مشاركات خارج موضوع طلبات النوتة

**armendo** · #1 20/12/2009, 06h20

استاذنا الأستاذ عادل صباح الخير
ارجوك رجاء حارا عندما تقرر تدوين اى اغنية الا تتنتظر ما اذا كانت موجودة بالمنتدى ام لا فما تدونة مختلف تماما عما يدونة الأخرون من حيث الطريقة والأسلوب وايضا من حيث القيمة وانظر الى كم الأستحسان والأمتنان الذى يرد من خلال التعليقات والمشاركات وانا اضم صوتى الى اخوتى الأعزاء الأستاذ نور الصباح والأستاذ وائل وألأستاذ وليد فى طلب اغنية حكاية غرامى للفنان قريد الأطرش وهى من الأغانى القليلة التىاحبها لة وايضا اغنية اول همسة .ولى سؤال يتعلق بفريد الأطرش وهو هل لك تعليق على عدم اختيار ام كلثوم لفريد فى ان يلحن لها وخاصة انة يكاد يكون الوحيد من الكبار الذى لم يلحن لها.
مع شكرى الجزيل
ارمندو

**وائل** · #2 20/12/2009, 12h46

سلام عليكم جميعا
اخي ارمندو انا ايضا بضم صوتي لحضرتك ان ياريت استاذ عادل ميستناش اذا كانت النوتة موجودة في المنتدى او لا وهذا لسببين مهمين وهما ان الي بيقدمو الاستاذ مختلف تماما عن الاخرين يعني الاستاذ بيقدم السهل الممتنع والاخرين الصعب والتعقيد الممتنع والسبب الثاني هو ان انتظار استاذ عادل ده في حد ذاته بيضيع وقت طويل لدرجة اننا بنخاف يكون نسي الطلب واحنا طبعا نفسنا استاذ عادل ينوت لنا كل الاعمال الجميلة من زمن الفن الجميل لكي يضاف هذا المجهود لصفحة اعماله ويظل اسمه خالدا كاول موسيقي يحمل على عاتقه توصيل الفن الجميل للعمالقة الى جميع طبقة الهواة العازفين وهذا عمل ليس سهلا ابدا ويشكر استاذ عادل على اية حال حتى لو كان قدم نوتة وحدة بس يعتبر مساهمة منه لان في زمننا هذا مستحيل تجد احد ينوت لك بدون مقابل لا تجد هذا العطاء الا في مملكة سماعي وبالاخص عند الرجل الطيب عادل صموئيل
وانا ايضا بحب اول همسة وقد طلبتها ايضا منه وللتذكير فقط هذه قائمة طلباتي من استاذ الكل
(الحب اللي كان- حكاية غرامي- ذكريات للسنباطي -كيلو بترا- الكرنك- ياطيور لاسمهان –اول همسة لفريد -مش عوايدك لبليغ- ( وانا عارف انهم كلهم طوال ومن العيار الثقيل بس انا عارف حضرتك دايما بتحب التحدي زي ماعملتمع دارت الايام وهي الاطول على الاطلاق كما قلت حضرتك

**armendo** · #3 21/12/2009, 07h35

عزيزى واستاذنا الأستاذ عادل صباح الخير والسعادة
اشكرك كثيرا على النوتة الجميلة لأغنية البيض الأمارة لعبد الغنى السيد وأشكر الأستاذ نور الصباح على حسن اختيارة لها.ارجوك يا اخى عادل الا تعتذر عن الأطالة فحديثك ممتع وكونك كنت احد العاملين فى المطبخ الفنى يعطى لحديثك مصداقية وقيمة لدى المتلقى ولذلك فانا شخصيا استمتعت والتى لا تخلو من خفة الدم التى تتمتع بها وفيما يخص فريد وام كلثوم فأود ان اعرض عليك ما سمعتة بأذنى فى احدى البرامج فى الأذاعة اللبنانية والتى كانت تستضيف الفنان فريد الأطرش فى السبعينات وقبيل وفاتة واستعرضت معة مقدمة البرنامج حياتة الفنية منذ ان بدأ الى ان غادر مصر فى اواخر الستينات الى ان سألتة السؤال الذى جعلة ينفجر كالبركان وهو لماذا لم تغنى ام كلثوم من الحانك بالرغم من انها غنت لكل الملحنين الكبار الموجودين على الساحة فى ذلك الوقت وهنا انفجر كما قلت وقال بغضب شديد لااعرف السبب الذى يجعل ام كلثوم لا تغنى من الحانى بالرغم من اننى الملحن الوحيد الذى لم يسقط لة لحن بالرغم من انها تغنى لغيرى الحانا لا تليق بها اقرب الى الطقاطيق ولا تغنى من الحانى انا فريد الأطرش واعتقد واللة اعلم انة كان يقصد الشيخ سيد مكاوى الذى لحن لها فى تلك الفترة يمسهرنى وهذا للتاريخ اى ان ام كلثوم هى التى كانت ترفض الغناء من الحان فريد الأطرش وليس العكس.اما عن عبد الوهاب مع ام كلثوم فقد خدم نفسة اكثر مما خدم ام كلثوم واستطاع ان يحول اتجاهها 180 درجة بمكر شديد وفى راأيى ان احلى ما قدم عبد الوهاب مع ام كلثوم هى المقدمات الموسيقية الجميلة مثل مقدمات اغنيتى انت عمرى ودارت الأيام والتى لا اعلم كيف اقنع الست بها وهى التى تعودت على مقدمات اغانى قصيرة منذ ان بدأت الغناء مع العمالقة زكريا احمد والسنباطى ولكنى مع الأسف افتقدت ام كلثوم عندما غنت مع عبد الوهاب.اما الوحيد الذى استطاع ان يعيد الى ام كلثوم كما اعرفها فهو الرائع بليغ حمدى فى الأحدى عشر لحنا الذ لحنهم لها واعتقد ان السبب هو انة ومعظم الجيل الجديد فى ذلك الوقت كانوا جميعهم خارجين من عباءة العبقرى رياض السنباطى وارجو قبول اعتذارى عن الأطالة مع شكرى وتقديرى واحترامى. ارمندو

**جوليانا** · #4 21/12/2009, 19h33

السلام عليكم ورحمه الله وبركاته

الاستاذ الفاضل /عادل
الساده اعضاء المنتدى الكرام
تحيه لكم جميعا
انا بشكر حضرتك اوى اوى على هذه الاسرار والذكريات الثمينه
ويا ريت حضرتك كل اسبوع تخلى يوم وتحكى لنا عن هذه الايام والبروفات او المحاضرات الدراسيه فى الاخلاق الفنيه والغيره الشريفه اللى خلت هذه الفتره من احلى فترات الطرب والغناء
بس يا ريت ما بكنش بتقل على حضرتك بهذا الطلب
على العموم انا ممكن اعمل خطه مع الاعضاء الكرام وكل شويه حد يسال حضرتك سؤال فطبعا حضرتك هترد علينا لانك دايما وابدا كبير وعظيم فى كل حاجه
انا قولت على الطلب
ويا ريت الاعضاء يشاركونى فى الخطه عشان نستفيد من استاذنالانه بحر العلم
وليه انا فهو موجهى الاول والاخير
وبشكرك على النوته الجديده ويا رب تظل مناره للفن الاصيل
وكالعاده بطول انا اسفه
وشكرااااااااااااااااا
اشكرك عزيتى جوليانا اقتراحك جميل يعنى انا احب اكتر الأسئلة لأن لها ردود سريعة غير لما افكر وافتكر

عادل صموئيل

**وليد100** · #5 09/03/2014, 00h09

السلام عليكم ورحمه الله
بعد التحيه
احب ان اطرح موضوع هام واتمني ان اسمع اراء الاخوه الاعضاء وعلي راسهم الموسيقار الفنان عادل صموئيل
ماسبب تميز الموسيقار محمد عبد الوهاب في تاليف موسيقي الاغاني وخصوصا الاغاني الطويله بطريقه تبرز صنعه قويه جدا وبطريقه مختلفه عن باقي الفنانين الملحنين ؟؟؟
مع تحياتي
وشكرا
وليد
اخى العزيز
سؤال جميل جدا وقصته طويلة ايضا جدا ولكن يسعدنى احكى لكل من يحب يسمع ... عبد الوهاب اولا عنده غزارة لحنية رهيبة ودى بيكتشفها كل اللى تعابشوا معاه على الطبيعة بمعنى انك لو اخترت احلى مقدمة موسيقية لأم كلثوم مثلا هل تعلم انه كان ممكن يعمل لنفس الاغنية دى عشر مقدمات وانت تختار احلى واحدة ؟ وكانت بتحصل معانا كتير يعنى اى اغنية انت بتسمعها من اغانيه الطويلة لأم كلثوم وبعدها لعبد الحليم ثم وردة ثم فايزة احمد كان المقدمة اللى بنبتدى بيها فى البروفة الاولى تختلف عن المقدمة اللى بنعزفها فى البروفة رقم 40 وهى بتكون اللى انتم بعد كده بتسمعوها فى الراديو لأنه بيفضل يغير ويبدل ويشيل ويحط ويبتكر الاعيب وايقاعات وصولوهات
ولما نحلل الموضوع الاول نبتدى بالجذور .. يعنى عبد الوهاب الثائر اول ما ابتدا يغنى كان الجو العام ساعتها ان المطرب هو الاساس والموسيقى شىء ثانوى مصاحب يعنى مكانش فيه حاجة اسمها مقدمة موسيقية او موسيقى كوبليه كان الفرقة لو اللحن بياتى مثلا بتقول جملة اسمها دولاب بياتى وتفضل تكرر فيها لحد ما المطرب يتنحنح ويغنى وكانت الدواليب دى جمل محفوظة زى السلام الجمهورى كده والموسيقيين حافظين شوية دواليب فى كذا مقام وبيستعملوهم هم هم فى كل الاغانى ..يعنى دولاب هزام فى كل اغانى الهزام وهكذا ودوره هو سلطنة المطرب عشان ماينفعش ييجى من بيتهم ويغنى على طول .. لما ابتدا عبد الوهاب كان الاول لازم يمشى على هذا النهج بعدين غزارته اللحنية خلته ثار على الوضع ده .. وكلمة ثار يعنى لما جدد عمل ثورة وانقلب عليه كثير من المتزمتين اللى قالوا المتمرد ده حايبوظ لنا الموسيقى بتاعتنا ولولا عبد الوهاب لكنا فضلنا فى الدواليب دى لحد الآن وما صار موسيقى ولا يحزنون المهم انه الاول عمل جملة ثم جملتين ثم اكتر لحد ما المقدمة بقت عمارة بعدين فى موسيقى الكوبليهات عمل نفس الشىء وفيه حاجتين يعنى انت لو راجعت بدقة شديدة التاريخ الموسيقى تلاقى عبد الوهاب عمل اكبر كمية من المقطوعات الموسيقية البحتة اكتر من اى ملحن تانى وده يدل على غزارته اللحنية المتدفقة وذكاء عبد الوهاب الخطير انه اكتشف ان عندنا موسيقيين خطيرين يعنى عندك انور منسى ومحمد عبده صالح والعقاد وعشرات يعنى حرام دول اخليهم يبقوا سنيدة للمطرب يعنى ليه طالما ممكن انه يعمل لهم جمل عبقرية تظهر عبقرياتهم والامثلة تثبت ذلك .. الجميل ان العملاق عادة مش بيعمل لنفسه ولكن بيعمل للعصور التالية .. ان الناس لما ابتدت تتذوق الموسيقى دى ابتدا كل الملحنين يعملوا مثله .. لكن اقول لك سر ان انا وكل الموسيقيين امثالى كنا فى اى اغنية جديدة نعملها بنكون مترقبين وحانتجنن نشوف عبد الوهاب عمل ايه المرة دى .. وانا باخد من كلامك واقول انت قلت الاغنية الطويلة ودى نقطة تانى خطيرة جدا ... ممكن ملحن زى منير مراد مثلا مع شادية يعمل لك 60 اغنية تجنن قصيرة لكن مش اى ملحن له نفس وتقل يعمل اغنية طويلة وكلها حلوة يعنى شوف اى اغنية من اغانى ام كلثوم فيها كام جملة تلاقى من اولها لآخرها كل جملة احلى من التانية لأن فيه نظرية اى جملة دون المستوى بتوقع الكوبليه كله يعنى ام كلثوم كانت على الاقل بتغنى كل جملة 4 مرات عشان المستمع يتذوقها ويتلذذ بسماعها وتقول اللى بعدها تخيل حضرتك لو جملة سخيفة او متكلفتة يبقى الكوبليه كله فى الباى باى .. وحتى لما بيعمل شىء متطور اوى وام كلثوم كانت مش بتقبله بياخدها ع الهادى لحد ماتقبله وتموت فيه زى ادخال الجيتار الكهربائى مثلا او زى جملة عينى عينى ع العاشقين فى دارت الايام كانت معترضة على الجملة ومارضتش تغنيها كان فى البروفات هى تغنى وتسيبه يغنيها ومرة قال لها طيب انا حاجى معاكى الحفلة وانتى غنى وانا حقول عينى ع العاشقين ومرة ف مرة هى حبتها وتلاحظ فى الحفلة انها عادتها كتير والجمهور اتهبل على اللون الجديد ده بإختصار ياعزيزى عبد الوهاب ده كان : دماغ
مع اطيب تحياتى عادل صموئيل

**وليد100** · #6 23/03/2014, 19h04

السلام عليكم
استاذ عادل صموئيل
تحيه طيبه لحضرتك وبعد
من الاراء التي قيلت عن الفنان عبد الوهاب وموسيقاه ان الابداع والجمال في موسيقاه يكمن في انه ينتقل من جمله جميله الي جمله اروع واجمل من سابقتها وهكذا ....والسؤال المهم ماهي قضايا عبد الوهاب الموسيقيه التي كان يريد ان يرسخها ويبثها في اسماع الجمهور وهل هناك قضيه رئيسيه كان يعمل عليها دائما ام انها قضايا متعدده
(وانا اضرب لك مثلا لكي نكون اكثر تواصلا فانا افهم ان الغناء عند عبد الوهاب واعني هنا التلحين علي وجه الخصوص كان يعني ان اللحن لابد وان يتماشي مع الكلمات وكان عبد الوهاب رحمه الله يؤكد علي ذلك في كل لحن يقدمه بل في كل شطر يلحنه باستثناء بعض الهفوات التي يختلف عليها البعض )
وشكرا
وليد

**منذر44** · #7 05/04/2014, 13h01

استاذ عادل
لو تتكرم وتشرح لنا سبب انفراط عقد الفرقة الماسية وسبب توقفها
اظن لو انها استمرت لكانت اسهمت في منع انحدار مستوى الاغاني الحديثة

**عادل صموئيل** · #8 06/04/2014, 12h38

احبائى

اسمحوا لى ان ارد على كلامكم كلو فى موضوع واحد لأنه كله مرتبط ببعضه
ايه الفرق بين طباخ مثلا بيعمل اكلة تتاكل فى يوم وخلصت على كده وبين واحد فنان عمل تمثال زى تمثال نهضة مصر مثلا من اول يوم تم افتتاحه يبقى على مدى الدهر شاهد على حضارة .. وثانيا نفس الفنان لو عمل عشر تماثيل عمره ما بيكرر اللى عمله يعنى العشر تماثيل كل تمثال منهم عمل فنى رائع معروف عالميا بإسم ما ؟؟
حاجة تانية ايه الفرق بين لما تنزل السوق تتفرج على المحلات وتشوف مثلا محل ادوات كهربائية حاطط 300 نجفة هم حلوين لكن المصنع اللى عملهم عامل من كل واحدة آلاف وبين لما تدخل متحف وتلاقى كل قطعة فيه مالهاش اخت لأن الفرق بين السلعة والتحفة ان دى بتتكرر ولها عمر افتراضى يعنى بيطلع احلى منها وبييجى يوم تبقى موضة قديمة او تستهلك وتترمى وبين التحفة اللى كل كل ما يمر عليها الزمن قيمتها بتزيد لن اللى عملها مش موجود يعمل منه تانى .. كمان حاجة فى التحف اذا لقيت تحفة من الذهب الخالص وزنها كيلو جرام مش بيقاس ثمنها بوزن الذهب زى المشغولات الذهبية المتداولة يعنى تقول كيلو الذهب مثلا بمليون جنيه تبقى القطعة دى بمليون جنيه ولكن بتقاس بقيمتها الفنية والاثرية وساعتها لاتقدر بثمن او ثمنها عشرات اضعاف قيمة الذهب فيها
ولما نيجى لعبد الوهاب ( وعمالقة عصره ) انو مش بيعمل لحن عشان يقبض ثمنهم وخلاص ولكن اولا لازم يعمل شىء رائع مالوش شبيه ولازم خبراء الموسيسقى لما يحللوه يلاقوا فى كل لحن كلام كتير يتقال ومش موجود فى لحن تانى وثانيا ان اللحن يعيش الى الابد .... دلوقتى اللى بيلحن بيلحن عشان الفلوس يعنى مثلا لوبياخد 1000 جنيه فى اللحن يتمنى لو يعمل كل يوم عشر الحان لكن اللى زى عبد الوهاب كان بيعمل اللحن فى سنة بحيث مايطلعش احلى من كده وفيه موضوع خطير تلاقى الملحنيناللى كانوا بيعملوا افلام كتير كانت الحانهم متباينة فى الجودة يعنى بيمعل 4 افلام فى السنة فى 7 اغانى كل فيلم يعنى 28 اغنية فى السنة بتلاقى منهم اغانى كتير متكلفتة او معمولة بطريقة حرفية بس اللى بيغطى على كده مهارتهم فى الغناء .. اما مشكلة الفرقة الماسية انها كانت بتشتغل اساسا على عمالقة الغناء والتلحين
ولما ابتدوا يرحلوا واحد ورا التانى كان كبار الفرقة الماسية بيرحلوا هم كمان لأنهم فى نفس السن تقريبا يعنى انا كنت استثناء لأنى عزفت معاهم وانا سنى عشرين سنة فى حين كام معظمهم فى حدود الخمسين .. وكانم مكن تستمر يعنى بتجديد اعضاء لكن المشكلة فى المناخ .. يعنى ماطلعش خلفاء للفنانين العظام زى ما العمالقة كانوا خلفاء لعمالقة قبلهم
وبعدين ظهرت فرق جديدة زى حمادة النادى وهانى مهنى وخالد فؤاد غيروا مفهوم التلحين والتقديم غيروا نكهة الاغنية المصرية .. بمعنى بقت كل الاغانى موزعة وتقريبا لغوا شغل الكمنجات بعد ماكانت زى ام كلثوم هى اللى بتعمل اللحن كله وبتصاحب المطرب .. النهاردة انحسر شغلها فى انها بترد على المطرب بلزمات سريعة جدا تكنيكية اوى مافيهاش طرب وبالطبع مش ممكن عامة الشعب تفهمها والمطرب بيغنى فى الهوا على الايقاع فقط مع ان اخطر شىء ان المطرب لازم تصاحبه الكمنجات ... يعنى انا واحد من الناس الشغل ده لا بحب اشتغل فيه ولا احب حتى اسمعه لأن غيرطبيعة الموسيقى الى احنا نعرفها كمان خطورة التوزيع من اول اللحن لآخره ضيع مفهوم ان الموسيقى المصرية او العربية بتعتمد اصلا على حلاوة الجملة .. يعنى زمان كانت انت عمرى مثلا 350 جملة لازم تكون كل جملة احلى من التانية لن الجملة بتسمعها بمفردها يعنى مكشوفة لكن الجملة لما تحط عليها خطوط كتير حلاوتها مش بتظهر وهنا ممكن تبقى الجملة اى كلام وايقاعت بتهبد واورجات بتصرخ مافيش حاجة باينة يعنى انا لما بينطلب منى اكتب اغانى من دى بقول اكتب ايه انا مش سامع حاجة وتلاقى 120 عازف ع المسرح امامهم 60 ميكروفون ومش سامع حاجة ام كلثوم كان عليها 3 ميكروفونات فقط وشوف .... انا واحد زميلى ساكن قريب من بيتى عازف شيللو اسمو عبد الفضيل محمد يعنى بنتقابل ونسهر ساعات مع اصدقاء نعزف .. هو اكبر منى بعشر سنين بس الحمد لله صحته كويسة لنو مشبيشرب اى حاجة ( كان اسمو الشيخ عبد الفضيل ) وهو اقدم منى يعنى كان بيعزف مع ام كلثوم من اول اقل الليل .. مرة كنت قاعد مع جماعة موسيقيية ومنهم طبال فاشل جت سيرة عبد الفضيل قلت لهم هو بطل يشتغل من زمان قال لى الطبال الفاشل اكيد عجز قلت لو لأ .... هو قرف ... وطبعا المفهوم واضح
مع اطيب تحياتى

**سليم العباس** · #9 10/04/2014, 23h12

تحية طيبة أستاذ عادل :

هذه نوتة سهر الليالي من تدوين حضرتك ، أعدت كتابتها بعد حذف ذيول العلامات و الاستعاضة عنها بالألوان ، لا أعرف إن كانت هذه الطريقة مستخدمة سابقاً ، النوتة تبدو غريبة للوهلة الأولى لكن على ما أظن أنها تساعد المبتدئين على القراءة
فالقارئ لا يضطر إلى رؤية درجة النغمة و الاطلاع على نوعها ( نوار ..كروش ) بنفس الوقت كما يحصل بالتدوين العادي ، بل يمكنه معرفة النوع مباشرة حسب اللون بعد التعود على الألوان الموافقة لكل نوع من العلامات !
و هذه الطريقة تخفف من ازدحام العلامات الموسيقية في المدرج فتبدو أكثر سهولة !

يرجى التفضل بالاطلاع و ابداء الرأي وشكراً.

اخى العزيز
انا ماعجبتنيش لأن اللى بيقرأ النوتة بيقراها بعينه واتعلمنا او اتعودنا اننا بنقرا النغمة بالعلامة لايقاعية
تخيل مثلا فى السيارة فيه 3 دواسات اسفل او بدالات الاوسط هو الفرامل وكل من بيسوق سيارة فى الكرة الارضية متعود ان الفرامل فى المنتصف بحيث انو وهو ماشى لو فجاة ظهر لو شىء طارىء بدون تفكير رجله بتضغط على البدال الاوسط وكل صناع السيارات فى العالم ملتزمين بهذا يعنى تغير فى جميع مواصفات السيارة إلا هذه الدواسات
لما نيجى لهذه الطريقة مش حاتنفع مع المتعلمين نوتة من قبل ولكن انا اتخيل اننا لو جبنا ناس جدد وحانبدا نعلمهم النوتة من الصفر الاول طبعا بنحفظهم اماكن النغمات وثانيا بنعرفهم العلامات الايقاعية يعنى العلامات الايقاعية دى انت لما بتشوفها عاملة زى الفرق بين اوراق العملات المختلفة يعنى ممكن اى واحد جاهل ما يعرف القراءة لكن بالتعود بيميز بين الليرة والخمس ليرات وهكذا ... يبقى انا عشان اعلمه العلامات الايقاعية لازم اعلمه الروند والبلانش والنوار وكسورهم وبعد كده استعيض عنهم بالالوان اعتقد العلامات طبعا اسهل دى وجهة نظرى ومشكلة ازدحام المازورة بتتحل بالخبرة يعنى بكتر التمرين يعنى مفيش جملة موسيقية بتخلو من جميع العلامات وسكتاتها ولو فيه جملة كلها بلانشات فقط مثلا بتبقى جملة بطيئة وسطط جمل سريعة ولو اللحن كلو علامة ايقاعية واحدة حايبقى رتيب مالوش طعم مافيهوش حركة يعنى انا بنصح المبتدئين اختار الاول المقطوعة اللى سهلة الايقاع ثم بالتدريج اختار مقطوعة اصعب وهكذا ومش معقولاطلب من المبتدى انو يبتدى بالاطلال مثلا
مع اطيب تحياتى عادل صموئيل

**سليم العباس** · #10 11/04/2014, 12h36

شكرأ أستاذ عادل على تفضلك بالرد ، و موضوع قراءة النوتة بالعلامات الإيقاعية ( كما وضحته مشكورا )هام جداً و يتعارض مع فكرة تلوين أقسام النوتة .

تحياتي لحضرتك.