العاشق لما يكون غاوي

**NAHID 76** · #1 28/07/2009, 20h57

بسم الله الرحمن الرحيم
الغنائى علاء ياسين
تصور معى محمد رشدى وهو بيغنى وبيقول بالموال
أه والعاااااشق لما يكون غااااوى
جميل الكوبليه ده وكل الأغنيه جميله والرتم ماشى فى انسجام واحد
تحياتى أيها الموهوب ونحن فى الأنتظار
وشوف أخوك ايهاب كاتب لك أيه
أنت كسبت ايهاب فى تجارب أدبيه وعرفنا نشد رجله لتجارب أدبيه

دى ورده لايهاب اللى مشرفنا
تحياتى

**علاء طه ياسين** · #2 29/07/2009, 12h49

الأب الحنون الغالي
د. أنس

أنا بقا اللي ..
عودت عيني علي رؤياك ..
كل موضوع جيد بقا برد حلو منك ..
فلو مش أجدت ف قصيدة ..
رد برضو ولسوعني بكرباج كلامك ..
....
من ناحية مقامات التلحين ..
اسمح لي أرفع هذه الاستغاثة إلي الملحنين ..
...
انتوا يا بتوع الآلآت
الربابة والنايات
لحنوا لي غنوة واحدة
ولاّ محتاجة حسابات ؟؟

انا باكتب في العواطف
حاكيًا كل المواقف
اللي بتثير العواصف
جوه ف قلوب البنات

لو ف أيام الحامولي
كانوا قَطْعًا لحنولي
اعمل ايه ياناس قولولي
يعني اسرح بملايات ؟
.....
أنا متشكر جدا ليك يا د. أنس
علي غمرك ليا بعطفك وكرمك
اقبل مني هاته الزهرة
ابنك
علاء

**علاء طه ياسين** · #3 29/07/2009, 12h56

أخي
الأستاذ الفاضل
إيهاب عامر

ردك جميل يروي عطاشا ..
ويملي دنيايا بشاشة ..
ومش عاوزها تكون مرة ..
بعدين تطنشنا يا باشا ..
...
اقبل مني وردة
هي مني لصداقة وحب دائم
علاء

**علاء طه ياسين** · #4 29/07/2009, 13h07

الفاضل ..
الرائع ..
أخي ..
علاء قدري
.......................
بجد ومش هزار
إنتم شعراء كبار
أساتذة مخضرمين
ليكم كل اعتبار
بنقرالكم يا سيدنا
بنحس بالانبهار
تمشوا قدامنا واحنا
نمشي علي الآثار
................................
شكرا جدا علي ردك اللي أسعدني ..
واسمع مني ..
وقول ..

قلب العاشق فدائي
بيقول العشق دائي
وبين حائي وبائي
انا راضي أموت قتيل
يتكعبل في المهالك
وبيهدم الممالك
ولو طريقه سالك
الخطوة بألف ميل
........................
نقول غير كده
........................
العشق مرض غبائي
ومن اولي ابتدائي
قولتله دع سمائي
مش عاوز اموت قتيل
ومادام هذا كذلك
مالي إذن ومالِك
يا ام العيون ممالك
ما تضحكيش لأميل
..........................
تقبل مني بكل رضا حب هذه الوردة
لأنني أقدمها لك بكل رضا وحب
.................
علاء

**علاء طه ياسين** · #5 29/07/2009, 13h17

حبيبي وأخي حمدي ..
..........................
دي آخر حتة كتبتها .. هدية ليك ..
.............................
انتي ف قلبي من جواه
ياللي هوي عيونك أغواه
والعطر ف شعرك أغراه
رغم البعد ورغم الآه

يا نسيم داير في الأكوان
انتي ف قلبي قمر عطشان
واللي شابكنا ف بعض الآن
جرح يا حلوة انتي دواه
................................
عارفك بتحب الشعر جدا ..
انت زيي ..
بتحب الحب وشعر الحب ..

واتمني علي الله تعالي
أن يدوم هذا الحب الذي هو في الله ..
يدوم إلي الأبد ..
ولا ينقطع ..

جمعنا الله معك علي خير
اقبل هديتي
علاء

**علاء طه ياسين** · #6 29/07/2009, 13h28

المدهشة الإطلالة
مدام ناهد

....
...
..
.
طبعا مش يحلي أي موضوع من مواضيعي ..
إلا بوجودك ..
الوردة دي ليكي مني
تعبير عن المودة والاعتراف بالجميل ..
أما أخونا الأستاذ إيهاب ..
فشرفني وجوده ورده علي موضوعي ..
وباتمني أشوفه دايما ..
وأسعد برأيه ..
............
طبعا .. عدي العمر .. وسرقتنا السنين ..
وافتكرتها .. وكتبت لها دي ..
واسمحيلي اهديهالك يا مدام ناهد ..
........
الدنيا ساعات بتفرقنا
تسرق أحلامنا وتسرقنا
وف بحر الحزن تغرقنا
وتفوت أيامنا وتعدي

ونعيش انا وانتي ف حكاية
ملهاش لابداية ولا نهاية
وتشيب في الراس 100 شعراية
ولا حيلتي حاجة ولا بيدي

والقلب مازال قلب العيّل
لو شافك تضحكي بيميّل
وباحس الكون كله قليّل
لما بايدك تلمسي خدي

مدام ناهد
دامت لكم الصحة والعافية في ظل أسرتكم السعيدة..
علاء

**سعدالشرقاوى** · #7 30/07/2009, 13h35

شقيق روحى الاستاذ/علاء طه
معلهش يا علوه غصب عنى النت الهوائى مزهقنى شويه
وبيوصلنى نصف ساعه كل 100ساعه
ولم اتمكن من المشاركة والردود
وانت عارف صاحبك شايل حاجات يامه ربنا يعطيك العافية
والحياة قاسيه من غير مراره ولوز وزايده واشياء كتيره
نحمدالله على كل حال
فمعزرة لغيابى عليك وردى على هذه الابداعة العظيمه
والتى تعودنا دائما على امثالها من المبدع علاء
واستمتعت بردود الاخوه اللى كلهم يكنون لك التقدير
ياريت ما تسيبناش تانى

**farida91** · #8 01/08/2009, 11h42

جميلة جدا كلماتك
تسلم يمنااك

**علاء طه ياسين** · #9 01/08/2009, 13h24

الفاضلة
farida

أرحب بك ترحيبا يليق بحضورك لأول مرة في مواضيعي
بإهدائك هذه الزهرة

فاقبليها
.....
وأشكرك جدا علي إطرائك لكلماتي
وأتمني أن تكون أدخلت سعادة إلي قلوب الجميع
....
وأدعو الله أن يحفظك دائما
ونود رؤيتك دائما ناقدة ومشجعة
شكرا لك
علاء

**عفاف سليمان** · #10 03/08/2009, 13h51

اقتباس:

المشاركة الأصلية كتبت بواسطة د أنس البن

يا سلام يا سى علاء على كده نغم

تعرف انى شايفها من مقام كرد
حاجه كده زى عودت عينى بتاعت الست

طيب اقول انا ايه بعد كلام استاذنا واديبنا الدكتور الجميل د أنس
الله يسعدك كما بتسعد عيونا بكلماتك الجميله الغنائيه
فين الملحننين يا ناس يلحنوا
الله يسعدك دائما بالخير
تحياتى لابداعك واحساسك المرهف الجميل
واوقات سعيده فى سماعنا الجميل
اختكم عفاف