التعلق بالكبار من المكارم

**Tarek Elemary** · #1 08/06/2009, 17h48

إن كنت ... فانت السبب
و ده شرعنا فى الأدب
نحفــــظ مقام الكبــــير
و نصدق اللى إنكتب
***
و المرء على دين خليله
و إن فارقه حتما يجيله
ياخده فى حضنه بحنان
و إن كان صغير يشيله
***
و إنت الإمام و المقام
مش كلمتين و السلام
و قربى منك حلال
و بعادى عنك حرام
***
يا نجم ساكن فــــــــوق
ساطع فى عز الشروق
النور يدارى النجوم
و انت فـ مدار الشوق
***
و رضاك ده يوم المنى
و الكلمة منك سنا
يا بدر طول السنة
يرضينى منك ضنى
مش بس فرح و هنا!!
***
أصل الضنى مـ الوجد
يا بو الطريق و العهد
و لا يوم يشيل قلبى منك
و أنا مين يصون الوعد

**Tarek Elemary** · #2 16/07/2009, 09h40

تعليقاً على رائعته ((حاضر))
==============

*
*
منك إنت الشعر يهرب؟!!
أمال إحنا نعمل أيه؟
دا الخيال منك بيشرب
يرتوى و تعطف عليه
إنت توّْحى و هوَّ يكتب
تصرخ الدهشه فـ عنيه
و الحروف تنزل تسرسب
لحن أيْه و شعر أيْه!!
عمر شِعْرَك يوم ما يِغْلَب
لو شَرَد إنت تناديه
ييجى خجلان لما تِعْتِب
يطلب سماح و تفيض عنيه

**yosry_at** · #3 19/07/2009, 17h30

أنا ليه بقيت زى الجميع ما تهزنيش كلمة وطن
ما بقيتش أشعر بالأمان ما بقتش فيه حالة شجن
أصل الوطن مش طوب و طين و مية جارية فى الترع
كلمة وطن كانت زمان كانت أمان كانت سكن
كانت مشاعر فى الشوارع فى الغيطان بين الجيران
كانت سواعد فى النهار بتضم بالحب العيدان
كانت عيون سهرانة صاحية ع الحدود رغم البعاد
كانت زغاريد الصبايا والبنات عند الفرح كانت أدان

كلام معسول وله معنى
مع احترامى الشديد لراى الدكتور انس فىموضوع التفائل الا ان الاوضاع والازمنه تتغير وهذا تنفيث لواقع نعيش فيه تحيه من القلب لك يااستاذ طارق ولكل من شارك فى هذا الموضوع
يسرى عطيه

**abuzahda** · #4 20/07/2009, 01h17

أخي الجميل
و شاعِري المحبوب
طارق العمري

هل أعتذر عن تقصيري في الحضور إلى هنا ؟

متهيألي مِش كفاية (و يا عالم ، كمان ، هتقبل اعتذاري ولا لأ ؟)

أنا شايف إننا نتجاوز حكاية الإعتذار دي (علشان مُحرجة شويّة) لغاية ما ارجع لأول صفحة و اجيلك

( لأ ... ماتستنانيش ، علشان انا ناوي أتأخر )

**Tarek Elemary** · #5 20/07/2009, 06h58

الإنسان الذى لا يزال يدهشنى و يمتعنى و يغنينى بأبعاده العميقة و يبهرنى بإكتشافاته و يفاجئنى بروائعه و يغرقنى فى كرمه و يغدق علىَّ بما لست له أهلاً
كرمك الحاتمى لا سبيل لى لرد جزء منه كافأك الله بما هو و أنت له أهلاً فهو القادر على أن يوفيك حقك و هو الأعلم بما تستحق
يعنى منك لله أنا بره الموضوع

**علاء طه ياسين** · #6 20/07/2009, 19h27

أخويا الكبير / طارق

أنا لو بقيت شاعر
كله بتشجيعك
بصراحة تستاهل
تثبيت مواضيعك

طبعا أنا أبارك لك علي تثبيت موضوع أعمالك الحلوة ..
وأعتذر لك وللجميع عن سوء أدبي في الرد ..
فاقبلوه ..
دخلت علي أعمالك المثبته وحبيت أكتب تعليق هناك ..
لقيت الموضوع closed
مش عرفت أرد عليك إزاي ..
فكتبت لك الكلمة البسيطة دي هنا ..
اقبلها من أخوك الصغير ..
علاء

**Tarek Elemary** · #7 20/07/2009, 06h52

أستاذنا / يسرى عطية
شرفت بمرورك .... دام عطاؤك .... و دامت المودة
تقبل تحياتى