أشعرُ بتقصيري معهُ :
**
سَيِّد مَكَّاوِي
الميلاد : 8 مايو 1927 م
الرحيل : 21 أبريل 1997 م
***
" الليلة الكبيرة يا عمّي " ... يا سيّد مَكَّاوي
" والعالم كتيرة " بتمشي ... ف بستان الغناوي
يا عاشق ...
قرَّب واسمع ... كلام يداوي
دا الكلّ جايّ بيغنّي ... " م الريف والبنادر "
" دي الليلة الكبيرة يا عمي " ... والكلّ غاوي
***
" الليلة الكبيرة " يا عيني ... على الشقاوة
والصورة لما بتتحَّرك ... بسِّ بهداوة
وكأنّك شايف بقلبك ... مصر الجميلة
مرسومة بالكلمة الحلوة ... في الغنوة الأصلية
الغنوة المليانة معاني ... في الرحلة الطويلة
ليالينا منقوشة مشاعر .... آخر حلاوة
يابو قلب بيمشي بإحساسه ... وبنور البصيرة
ويترجم إحساسنا موسيقى ... بين أشجان وغيرة
من " ليلة امبارح " باستَنَّى ...آخرة عِندك أيه ؟
أرسم أحلامي وأتمنَّى ... ليه تتأخَّر ليه ؟!
" ريَّح قلبي معاك " يا حبيبي ... " عَنْدَك شكّ ف أيه ؟! "
ولإمتى كده " يا مسهَّرني " .. ح تسيبني للحيرة ؟!
***
و" الأرض يتتكلِّم عربي " وبألف لسان
وتنادي الشرقي والغربي ... بضمير الإنسان
" الأرض بتتكلِّم عربي " ... بالصوت المسموع
م القلب المليان بجراحه ، غرقان في دموع
يحلف بفلسطين الغالية ... ويبات موجوع
يا أقصى أبدا ما ح ننسى ... مهما يمر زمان
الأرض بتتكلِّم عربي " لما ليوم الدين
وبتطرح أزهار ومحبة وأشجار فدائيين
الفجر المخنوق بالضلمة ... تحت سواد الليل
لازم يوم ح يهل ويطلع ... ولا نرضى له بديل
والدمع المبدور ف قلوبنا ... راح يصبح قناديل
عمر الحق ما ح يضيع أبدا ... وصحابه عايشين
***
غنّي يا شيخ سيّد صحِّينا ... في ليلنا وف نهارنا
احضن عودك واصْرُخ فينا ... حرَّكنا ونوَّرْنا
الغنوة مش كلمة جميلة ... وموسيقى وألحان
ولا حَبِّة أحزان ع الماضي ... مع حِفْنِة أشجان
الغنوة أجراس بتزلزل ... في ضمير الإنسان
الغنوة صوت بيصحَّينا ... لو ننسى يفكرَّنا
قول يا جميل على طول متَّعْنا ... من أجمل ألحان
إعزف على عودك سمَّعْنا ... طعم ليالي زمان
قول واشجينا ... وأَثَّر فينا ... " أوقاتنا ح تحلو "
إِمْلا ليالي العُمر بحالها ... من أنوار رمضان
ـــ
من برنامج " كلماتٌ وعَبَرَات " الذي أكتبُهُ للقناةِ الثقافيّة ، والصورُ من حلقةِ الأولِ من أمس ـ الأربعاء ، 21 أبريل 2010 م ـ وهيَ مُعادة .
رد: بشير عياد مصري حتي النخاع
العرض المتطور
