عمي اسماعين(رقم2)

**سعدالشرقاوى** · #1 02/06/2009, 08h42

استاذ/طارق
انت اللى ح تقابل الضيوف
اعمل اللى انت عايزه
هيّا اساسا التوته على لحف غيطك

**مختار الحسانين** · #2 02/06/2009, 08h57

أنا حسيت أن القصيدة دى وحشتنى

قلت أقراها تانى الصبح النهاردة

يا أخوانا عايزين نحافظ على المواهب الجامدة دى

وان شاء الله فى محاولة عمل اى دوان باسم المنتدى لتجميع ما كتب فيه من اشعار أكون معكم فى المساهمة باى شئ .

أهم شئ فى هذا القسم من المنتدى أن لكل عضو طعم ولون وريحة مختلفة فى تصوره لأحداث الحياة ، اما نظرة الحاج سعيد فهى مختلفة لأنها تعصر لنا روح الريف المصرى الجميل وتظهره لنا فى شكل جميل وقريب إلى القلب .

وفكرة الشخصيات الريفية التى تحكى من خلال قصائدك فكرة جديدة وبديعة ، لأنها عبارة عن مونولوج وحوار رائع

**سعدالشرقاوى** · #3 02/06/2009, 09h46

اخى الاستاذ/مختارالحسانين
والله انا معك
فيما تفكر
وانت انسان محترم وزوّاق
وموهوب
وصاحب خلق رفيع
(سعد لك) ( سعيد بك)

**علاء طه ياسين** · #4 02/06/2009, 10h46

جالك برد ياخال .. يوه ياندامة
دا انت من الأبطال .. وبتتحمل ياما
هزموك حبة برد ..
كده خلوك تتهد ..
شد الحيل أمال .. ألف سلامة
لو عرفت إنك بعافية كنت جيت زورتك .. حمدالله علي سلامتك ..
علاء

**سعدالشرقاوى** · #5 02/06/2009, 12h48

اخى /علاء
لمّا لقيت تليفونك جانى
وانا عيّان وملازم البيت
,,,
رنّة جرسه ف لحظه نادانى
وسحب ايدى لحدّ الغيط
,,,
بعد طريقى نشفّ ريقى
واتحمّلت الصعب وجيت
,,,
عشان احكيلك ع اللى جرالى
لازم تسمع اخر بيت
,,,
لمّا لقيتك ربّى شفانى
وحسّيت انّى خلاص خفيّت
,,,سعد

**علاء طه ياسين** · #6 02/06/2009, 14h13

أخي / سعد
بأحمد ربي وبشكر فضله ..
إنك صحصحت وخفيت ..
انا رنيت طولت الرنة ..
اه يا حبيبي واستنيت ..
حسيت إن الدنيا احلوت ..
لما عليا ياخال رديت ..
أجمل حاجة في يومي سمعتك ..
انا بيك يا حبيبي استكفيت ..
لو حضرتي كان صاحب خطوة
كنت ف لحظة قوام خطيت
وتشوفني وانا قاعد جنبك
نشرب قهوة جنب الغيط
علاء

**محمد المراغى** · #7 02/06/2009, 17h21

حبيب القلب والعين واستاذنا سعد
الاسم سعد لكن ........ النبأ شرقاوى
يحكى حكاوى وهو بطلها ... والراوى
ده محترف ياناس مش غاوى ولا هاوى
الله عليك يا جدع .... بعدك انا مساوى
تحياتى لك يا حج
وتحياتى للحج اسماعيل