الــســاقطــيـن

**علاء قدرى** · #1 28/07/2009, 00h04

اقتباس:

المشاركة الأصلية كتبت بواسطة ناصر دويدار

الساقطين
سقطنا فى الإمتحان
مع إننا غشينا فى كل المواد
برشمنا صورة الخرايط
وعناوين البلاد
ومبادئ الثورات
ونتايج الأعداد
وضحكة الحكام
برشمنا إن وكان
برشمنا أفعال الخيانة
برشمنا إعراب الشعوب
والنصب والمنصوب
والجر والمجرور
والضم والمكسور
برشمنا أناشيد الخطابة
وقصايد المتنبى
وألف ليلة وليلة
وقصصنا الطويلة
وشجرة العيلة
برشمنا صوت الادان
ودعوة المظلوم
برشمنا الشهادة
والزكاة والصوم
برشمنا أركان العبادة
كتبنا ع الجدران ... علب السجاير
ورقة الكبريت والتُخت والمساطر والبلاط
كتبنا ع الدراعات والكتف والكفين
برشمنا كل الأمتحان
تحت العقال والطرحة والمناديل
والكاب وعلبة المكياج
برشمنا كل المواد تحت الحزام
برشمنا صيغة أستأذان
ندخل الحمّام نغش م البرشام
برشمنا كل الكلام
وسقطنا فى الأمتحان
قُلنا أعتمدنا عليك يا غش
قُلنا أعتمدنا على طيبة الأعداء
والضحك ف الوش
وخوزايق الوراء
قلنا أعتمدنا ع الشطارة والطهارة
والفرس والسيف
قُلنا أعتمدنا ع الأصدقاء العزاز
والمراقبين اللذاذ
سقطنا ف الأمتحان
والكحك مالى الشهادة
والأكادة لسه بنقاوح
وكاتبين أستمارة أحتجاج للوزارة
لسانا معترضين أننا كتبنا الإجابة
لسانا مش عارفين أننا برشمنا (الغباوة)
لسانا مش عايزين نصدق أننا أصبحنا أمة
ف (الطراوة)
سقطنا فى إمتحان الكرامة
ونجحنا فى اللعب مع بعضينا
سيجه وبلى ف (الخرابة)
لسانا مش عايزين نصدق
أننا نجحنا فى (الخيابة)
وضحكت علينا العصابة
ومسكتنا الربابة
لسانا مش فاهمين
أن السنة جريت
وأن أحنا ما حضرناش
ولا حصة ف المدرسة
هربنا طول السنة
ف ضلمة السيما
ودفعنا مصاريف الأساتذة
وأزايز الوسكى
وورنيش الجزم للأصدقاء
ومعجون السنان
والتورتة ف أعياد الميلاد
للقطط والكلاب
وطلقة الرصاص لأطفال
فلسطين والعراق
دفعنا فواتير الجنازة
والكفن والنعش
لسانا مش فاهمين
أن السنة جريت
وأن أحنا ما حضرناش
ولاحصة ف المدرسة
بلطجنا ف بيوتنا
نمص ف الأفيون
نغض طرف العيون
عن حركة الجريان
نعدل مع النسوان
ف جدول الأسبوع
ونعشق الغلمان
نرافق الخدامات
ونمشى ف الجنازات
نصوم نهار رمضان
نفطر ع التمرة
ونحج بيت الله
وننام مع الأعداء
لسانا مش حاسيين
أن السنة فاتت
والنخوة والعزة
ف بداية الحصة
على التخت ماتت
رفدونا م المدرسة
كنا صحاب الوطن
بقينا ف الشارع
عامليين كورال مدرسى
بنردد الأناشيد

حنخش الأمتحان من تانى بالبرشام
ونعيد السنة الجاية فى مدرسة السلام

وعليكم السلام
عليكم السلام
يا أيها الساقطين 50 سنة قدام

وعليكم السلام ؛لا الاستسلام
ايها الشاعر الرافض لكل رخيص ؛ ودعاوى الزيف و البهتان؛ والضحك على الذقون ؛ ودفن الراس كالنعام؛
ايها الحالم بعالم قرانا عنه و لم نراه؛
كل شئ تحول فى عالمنا الى برشامة ؛ نختزل كل شئ؛ التاريخ؛ الوطن ؛الحلم ؛الانسان؛ ((انسان التيك اوى) ؛ لا قيمة تستقر داخله ؛ لا حلم ينمو لنراة حقيقة ؛ فقدنا كل شئ بدعوى اننا تفهم كل شئ؛ فاصبحنا لا شئ ؛ (كالموتى او كرؤية عابرة) نعم سقطنا فى الامتحان ؛ اصبحنا امة تهان ؛حين تركنا الصدق ؛ ودعونا للبهتان ؛ نصفق للحاوى و المخاوى
والالعبان ؛ حين اصبحت كل الوجوه متشابهه ؛ وكل الاغانى تافهة ؛ كل الجوائز للغوانى و الراقصات ؛ ونسينا عطاء كل ايدى طاهرة ؛ نعم سقطنا ؛ حين راينا الشرفاء فى ذيل القائمة ؛ سقطنا حين اغتيل جمال حمدان ؛ والمشد ؛ واصبحت الراقصات سفيرات مصر للنوايا الحسنة ؟؟؟؟
كلماتك تفضحنا
فهل نعيد قراءة الاسئلة؟؟؟؟؟؟
تبا لنا ...تبا لنا

**د أنس البن** · #2 28/07/2009, 15h08

هذه ليست قصيده
بل هى الصفه التشريحيه أو قل تقرير طب شرعى
لواقعنا الأليم المؤسف المزرى
قام به مشرط جراح متمكن لباطن حالنا المزرى البائس وما صرنا إليه
للأسف الشديد هذا هو الواقع الذى لا نعترف به لبشاعته وشناعته
الله يسامحك يا عم ناصر ويسامحنا معاك
هيه دى الحقيقه للأسف يا رجاله

**ناصر دويدار** · #3 28/07/2009, 16h26

إلى تاجر السعادة أبوتريكة المنتدى علاء قدرى أنا أتفاجئت برد فعلك السريع تجاه (الساقطين)
أنا مبسوط جداً إنى لاقيت ناس تلعن أبو الساقطين معايا وربنا يرجع لنا كل أستاذ بيشرح بضمير عشان الأولاد اللى ذاكروا طول السنة ينجحوا أحسن كده مش هنلاقى حد ف المدرسة محترم
شكــــــــــــراً على الاستجابة السريعة

**ناصر دويدار** · #4 28/07/2009, 16h29

دكتور أنس رئيس قسم الجراحة ف المنتدى الراجل اللى بيحاول يجمل كل شئ حواليه انا كل ما بشوف صورتك بفتكر شخصية أبو العلا البشرى ف رواية أسامة أنور عكاشة
معلش ده نصيبنا وقدرنا لازم نقاوم ونفتش عن الحب والحرية والخلود أجمل تحية منى ليك يا أستاذنا