كعب داير

[Tarek Elemary]

المشاركة الأصلية كتبت بواسطة علاء قدرى

صديقى الشاعر الجميل طارق(الرحالة)
جميلة جدا الرحلة
واجمل منها كلماتك البديعة ؛ ووصف المدن التى اجهل منها على الاخص وجه قبلى الذى نرى شخصيته فى رجالة التى تملا كل مكان فى مصر تبحث بجد و اخلاص عن لقمة العيش ؛ فاعرف ظنا لا يقينا طباع اهل الصعيد من تعاملى معهم
رحلة جميلة ؛ ووصف اجمل ؛ ولست مع اخى وصديقى المبدع ناصر دويدار الذى احبه كنفسى سوى فى اختيار العنوان لانه يوحى بالوجه الاخر ؛ وكدة تعادل ؛ وفيه وقت اضافى ؛ وضربات جزاء ؛ وعلى فكرة الحكم حتلاقية واخد رشوة على راى عم سعد الشرقاوى ؛ وارى ان تقام المبارة فى ارض محايدة (سويسرا مثلا ) او يستضيف المبارة استاذنا الكبير ابو زهده فى كندا
مجهود جميل يا فنان والاختلاف فى الراى ظاهرة صحية ؛ وقد تكون ميزة اضافية فى منتدانا الحبيب سماعى الذى نال احترام الجميع؛ وصار مثلا تحلم به جميع المنتديات
منتظر صافرة البدا لابداع جديد

الصديق القريب للنفس و القلب علاء أبوكريم (مش حسن شحاته)
قد تعرفنى يا صديقى أنا على أتم الإستعداد للإختلاف فى الرأى مع سكان مصر جميعاً دون أن يتأثر ودهم داخلى قيد أنملة فى ذات الآن، فاحترام من يختلف معك مقدم على مجرد كسب جولة فى نقاش حول موضوع أو فكرة أو رأى يمضى لحاله و يبقى من تختلف معه أبقى و أحق بكسبه هو فلا مكاسب فردية فى حوار بنَّاء ساعة إذٍ تكون المكاسب جماعية و للطرفين على حدٍ سواء
أما المباراة الفاصلة فنحن على أتم إستعداد للعبها فى أى مكان ماعدا جنوب إفريقيا و أبو دويدار فاهم ليه

[محمودسعد]

[QUOTE=Tarek Elemary;345980]

أسوان و إدفو يا سمارة
الأقصر معابد و حضارة
كوم أمبو و أبو سمبل أجمل
من النجوم الدوارة
***
و نجع حمادى يا أبطال
سلام لكل بطل شغال
أفوت على الغردقة و أرجع
أقول لقنا الشوق بطال
***
سوهاج تصبح على طهطا
بحب مش شغل أونطه
من البلينا الهوى جارف
واصل لبحرى فى السنطه
***
لا باخبى حبى و لا بادارى
من تانى راجع يا بدارى
أبدر على أسيوط حبى
و اطفى اشواقى ونارى
***
يا منفلوط شوفى قوصية
ديروط شباب مية المية
من ملوى لحد أبو قرقاص
المنيا هنا مستنية
***
صفت اللبن يا سمالوطى
مغاغة وافقت بشروطى
الفشن مال ع الدبابية
يا سويفى مانتش بمبوطى
***
من اللاهون رحت الفيوم
سواقى دايرة يوم ورا يوم
م الواسطى على جرزا نعدى
دهشور تبان فى نهاية اليوم
***
الصف لف شمال و يمين
عنيه تبص على التبين
حُط الرحال نرتاح حبة
حلوان تعدى للبدرشين
***
القلعة لبست فى الخانكة
الوايلى شارك بالشبكة
فى السيدة و مصر عتيقة
حلِّت على الخلق البركة
***
أنا جيت يا عتبة فى معادى
ويايا أزهار الوادى
روض الفرج حَضَن الساحل
حلى الضفاير يا معادى
***
ورد الحدايق كان رايق
ماهو كلنا أخوة شقايق
مصر الجديدة خدت نزهة
يا شبرا أنا دايماً عاشق
***
و شوقى زاد بقى تل كبير
آهين يا ناس من هوى أبوكبير
و قلبى فى الزقازيق زقزق
و الشمس من ميت غمر تغير
***
من السويس قلت يا فايد
يا بور فؤاد حبك زايد
فى بورسعيد شفت تاريخى
لقيتنى للقنطرة عايد
***
من السويس للأدبية
الفنجرى غالية عليَّا
و الطور تشاور تلاقينى
ع الباب و مهرها فى إيديَّا
***
رفح تقولَّك يا زويِّد
أنا فى العريش باشا و سيِّد
يا طابا طلى على نويبع
قابلينى فى الشرم نعيِّد
***
قليوب يا ماشية على قناطر
باسوس و برقاش و الحاجر
بهتيم لبلبيس بتنادى
فى طوخ ملوك جبر الخاطر
***
من بركة السبع قويسنا
و شبين تصبح على إسنا
بسيون على الفجر تجينا
تلاقينا مع طنطا نعسنا
***
زاد الحنين و صرخ شبرا
منصورة يا محلة يا كبرى
دسوق تروق تنده فوه
و الشيخ فى كَفْرُه كتب أوبرا
***
نسيت دموعى مع العياط
من كفر سعد أروح دمياط
شربين فى جمصة بتتعايق
الجربى على راس بره بساط
***
شربين ترجعنى لنبروه
و منوف فى قلب شبين هاتتوه
تلا تروح كفر الزيات
عاشق يا ناس ع الهوى دِلِّوه
***
تيه البارود ياأم الأدهم
يا كوم حمادة النار أرحم
من شوق لحوش عيسى كاوينى
فى شبراخيت صاحى و باحلم
***
رشيد يا بانية المجد قصور
عصفور و شقشق يا دمنهور
إدفينا إدكو مع البيضا
فى الطابية واقفين جنب السور
***
شال السيوف ع المعمورة
سيدى بشر ظهرت فى الصورة
يامندرة خبى عيونك
دى اسكندرية شمندورة
***
سموحة سيدى جابر حاير
يا رشدى و النورس طاير
الشاطبى ع المرسى يمسى
قبارى يا أحلى عشاير
***
عامرية مكس على العجمى
كوبرى التاريخ حافظ إسمى
حمام يا ضبعة و علمينك
هنا التاريخ شاهد رسمى
***
مطروح بتحضن فى السلوم
يا سيوة نادى بصوت مكتوم
على الفرافرة و على سينا
بلح باريس يحلى مع الصوم
***
أهى دى نجومك يا بلادى
زهور و مبدورة فـ وادى
يحلى الغنى مع بلدينا
يحلى الندا لما تنادى


تصدق ؟
هاتصدق انشاء الله
نفسي اسمع اللحن اللي انت لحنته وانت بتكتب الكلمات دي ؟
والنعمه ياعمري انت مغنيها
حتي صوتك بيرن في ودني وانا بقراها وكنت عاوز اتصل بمحمد منير واقولله الكلام اللي هنا ده ؟ بس مش معايا تليفونه ؟
بس برضه اللحن اللي في داخلك قولهولي والنبي

[Tarek Elemary]

المشاركة الأصلية كتبت بواسطة محمودسعد

تصدق ؟ هاتصدق انشاء الله
نفسي اسمع اللحن اللي انت لحنته وانت بتكتب الكلمات دي ؟
والنعمه ياعمري انت مغنيها حتي صوتك بيرن في ودني وانا بقراها وكنت عاوز اتصل بمحمد منير واقولله الكلام اللي هنا ده ؟ بس مش معايا تليفونه ؟
بس برضه اللحن اللي في داخلك قولهولي والنبي

حبيبى يا عم محمود و الله
طبعاً مصدق جداً كمان .... بس أنا نفسى تغنيها إنت زى ما تطلع معاك

المهم تكون عجبتك يا فنان يا مبدع

[رائد عبد السلام]

برضه العربية عملتها معايا....وجيت في الآخر
بس ملحوقة إن شاء الله

رائعة مشاعرك ياشاعر ياجميل

بس بااتفق مع علاء قدري حبيبي
وكمان مع الفارس : أبو مندور
والمصري القراري : ناصر دويدار

الموسيقي بتخللي الشعر لوحة راقصة
مش بس ألوان جميلة..

يسلم إبداعك يا ابن النيل
الشهير بطارق العمري

[Tarek Elemary]

عم رائد .......... إنت تيجى فى أى وقت، البيت بيتك تيجى العاشرة مساءاً و تفضل تسعين دقيقة أو 48 ساعة كأى واحد من الناس
براحتك يا عم ما هو إنت رئيس التحرير و بتكتب بقلم رصاص