حوار بين تائب وعاصى
التائب= ياللا ياعاقل صحّى النوم
احنا بقينا ف شهر الصّوم
صلىّ وصوم دا العمر بيجرى
ح يفوت منـّك يوم ورا يوم
,,,
العاصى= ابعد عنىّ وسيبنى ياعم
بلاش ترفع لى ضغط الدم
سيبنا نعيشوا حياتنا ياسيدنا
الله يخلـّيك مش ناقصين هم
,,,
التائب= قوم يا حبيبى الله يخليك
ذنوبك ليه مش هاينه عليك
عشان المولى فارد لك إيده
ليل ونهار ما تمدّ إيديك
,,,
العاصى= إمشى ياشيخ واقتصر الشرّ
عايزنا نصوموا ف عزّ الحرّ
طول اليوم نشرب ف سجاير
شوف لك قافيه وهاتها البرّ
,,,
التائب= فوق ياحبيبى ارجع لصوابك
روح الجامع مع أحبابك
صلىّ وصوم وكفايه معاصى
وانت مضيّع عزّ شبابك
,,,
العاصى= قول لى ياشيخ معقول دلوقتى
بعد الذنب ما ميّل بختى
ممكن ربّك ياخد بايدى
فكرك يعنى ح يقبل توبتى؟
,,,
التائب= هوّ خالقنا وهوّ حبيبنا
مهما غفلنا مش ح يسيبنا
خيره وفضله تملىّ علينا
وعلى أعمالنا لازم يحاسبنا
,,,
العاصى= خدنى معاك عوّدنى الصّوم
أنا غرقان علـّمنى العوم
وخللىّ القسوة تودّع قلبى
وأعشق نور الصّلا والصّوم
,,,
رد: آن الأوان
شــــاعِر
العرض العادي
