

حالة غريبة عايش فيهــــــــــا
ممكن حد يفهمهـــــــــــــا لى ؟
عندى مخــــــدة جميلة وناعمة
كنت وارثها زمان من خـــالى
...
أول ماجى أنام وألمسهــــــــــا
آلاقى وحى الشعـــــــر نادانى
أقــوم فى الضلمة وأجيب قلمى
وأكتب كل ما ييجى على بالى
...
حاجة غريبة عايز أفهمهـــــا
هى جميلة لكن تعبــــــــــــانى
أفضل صاحى والنــاس نايمة
والأفكار تجــــرى فى دماغى
...
حد يقوللى لوجـــــــــــــــه الله
يعمل إيه لو كان فى مكـــــانى
وأى نصيحة تجيب مفعولهــــا
أشكر اللى كتبهـــــــــا عشانى
...

**محمد رمضان ماضي** · #8 23/06/2010, 14h17

اقتباس:

المشاركة الأصلية كتبت بواسطة samirhosin

الأستاذ / الباشا .. تحياتى .. والله أنت الوحيد اللى بترفع من معنوياتى .. بس فيه حاجة غريبة مُش عارف أفسرها وهى إن الخواطر دائما تجينى أول ما أحط رأسى على المخدة عند النوم وأقوم أكتب وعلى فكرة لا أحفظ ما أكتبه وأنساه .. مطلوب من سيادتك تفسير ذلك بحكم أنك تقريبا المُحلل النفسى والفنى لى .. مع خالص تحياتى ...

بسم الله الرحمن الرحيم
أخي الحبيب سمير وبعد إذن الباشا طبعا ً أرد ،
هذا الموضوع يحتاج إلى بحث من أحد علماء النفس ،
ولكن كل ما أقول هنا ، أن ثمة فرق بين مبدع حقيقي ،
لا يكتب إلا ما يحس ، وبين مقلد أو محترف يمتهن هذا ،
هي لحظة ما بين اليقظة والنوم ، غيبوبة ، يدار شريط الذكريات ، فيكون المؤثر ، فتهبط الفكرة ، لابد ان تدون وإلا ستنسى ، ولن تحفظ ، عزيزي ، كثيرا ما دونت أفكار تحت جنح الظلام ، ولم أذكرها حين أستيقظ ، إلا من خلال ما كتبت ،
أخي ضع الورق والقلم بجوارك وأكتب ، وهب صباحا ً ونقح ما كتبت ، هذا هو الإبداع الحقيقي .كن هاوي خير من محترف ،وكن محترف الصنعة والأدوات، ستصل سريعا ً إلى قلوب الناس.
تحياتي وإلى المزيد من الإبداع.

السلام عليكم ورحمة الله وبركاته.

**سمير حسين** · #9 23/06/2010, 20h33

.. هاجرنى ..

حبيبى هاجــــــــــــــــرنى
بقـــــــــــــــــــــــاله سنين
بيقول مشغــــــــــــــــــول
مشغــــــــــــول مع مين ؟
...
ما يشوف لحكايته نهــــاية
ليه يعمل كـــــــــــده ويايا
مُش قادر أعيش من غيره
وإيه آخرة حبه معايـــــــا
...
راح أسيبك بقى لضميرك
والناس أهى شاهـــدة معايا
إن كان يرضيهم بعـــــــدك
وتزيد فى عذابى وأســــايا
...