بأحبك يا مصر

[علاء طه ياسين]

يا مصر اللي لابسة ثياب الحداد
وواقفة حزينة ف وسط البلاد
بتبكي عنيكي لعجز الولاد
وتنزل دموعك ولا حد داري
....
نسينا ليالي الحصاد في الغيطان
وطلة قمرنا وكان ياما كان
نسينا الكنايس نسينا الآدان
وقعدة محبة في ساعة عصاري
...
كفاية علينا نحب البنات
نطبطب ندلع نبوس الواوات
ونبقي جميعا كده كائنات
تعيش في المقابر وتحت الكباري
...
كفاية علينا مهند ونور
وغنوة بتتقال في يوم العبور
وقدام طابونة بنعمل طابور
وملعون أبوه السلوك الحضاري
....
ولما في مرة بندخل مولات
نمصمص شفايف ونمشي ف سكات
ياخدنا طريقنا لسوق التلات
وفي السكة نغرق في طفح المجاري
.....
علي رغم هذا باحبك يا مصر
...
بأحبك يا مصر التاريخ والحضارة
جوامع معابد كنايس عمارة
ومملوك بسيفه بيصد غارة
تدمر هولاكو وزحفه التتاري
....
وأحبك يا مصر الحسين الإمام
وزينب رئيسة الديوان والمقام
وقلبي معلق من ألف عام
ورا مشربية في عصر الجواري
....
واحبك يا مصر السهر في الليالي
وقهوة عليها بنقعد نلالي
وناعسة الجميلة في سيرة الهلالي
ونجماية شاردة علي سطح داري
...
وأحبك يا مصر السكك والدروب
وطيبة وبراءة بتملي القلوب
وعشة علي النيل ف ساعة الغروب
وزفة وزينة هناك في الحواري
.....
وأحبك يا مصر الهرم والسواقي
وترعة بتسقي الأراضي الشراقي
وبنوتة حلوة ف ساعة التلاقي
ونظرة عنيها هجوم انتحاري
....

علاء ياسين