محمود بيرم التونسي

**غواص النغم** · #21 09/07/2009, 20h49

سلم علي

خلاني في القهوة وجاني.....ومن ورايا غماني
وقال لي قول لي مين آني....حبيبي..سلم علي

*******

هزار رعاع مش من وقْمِي...ولا وقْم أبويا ولا امي
طول عمري في همي وغمي..حبيبي..سلم علي

*******

قال لي رأيتك متدعبل......حلفت من الأتوبيس انزل
قلت استريح قال مستعجل...حبيبي ..سلم علي

*******

ونط في أتوبيس غيره.....ونا قول كتر خيره
لجلي نزل وقطع سيره....حبيبي ..سلم علي

*******

بقيت أفسَّر وأخمن.......على الأديب اللي تجنن
سنه أربعين لو يتسنِّن....حبيبي ..سلم علي

*******

ناديت على التاكسي اسم الله..وقلت باب اللوق ياللا
المحفظة عوض على الله..حبيبي..سلم علي

*******

محفظتي شالها من جيبي..وقال دي غاية مطلوبي
فيها أربعه جنيه يا حبيبي..حبيبي .. سلم علي

*******

سلم وهو مغميني .......ومغطي عيني وجبيني
بإيد.. وإيد بتقلِّيني......حبيبي ..سلم علي

*******

حلفت لاكتب أوصافه ....طوله وعرضه وخلافه
عشان يشوفه اللي ماشافه..حبيبي ..سلم علي

*******

طويل في طول صاري الرايه..ممصوص في لون الحربايه
وعنيه في حجم اللبايه ........ حبيبي ..سلم علي

*******

غراب، وله نطه وطيره .....على القهاوي المشهورة
يحضن ويرجع بذخيره .......حبيبي سلم علي

بيرم التونسي