آن الأوان

**غازي الضبع** · #1 11/08/2009, 07h05

اقتباس:

المشاركة الأصلية كتبت بواسطة يوسف أبوسالم

الله عليك يا طارق

أطربتني بحق
هل من مزيد

سلامات

حضورك دائما متألق يا أ. يوسف
.. مش هاوصيك ..
تفضل معانا

**يوسف أبوسالم** · #2 11/08/2009, 10h16

اقتباس:

المشاركة الأصلية كتبت بواسطة غازي الضبع

حضورك دائما متألق يا أ. يوسف

.. مش هاوصيك ..

تفضل معانا

أهلا بك أخي وصديقي غازي
منذ أن قرأت هذا الموضوع
وهو لا يفارقني لشدة إعجابي بالفكرة
بدليل
أنني في مشاركة سابقة
أكدت على استلهام أفكار الأخت الرائعة
عفاف سليمان
وحاولت رسم سيناريو محتمل للصورة الغنائية
وها أنذا أتابع معكم كل جديد
وعلى فكرة
تنوع أعمال الشعراء
الذين ساهموا هنا حتى الآن أمر في غاية الروعة
لأن الصورة الغنائية عند التلحين
تحتمل مقامات مختلفة وإيقاعات متنوعة وألحان متعددة وهو الأمر الذي
نحتاج به مساهمات لأكثر من شاعر
وبتنويعات لحنية وإيقاعية أخرى
أما مشاركتي بالتأليف
فالعمل يجب أن يكون باللهجة الشعبية المصرية المحببة عبى قلبي وقلوب الجميع
وأنا يا صديقي أتمنى أن أكتب بها
ولكني لم أفعل ولم أحاول
ومهما حاولت في هذا المجال
لن أكتب أحسن مما كتب الزملاء الشعراء
لأنهم يكتبون بلهجتهم التي يعرفونها ويعايشونها أكثر مني
حسبي أن أقرأ لهم وأتمتع بما يكتبون
تحياتي

**NAHID 76** · #3 11/08/2009, 10h48

بسم الله الرحمن الرحيم
أعزائى على غرار تهانى الأفراح فى بلدنا
الله الله على قسم الأدب والشعر أهو كده يا رجاله
شوفوا لما ناديتوا لبى قسم الأدب والتجارب النداء
فجاء الثائر بسرعه البرق يكتب ويعدد وما أجمل ما كتب
ومن وراه حضر كبيرنا وحبيبنا وكتب كلامه الجميل الرائع أستاذنا أبو زهده
وخد عندك كمان من الأردن شارك فرحتنا الجميل الشاعر يوسف أبو سالم وشجعنا بالطريقه المصريه ودفع الهمه الى الأمام
تشكر والله يا أبو الذوق دى بطريقه أفراح أولاد البلد
ونيجى بقى لرأى قسمنا الحبيب
وحبيب الملايين كمال أبو عبد الرحمن وان شا لله عنده بطريقه أفراح الجماليه
بدع وشجع وقال كلام كبير أوى أد الفرح ده كله
ومتنساش رائد وحضورة الطاغى ولا سى أبو مندور
ولا ست الكل عفاف الأم
والست رغد الجميله
وحببنا بيرش السلام على الجميع وبيقول شدو حلكو دكتورنا أنس البن
وتعالوا معى وبصوا على الأخوين التوأمين علاء ياسين الشاعر الغنائى الجميل ذو الموهبه الرائعه الذى شد معنا العمل ونقط بحته حلوه
ولا خالى سعد الشرقاوى وكرمه وكلامه
أهو ده قسم تجارب أدبيه
عفارم عليكم يا رجاله الله يحرسكم من العين

اما انا طول عمرى خايبه ومهمله
بس ح اعمل لكم القمر الدين والمشروبات وح اوزع الشربات
مببببروك

**رائد عبد السلام** · #4 11/08/2009, 11h29

علي عربة قديمة يفوح من خشبها عطر الزمن القديم
يصيح بائع سريح :

ياميش ندامة علي اللي

حب ولا طالشي

لولا الهوي في القلوب ..

الخطوة ما تمشي

بابيع أنا بالحب ..

و سراجي قمر الدين

و بعين جمل بانظر ...

للصبر ما ينامشي

ياللي بدعت القلوب

فيها الجميل والبخيل

وفيها قلب انكوي ...

والتاني ما سلمْشي

سهّل علينا الصيام ..

بحق شهر فضيل

قرّب ودوق الجمال ...

رمضان ده سِحْر حلال

لو حتي مال الحال ...

كريم ما ينضامشي

ترد بائعة جرجير :

جرجرت توبي من البلد ......جرجير

بالخير أنا جاية ..وباقول طري ياجرجير

قرّب ودوق العروق ... صابحة منديّة

بالنيّة توصل مُناك ياللي تحب الخير

طري وطعمه عسل ... جرجير يزيح الكسل

صدق اللي قال في المثل : أبو بلاش ....بيطير !

الراوي:

القلـــــعة تنده للإمام

ولكل عاشق مُستهام

ياحُسين غلبت العِدا...

ونلت منه المرام

هو اترمي في النار

وأنت حضنت الغَمَام

م الموسكي للسيدة

طوابير بشر و زحام

يامصر وانتي الأمل ...

للي مالوهش حبيب

وشهد نيلك زلال

منه العليل بيطيب

ورمش عينك حسام ...

خُلص عليه الكلام

علي صوت النقشبندي

زي الغصن الرطيب

مصر العفيّة قايمة

تشق قلب الظلام

وصوت محمد رفعت

........بيُقرأنا السلام

**Tarek Elemary** · #5 11/08/2009, 11h49

اقتباس:

المشاركة الأصلية كتبت بواسطة رائد عبد السلام

كله يوسع ... كله يركن ع اليمين
آدى أول شبل م المحترفين
ستبدأ المتعة و التشويق و الإثارة و الفرجة
و إتفرج يا سلام

**غازي الضبع** · #6 11/08/2009, 12h34

اقتباس:

المشاركة الأصلية كتبت بواسطة رائد عبد السلام

علي عربة قديمة يفوح من خشبها عطر الزمن القديم
يصيح بائع سريح :

كنت مستنيك يا بو دماغ متكلفة

**unicorn** · #7 11/08/2009, 16h50

اقتباس:

المشاركة الأصلية كتبت بواسطة رائد عبد السلام

ترد بائعة جرجير :

جرجرت توبي من البلد ......جرجير

بالخير أنا جاية ..وباقول طري ياجرجير

قرّب ودوق العروق ... صابحة منديّة

بالنيّة توصل مُناك ياللي تحب الخير

طري وطعمه عسل ... جرجير يزيح الكسل

صدق اللي قال في المثل : أبو بلاش ....بيطير !

يخرب بيت اللى يزعلك يا ابو رائد ,
جبت البوقين دول ازاى ؟؟؟
يا سلام لو واحدة صعيدية تقول البقين دول باللهجة الصعيدى زى ما هما كدة.
الله ينور على الجميع , يا ريتنى كنت شاعر زيكم عشان اشارك.

**الألآتى** · #8 11/08/2009, 17h06

عايزين نلم بقى المتفرقات دى فى صورة متكاملة .. قصة يعنى ..

علشان تتابع الألحان ياسيادنا .. والإنتقال بين المقامات والذى منه ..

ماقدرش أعمل أغنية من الشرق .. وأغنية من الغرب .. لازم يكون فيه تتابع لحنى وموسيقى ..

العملية مش هيصة ..

**خليـل زيـدان** · #9 11/08/2009, 17h40

اقتباس:

المشاركة الأصلية كتبت بواسطة الألآتى

عايزين نلم بقى المتفرقات دى فى صورة متكاملة .. قصة يعنى ..
علشان تتابع الألحان ياسيادنا .. والإنتقال بين المقامات والذى منه ..
ماقدرش أعمل أغنية من الشرق .. وأغنية من الغرب .. لازم يكون فيه تتابع لحنى وموسيقى ..
العملية مش هيصة ..

هو ده اللي بقول عليه يا بو حسام ..
قصة يكون مضونها معظم أو كل ماقيل
ويتعمل لها السيناريون اللي هو وصف للأشخاص والمكان والزمان
والإيماءات الصوتية ، وطريقة النطق والتعبير ، وتقدر تعمل الألحان حسب تتابع الأحداث
علشان حضرتك تحط المؤثرات الصوتية للمواقف كمان ..
وربنا معاكم

**د أنس البن** · #10 11/08/2009, 18h58

اقتباس:

المشاركة الأصلية كتبت بواسطة الريحاني

هو ده اللي بقول عليه يا بو حسام ..
قصة يكون مضونها معظم أو كل ماقيل
ويتعمل لها السيناريون اللي هو وصف للأشخاص والمكان والزمان
والإيماءات الصوتية ، وطريقة النطق والتعبير ، وتقدر تعمل الألحان حسب تتابع الأحداث
علشان حضرتك تحط المؤثرات الصوتية للمواقف كمان ..
وربنا معاكم

م الآخر
دى شغلانة اتنين
كمال عبد الرحمن و سيد ابو زهده
يتفضلوا يستلموا الماده الخام
ويدخلوها ماكينة الإبداع على مرحلتين
أولا تثبيت النص فى شكله النهائى فى قالب قصصى يكون الراوى محوره الرئيسى وأقترح مبدئيا أن يقوم أبو زهده بهذا الدور
ثانيا كتابة السيناريو
ثم بعد ذلك ندخل فى مرحلة التلحين
وتوزيع الأدوار الغنائيه والتمثيليه