طلبات نوتة

**عاصم المنشاوى** · #1 04/06/2010, 05h33

الأصدقاء
صباح الخير عليكم
الاستاذ/احمد ابوعلاء "نور الصباح"...انت اللى جميل ...يانوارتنا...
الاستاذ/عادل بك ...تسلم ايدك يامعلم على "معندكش فكرة"...وهى مجهدة زى كل ألحان حلمى بكر....حضرتك خد بريك بقى...عشان "خلاص مسافر"انشاء الله تكون فى الخطة...وهى الأغنية الوحيدة فى مصر ...اللى المجموعة الكورال بيقول فيها موال ...مش المطرب..
وليد100...انا شفتك امبارح فى المنتدى وماكتبتش حاجة..
الأستاذ/هيثم الصالحى....حمداللاه ع السلامة...وربنا معاكو ياجماعة فى مشاكلكم..

الاصدقاء ...انا منزل لكم أغنية "ساكن قصادى وبحبه"...وهى أغنية "حريمى"...يعنى ماينفعشى يغنيها ألا واحدة ست...لأنه "حسين السيد" هو أصدق من كتب وسجل ودون مشاعر واحاسيس المرأةبصدق كأنه واحده ست....وده تمكن من حسين السيد...لأنه ماحدش من الرجالة بيقدر يفهم الستات ...نادرا...اسمع له برضو أغنية "حبك الجبار"لنجاة وبليغ...حسين السيد أكتر مبدع يقدر يكتب لنا حدوتة...زى الأغنية دى "ساكن قصادى" وزى اغنية "فاتت جنبنا" غنوة فيها حدوتة...
الأغنية تلحين :محمد عبد الوهاب...الذى صال وجال وعمل جو فرح وجو احباط وحزن وموسيقى تصويرية ...لذا كانت من كلاسيكيات الأغنية المصرية...

السؤال دلوقتى ...هل ينفع نسمع اغنية زى دى فى عصر التشات وال SMS والأيميل وغيرها؟؟؟؟؟
طبعا النوتة احد ابداعاتى فى تصويرها وسحبها سكانر وهى للمحترفين فقط ...مش فى سلاسة استاذنا /عادل بك....النوتة تنوين الاستاذ /محمد عاطف خياطة...من حقه علينا أن نذكر اسمه...

**عادل صموئيل** · #2 06/06/2010, 02h25

احبائى
اتحدث اليكم من القاهرة والساعة اآن الخامسة و12 دقيقة صباحا
ويشرفنى ويسعدنى ان اقدم لكم نوتة من العيار التقيل جدا جدا او التقل فى حد ذاته رائعة ام كلثوم والسنباطى
حسيبك للزمن كاملة
طبعا الاغنية دى صعبة جدا مش ممكن حد يتهور ويتطوع ويكتبها لكن انا مشكلتى التحدى
هنا انا عملت شىء اتعقد انى عملت شىء يعنى
لما تسمع الاغنية تلاقى الكتر من 70 % منها ادليب انا كتبت الادليب على ميزان وده اللةى اعتبره مدرسة عادل صموئيل فى الكتابة ولكن بإستثناء ادليب الكوبليه الثانى الذى من المستحيل كتابته على ميزان لأن ازمنته غير قابلة للتقنين
طبعا انا الادليب عندى فى الكتابة لكما اكتبه ادليب اسهل من انى اضعه فى ميزان لأن الوضع فى ميزان بيحتاج منى تفكير طويل فى كل جملة اضعها كيف على ميزان بدون أن افسدها
طبعا كل الكلام ده عشانكم يعنى الجملة الموزونة بالنسبة لكم اسهال كتير من الادليب
وفى هذه اللحظة خطر على بالى الصديق العزيز المرحوم رياض السنباطى وزملائى الاعزاء عازفى فرقة ام كلثوم رحمها الله ورحمهم جميعا كنت اتمنى يكونوا موجودين يشوفوا الانجاز ده لكن البركة فيكم
طبعا الجملة اللى كررتها من قبل لازم تكون حافظ اللحن جيدا قبل البدء عشان الادليب يطلع مضبوط وكما كررت كثيرا مفيش حد ممكن يكتب الادليب بالشعرة لكن ان كتبت بقدر الامكان اللى ماحدش يقدر يكتبه لكن انت لما تكون حافظ اللحن بتقدر تشكل المكتوب عشان يطلع 100%
عايز اقول حاجة اخيرة : لو تواجد 100 شخص من امهر المدونين فى العالم كانوا حيدونوا الادليب ادليب كما سمعوه لكن انا من حصيلة خبرتى مع اساتذتى العمالقة بفكر ازاى استخدم الخبرة فى ابتكار الطرق لتسهيل القراءة
وده لحن من الالحان اللى طبعا تنميت اكتبهم قبل ما اموت
مع اطيب تحياتى واتمنى ان اكون اضفت لكم شىء

**swaifi73** · #3 07/06/2010, 08h05

الأخ والأب العزيز عادل صموئيل والأخوة الأفاضل في المنتدى
أطلب نوتة موشح (يا غريب الدار بأفكاري كم تخطر ليلا ونهار)
لفؤاد عبد المجيد
مع تدوين أسم وميزان الإيقاع (الدرب) المستخدم فيها
وأذا لم يوجد عندك وقت الأن يا استاذ عادل بس أرجو تدوين أسم وميزان الإيقاع المستخدم فيها
ولك ولجميع الأخوة الأفاضل في المنتدى جزيل الشكر والعرفان

الأخ العزيز
اهلا بك فى صفحتنا
بالنسبة للإيقاع انا سألت الاخ العزيز محمد الآلاتى لأنه خبير فى اللايقاع اكتر منى بالذات الإيقاعت الشرقية المعقدة وكان رده الآتى :

إيقاع غريب الدار .. ثمانى الميزان ( 8 / 4 )
ويسمى ( نيم المخمس ) أى نصف المخمس
لأن إيقاع المخمس ميزانه ( 16 / 4 )
وهو يشبه إيقاع المصمودى الكبير
وطبعا ده درس لكل الاعضاء انك تسأل الخبير اكتر فى اى موضوع
مع اطيب تحياتى عادل صموئيل
وان شاء الله النوتة قريبا لكن حنتظر يمكن تكون عند حد من الاخوة الاحباء يوفر علينا الوقت

اشكر المايسترو محمد الآلاتى على تقديم المعلومة القيمة وعلى إضافة الايقاع
مع اطيب تحياتى
ويا بخت الاعضاء بوجود الخبراء
عادل صموئيل

**armendo** · #4 07/06/2010, 08h34

اقتباس:

المشاركة الأصلية كتبت بواسطة swaifi73

الأخ والأب العزيز عادل صموئيل والأخوة الأفاضل في المنتدى
أطلب نوتة موشح (يا غريب الدار بأفكاري كم تخطر ليلا ونهار)
لفؤاد عبد المجيد
مع تدوين أسم وميزان الإيقاع (الدرب) المستخدم فيها
وأذا لم يوجد عندك وقت الأن يا استاذ عادل بس أرجو تدوين أسم وميزان الإيقاع المستخدم فيها
ولك ولجميع الأخوة الأفاضل في المنتدى جزيل الشكر والعرفان

اخى العزيز اذا كنت من هواة اغانى الأستاذ فؤاد عبد المجيد اليك نوتة عجبا لغزال من تدوين الأستاذ عادل ارجو ان تفى بالغرض حتى تعثر على نوتة يا غريب الدار مع تحياتى ....ارمندو

**عادل صموئيل** · #5 07/06/2010, 13h13

احبائى
اقدم لكم نوتة
اكدب عليك كاملة
انا كنت كتبت منها جزء ولكن طلبتوها كلها
مع اطيب تحياتى

**waleed.d** · #6 09/06/2010, 19h36

اقتباس:

المشاركة الأصلية كتبت بواسطة armendo

اخى وليد صباح الخير انا عندى نوتة فى يوم وليلة كاملة وسهلة ولكنى لا اعرف ان كانت هى نفس النوتة التى لديك ام لا اغرجو ان ترفع النوتة التى لديك حتى اقارنها فان كانت مختلفة ساوافيك بالنوتة التى لدىمع تحياتى......ارمندو

مساء الخير اخي ارماندو
ارفع اليك نوتة اغنية في يوم وليلة لوردة (من موقع زرياب) قارنها مع النوتة التي لديك... وشكرا جزيلا .... وليد

**وسام اكرم** · #7 11/06/2010, 17h38

الاستاذ الغالي و الحبيب عادل صموئيل المحترم
تحية طيبة و ارجوا ان تكون بالف خير انشاء الله دوما. يصراحة (معندكش فكرة) كم أخذت نوتة (معندكش فكرة) مني من الوقت في التدقيق و الدراسة و خصوصا المقدمة. الاغنية من الحان بكر حلمي على ما اذكر. الشيء اللطيف حقا في هذه النوتة انها اول نوتة استطيع قرائتها بشكل فوري و قبل تعلم عزفها بشكل سماعي و الفضل يعود للتبسيط المذهل و الدقيق في كتابة و تدوين هذه النوتة. و لكن توجد بعض الملاحظات اللتي تستحق النقاش فيها و بعيدا عن الاطالة اطرح الموضوع على شكل نقاط؛
1- المقدمة تحتوي على 3 مقاطع ايقاعية 3/4 ثم 8/4 و اخيرا 4/4
2- تحنوي النوتة على تغير في السرعة من النوار=120 الى 170
3- الحقيقة يعد الاستماع الى هذه الاغنية و تحديدا المقدمة لاحظت ان هنالك مفارقة طريفة يلفها بعض الغموض, و هي
على طول المقدمة استعملت نوتات ذوا قيم مضاعقة لما استمعته من الاغنية اي انك استعمات النوار بد الكروش, او البلانش بدل النوار. حيث يبدوا واضحا من التسجيل الصوتي المرفق ان سرعة النوتة هي بالضبط نصف سرعة المعزوفة على المسرح؟ و بلغة التدوين الموسيقي انك قمت بتقسيم كل مازورة الى اثنين؟
بصراحة انا لم افهم لماذا قسمت المازورات هل هوا لتسهيل التدوين ام انها فعلا دونت هكذا في الحقيقة؟
سوف اكون في غاية الامتنان و التقدير اذا تعطيني رائيك الكريم بعد الاستماع الى الملف الصوتي و النوتة المرفقة و اللتي اعدت كتابتها من النوتة الاصلية و لك من أطيب الامنيات و ارقها...
المخلص
وسام اكرم
اخى العزيز
انا دائما استعمل قيم مضاعفة واستعمل سرعة اعلى وذلك للتبسيط للهواة والمبتدئين ممكن تكون النوتة الاصليلة مش كده ولكنها للمحترفين يعنى انت لو احضرت اى نوتة من تدوينى ونوتة من تدوين شخص آخر ستلاحظ ان نوتتى شكلها اسهل , يعنى الحترف يعزف النوتة مهما كانت صعبة لكن المبتدىء لو كانت النوتة شكلها صعبة سيبتعد عنها , يعنى لو عندك كتاب فيه خمسين نوتة المبتدىء سيبتعد عن النوت اللى شكلها صعب , وانا ممكن اكتب اللحن بطريقتين يعنى ممكن اعمل سرعة منخفضة يعنى 80 واكتب القيم الزمنية وممكن اعمل السرعة 150 واكتب القيم الزمنية مضاعفة يعنى الدوبل كروش ستصبح كروش والالكروش تصبح نوار وهكذا ولكن فى الحالية الثانية ستكون الكتابة اسهل فى القراءة مع عدم الاخلال طبعا باللحن فى الفرق الموسيقية بيكون موجود مايسترو بيحدد السرعة للفرقة , اما انت فى البيت المفروض ان تكون استمعت للحن جيدا حتى تعرف السرعات الحقيقية وعندما تعزف انت تحدد سرعة كل جملة , هناك ملحوظة مهمة فى الموسيقى الغربية السرعة محددة جدا يعنى لو 120 تكون 120 وغير قابلة للجدل اما فى الموسيقى الشرقية السرعة نسبية يعنى اما لما اكتب 140 مثلا تكون فى الحدود دى ولما اكتب 120 وبعدها 170 يعنى انت تسرع بنفس النسبة , والملحوظ فى الحان حلمى بكر انه بيستعرض شوية يعنى تحويلات مقامية كتير واختلاف سرعات كتير ممكن لأنه كان بيحس ان ه عايز يعمل شىء لأن عبد الوهاب والموجى والسنباطى كانوا مازالوا موجودين
مع اطيب تحياتى عادل صموئيل

الاستاذ القدير و المعلم الكبير عادل صموئيل المحترم
أشكرك جدا على سرعة الرد و التوضيح. سوف ادقق في نوتاتك السابقة عن استعمال نوتات( مضاعفة) ذالك على ما أذكر هذه اول مرة اصادف هذه الطريقة. طبعا الامر يحتاج الى شيء من الوقت, و على أي حال انا في غاية الامتنان ة و التقدير لسرعة ردك و توضيحك الكريم.....
مع أطيب امنياتي
وسام اكرم

**عادل صموئيل** · #8 13/06/2010, 09h47

اقدم للأخ العزيز عزت شحاتى نوتة ترنيمتين من اللى طلبهم
سنين
ما احلى ان نجتمع
بس لى ملحوظة
انت طلبت اربع ترانيم انا كتبت منهم اتنين اما الاتنين التانين واحدة تتسمع بس يعنى اللحن بتاعها مش مفهوم ودى حتى من الصعب ان حد مبتدىء يعزفها والتانية متسجلة فى استوديو على اورج بالطريقة الحديثة يعنى فيها زحمة شوية مش صوت واحد مفهوم ودى من الصعب ان آلة منفردة تعزفها
يعنى انا خبرة مع المحترفين ومع الهواة المفروض ان الهاوى يعزف موسيقى تكون مبسطة ومفهومة يعنى الترنيمة تكون قصيرة مقطع وبيتعاد عشان الطالب مياخدش وقت كتير فى تنفيذها وعلى ىخر الصيف يكون حفظ عدد كبير يبقى اسمه طلع بحاجة لكن لما يعزف حاجات طويلة وصعبة ممكن يقعد طول الصيف يخبط فى لحن واحد وممكن ما يخلصوش يبقى ما استفادش حاجة
مع اطيب تحياتى

**armendo** · #9 13/06/2010, 19h52

اقتباس:

المشاركة الأصلية كتبت بواسطة وليد100

السلام عليكم جميعا . هذا الموقع مفيد جدا وممتع وجزا الله كل المشاركين فيه كل الخير وتحيه لجميع الاصدقاء هنا بس انا عندي طلب وهو ابحث عن النوته الموسيقيه لرائعه بليغ حمدي سلامات ياحبايب والتي غناها الاستاذ محرم فؤاد واتمني الحصول عليها وانا اسمي وليد مصري اعيش بالخارج وهذه الاغنيه تثير كثير من الاشجان عندي واخيرا وفقكم الله جميعا واتمني لكم كل الخير.

اخى وليد احساسى بمشاعرك تجاة بلدنا الحبيب مصر وانت فى الغربة جعلنى ابحث عن اغنية سلامات يا حبايب حتى وجدت النوتة الخاصة بها وهى على ما اعتقد مكتوبة بخط يد بليغ حمدى وهى نوتة سهلة ولكن تحتاج الى التدقيق الجيد وارجو ان تسعد بها وربنا يعينك على الغربة مع تحياتى.....ارمندو

**عادل صموئيل** · #10 14/06/2010, 11h06

احبائى اقدم لك رائعة ام كلثوم
انساك
اتمنى ان تعجبكم وان يستفيد منها اكبر عدد ممكن منكم
مع اطيب تحياتى