نبتة فول

[علاء قدرى]

المشاركة الأصلية كتبت بواسطة سعدالشرقاوى

حبّة الفول

أحسنتى فى القول يانبتة فول فى سجودك
وعرفتى فى الطين بتحنى لمين عنقودك
والأرض حنـّت وكنـّت فى الدفا لحضنك
ولف غصنك حصى شاهد على وجودك
,,,,,,,,,
فلقاكى ايد العنايه بالقدر نصّين
والروح مشت فى النـّوايه وعلـّمت صفـّين
بدات حياتك بحب الأرض والعشرة
وانفكـّت القشرة وظهر جوّه الغلاف فصّين
,,,,,,,,,,
رافعين ورقهم بنيّه للخشوع والفرض
مكتوب عليها الأجل والعمق ويّا العرض
والطـّرح ساعة معاده وامتى هاينوّر
وجدور تدوّر على النعمة فى بطن الأرض
,,,,,,,,,,,
بالحكمة سارى ف معدتك ويضخّ فى الشرايين
عارف طريق سكـّتك شادد غذاه م الطين
سارح وسابح فى حبّ الأرض ووجوده
فاتح لعوده مجال عايش مابين شطـّين
,,,,,,,,,
وفى النهايه يافول مأكول بنى الأنسان
لاحبست يوم خطوتك ولا مرّه كنت جبان
واللىّ عرف قصّتك حاير مابين أمره
ويقضـّى عمره ف خجل من نعمة الرحمن
,,,,,,,,,

الملف الصوتى متوفر

الله عليك يا شاعر لما تبدع ؛ و تنجلى ؛ وتشوف ايات الله فى (حبة الفول) ؛ وتصور لنا سجدة نبات لخالقها ؛ على صغر حجمها ؛ ودقة تكوينها ؛ لكن بتعلم بنى الانسان ؛ والله حسيت بيها كانها انسان ؛ عالم ؛ عابد ؛خاشع ؛ لقدرة الله العظيم ؛ الله ينعم عليك يا عم سعد برؤية حقيقة مخلوقاته ؛ و اسرار موجوداته ؛ لتبدع لنا صورة جميلة ؛ من صور الرحمن ؛ والله يا عم سعد تعلونى دهشه من اصطيادك للقطة الكونية الصغيرة دى (حبة الفول؟؟؟؟؟؟؟؟) عشان تطلع لنا صورة شعرية ؛ عالية الدقة ؛ غالية المعنى ؛ تسلم يا شاعر ؛ وتسلم افكارك ؛ من اجمل ما كتبت ؛ و ابدع ما صورت
يمكن دى تكون من تجليات شهر الصيام
كل سنة و انت طيب ؛ و مبدع صور جديدة ؛ تتحدث عن عظمة الخالق ؛ بريشة فنان