نِجم الجيل أو جَبَلْ الفَنْ
صرصار فى الودنين بِيْزِنْ
قَصَّة و لُوكْ وحَبِة مَيك اب
شَكل و سِيما الواد الجِنْ
***
نَحنُوح سَافل آخِر حاجَة
و بْيِلْمَع و الشَعْر ألاجَة
أما الصوت بقى حاجة بِتْسَرسَع
هِىَّ الناس لِلصوت مِحْتَاجَة؟!!
***
يِكْفِينا الطَّلة و تَسْرِيحْتُه
ولَّا طريقة لِبْسُة و رِيحْتُه
ولَّا المُزَزْ الِّلى بْتِتْرَمَّى
على عربيته يا حَظُّه يا بَخْتُه
***
بَقَى نِجْم ف سيما و إعْلان
قبل الإسم لَقَبْ فَنَّان
و مجلات و جوايز يامه
و نْسِينَا شَجِّىْ الألحان
***
فِرِغْ الفَنْ من المضمون
كُلُّه بيلعب ع المضمون
و تهون المقامات و المغْنَى
و التَطْرِيب و الحَرْف يْهُون
***
ده بقى حال الفن و حالى
التافه بقى فوق فى العالى
و الأصلى المتأصَّل فنه
ضايع مُتَرَدِى الأحْوالِ
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
المطرب العاطفى
العرض الشجري