كهربة الريف

[علاء قدرى]

المشاركة الأصلية كتبت بواسطة سعدالشرقاوى

كهربة الريف

ياسلوك يامكسيّة
م الحرّ مهريّة
واللىّ لمس توبك
مقتول مالوش ديّة
,,,
ياسلوك ياعريانه
م المايّه عدمانه
ساعة ماهبّ الرّيح
نلقاكى ويّانه
,,,
عمدان يامطليّه
بعصير ملوخيه
ناقصك شويّة توم
واتخرّى تقليّة
,,,
حوّل يا متحوّل
وهات من الأوّل
مربوط بلفـّة شاش
والعمر هايطوّل
,,,
عازل يامتخازل
فى الجوّ بتغازل
بنشوف بيك الطالع
وتشوفنا فى النـّازل
,,,
كابلات يامجنونه
فى طريقنا مدفونه
بتدوبى فى هوانا
وملزوقه بصابونه
,,,
ياضغط ياغالى
فى سمانا بتلالى
حرارتنا فى الخمسين
والضغط مش عالى
,,,
تالمه ياسكـّينه
فى الكوشك مسكينه
بتعافرى فى الارضى
ومحتاجه تسكينه
,,,
فوانيس يامكفيّه
م الخدمه معفيّه
فى الشمس نور على نور
فى الضلمه مطفيّه

فواتير تلسوعنه
ندفع وتدفعنه
نشكى ونتشاكه
ولا حدّ يسمعنه

,,,

حبيبى الشاعر عم سعد
ماساه بخفة دم ؛ ما يكتبهاش غير واحد دمه خفيف ؛ وحريف تريقه ؛
على راى المثل هم يضحك ؛ وهم يبكى
انت حتفضل تطارد السلبيات ؛ مرة بعنف ؛ ومرة بلين ؛ ومرة بخفة دم ؛لعل وعسى
المهم ما تزهقش ؛ اصل المغارة فيها كتير
على فكرة نورت محافظة البحيرة يا بحراوى الهوى

[سعدالشرقاوى]

المشاركة الأصلية كتبت بواسطة علاء قدرى

حبيبى الشاعر عم سعد
ماساه بخفة دم ؛ ما يكتبهاش غير واحد دمه خفيف ؛ وحريف تريقه ؛
على راى المثل هم يضحك ؛ وهم يبكى
انت حتفضل تطارد السلبيات ؛ مرة بعنف ؛ ومرة بلين ؛ ومرة بخفة دم ؛لعل وعسى
المهم ما تزهقش ؛ اصل المغارة فيها كتير
على فكرة نورت محافظة البحيرة يا بحراوى الهوى

الاخ الغالى الاستاذ/علاء قدرى
بحبها عشان حبايبى منـّها
وف قلبى سكن حبها (محافظة البحيرة)
وفعلا بحراوى الهوى
الله ينور عليك فى روحانياتك
ويهون علينا طريق السلبيات
ماتحرمش العمر منك ياحبيبى