( 27 )
لازم أصحى الحى
اصحى يا نايـم
وحد الدايــــــم
و قول نويـــت
بكره ان حييت
الشهر صايـــم
و الفجر قايـــم
اصحى يا نايم
وحد الـــرزاق
رمضان كريم
مسحراتى أرمى صوتى لـــــفـــوق
مسحراتى بانســــــــــانــــيه و ذوق
ذوق مش قوى لأحسن ماينــــفعشى
لازم أصحى الحى كل الــــــحـــــى
لا بد طبلى يــــــــدوى فـــــيهم زى
فوج المدارس فى تــــمام الــــــضى
علم الصغر كما فى الحجر نـــــقشى
غلب حمارى لم غلب جــــــحـــــشى
أضرب مثل و الدنيا مش ســاهــــــيه
قلبى اتغسل بالطل و الــــــســـــــاقيه
دقت العسل على سنتى الــــــبـــــاقيه
يحلى كلامى و ضحكتى و قــــــفشى
و يا عم شاكرمين هنا يســـــــــــواك
مستكفى بالنعناعه و المســـــــــــواك
يصحى لى قبل ما افوت و ما ينامشى
ميات حبايب فى البلد و الـــــــــــوف
على صوتى فى الشهر الكريم بتــلوف
على عينى شلت الفضل و المعــروف
تحت الحواجب و البيوت أمـــــــــشى
المشى طاب لـــى
و الدق على طبلى
ناس كانوا قــــبلى
قالوا فى الأمثال :
الرجل تــــــدب
مطرح ما تحب
مشاركة: المسحراتى
العرض المتطور
