حبيبتي

**علاء طه ياسين** · #1 14/06/2009, 11h53

الأخت الفاضلة / عفاف
علم وسينفذ يا افندم ..
وزي ما قولت للأستاذ طارق العمري الحمد لله إن فيه في المنتدي مشاعر من الأخوة الصادقة والنقد الهادف البناء .. لو لقيوك حودت عن طريقة يرجعوك للصواب .. شكرا جدا ليكي ..
وعلشان خاطرك .. أقول ..

أيوة يا أحلي بنات الحــور
جوه ف قلبي ناي مكسـور
وأنا بعدك رايح اسكت خالص
وأحرم قلبي الهوا والنـور

أنا من بعدك مش راح أغني
لكن هأفضل أحلم إنـــي
سايب حتة ف قلبك منــي
ذكري لحب بريء مهجـور

أنا من بعدك هأمشي مْغَمِّـي
حزن الدنيا بيجري ف دمي
هأحضن همك وأحضن همي
وافضل تايه وسط بحــور

أنا من بعدك دمعي ف عيني
كل حنين الدنيا مالينـــي
مهما وحشتك ووحشتينــي
بيني وبينك مليون ســور

أنا من بعدك هأحضن خوفي
وهأضفّر باليأس حروفـي
وهأشيلك وشم علي كفوفي
مهما بينا الأرض تـــدور

علاء ياسين

**عفاف سليمان** · #2 14/06/2009, 14h23

خساره يا استاذ علاء
ان محدش شاف الكلام ده ويغنيه
فينك يا محمد يا منير والله كلام يليق على صوته
ربنا يسعد اوقاتك بالخير يارب واحنا هنا اخوات فى الله
واكيد نحب ان اللى يكون فى سماعى يجود لنا بكل ما عنده ولا يخل علينا وفى نفس الوقت
يكون فى القالب الخاص به وبردوا دا ميمنعش من التنوع لانى كما قلت لك التنوع مطلوب
وحلوه كلماتك الرقيقه دى
ويارب يديم علينا سماعى واسرة سماعى بالخير
تحياتى لك وللجميع
اختكم عفاف

**علاء طه ياسين** · #3 16/06/2009, 12h09

الأخت الفاضلة / عفاف

شكرا شكرا .. محمد منير خبط لزق .. حتة واحدة .. الله يسترك ..
أما من ناحية الكتابة .. أنا بأكتب أحاسيس ومشاعر ..
ومش أعرف أكون غيري ..
معرفشي إلا أكتب الحب .. أو الردود الارتجالية في الأمور العامة ..
حاولت أكتب تاريخي فشلت ..
أكتب ديني أو صوفي غرقت في بحور التوهة ..
أكتب سياسي مليش في اللعبة دي .. دي ليها أربابها ..
صحيح التنوع مطلوب .. بس أعمل ايه ..
عموما ..
طول عمر قلبي بيحلم .. وبيصحي م الأحلام
تايه ف سكة ندم .. غرقان ف بحر آلام
والدنيا غابة كبيرة .. أشجارها طارحة الشوك
والحب دايما بيكسب .. بس ف الأفلام

علاء

**سعدالشرقاوى** · #4 16/06/2009, 13h26

الاستاذ/علاء طه ياسين
واخيرا فتحت الصفحه
ولقيتنى دخلت 100صفحه
عمّال تضخ اغانى واشعار عظيمه
عينى عليك بارده
اقول ايه واللا اعمل زى واحد
علاء00علاء00يحيا علاء00
يا بنت ياللي بتخجل ... وبتتكسف مني
وقلبها العطشان ... ع النهر مستني
املي الكفوف اشربي ... يابنت واسقيني
بلاش تسيبي الجروح ... توجع وتألمني
.................................................. .....
يابنت ياللي النجوم ... بتغنى حواليكى
وكمان عيون القمر ... بتبص ف عنيكى
مش قولت ما تكلميش ... مع حد ف غيابي
مبتسمعيش الكلام ... طب أعمل ايه فيكي ؟
رياح جنوبيه
وعواصف عاطفيه
وحوارات وتوريه
واستعارات مكينيه
وتشبيهات بديهيه
وندوات ثقافيه
وشلا لات شعريه
واقول ايه
واللا ايه

استاذن شويه

**علاء طه ياسين** · #5 16/06/2009, 18h47

حبيبي وتوأمي .. الشرقاوي

لا يا حبيبي .. أنا أروح فين جنبك ..
أنا يدوبك علي أدي .. بأقف جون ..
أما إنت بتلعب صانع ألعاب .. بتوزع .. وتقسم ..
خد دي ..
.............................
نزل الندي ف الفجر .. يغسل ضفايرها
والشمس قبل أما تطلع .. لازم تشاورها
ورافضة بنت الإيه .. تقوللي حبيتك
مع إنها عاشقة .. كاتمة مشاعرها
.............................
بالراحة بالراحة .. جايلك علي مهلي
عديت عشانك بلاد .. وبلاد .. وتستاهلي
والحب مش محتاج .. منهج ولا تدريس
نفسي في قلبك بس .. يضحك ويندهلي
..........................
كفاية كده ..
علاء

**Tarek Elemary** · #6 18/06/2009, 06h53

اقتباس:

المشاركة الأصلية كتبت بواسطة علاء طه ياسين

نزل الندي ف الفجر .. يغسل ضفايرها
والشمس قبل أما تطلع .. لازم تشاورها
ورافضة بنت الإيه .. تقوللي حبيتك
مع إنها عاشقة .. (لكن) كاتمة مشاعرها
.............................
بالراحة بالراحة (بالأشواق) .. جايلك علي مهلي
عديت عشانك بلاد .. وبلاد .. وتستاهلي
والحب مش محتاج .. منهج ولا تدريس
نفسي في (إن) قلبك بس .. يضحك ويندهلي

طبعا هاتسمحلى بالتعديل الصغير ده

**علاء طه ياسين** · #7 18/06/2009, 16h35

الأخد الكبير / طارق العمري
دا أنا أتشرف مش اسمح وبس ..
تعديلك في محله ..
موافق ..
علاء