رد: طلبات نوتة
احبائى
اولا ابدأ بتقديم اسمى آيات الشكر إلى اخى الاستاذ نور الصباح اشكرك من كل قلبى على رسالتك الرقيقة والمشكلة ان هذا الإمتحان انا اعتبره اسخف امتحان فى حياتى , انا كنت طول عمرى طالب مجتهد ولكن زمان كانت الإمتحانات مقننة
وهذا الإمتحان لم يقصد منه إلا اهانة الكبار وحتى لا يبين مستوى الصغار والجدد من المعلمين يعنى لو سألونى عن اختبار يبين مدى كفاءة المعلمين كنت حقول لهم افكار يستفيد منها اولا المعلمين وثانيا الطلبة وثالثاً الدولة ورابعاً العملية التعليمية عن بكرة ابيها لأنها الخير الوحيد لإستمرارية دولة قوية مش باللماضة ولا الفكاكة ولكن بالعلم الصحيح .
المهم اقدم لك هنا احد النوت التى طلبتها وللعلم اللحن ده انا اول مرة ادونه او اتعامل معه يعنى كنت بسمعه فى الراديو زمان من بعيد لبعيد ولن ما عزفتش مع ماهر العطار غير مرتين تلاتة فى تسجيلات استوديو مع الفرقة الماسية وانا دايما مش بخبى على اصدقائى شىء لأن كل اللى بحب اقوله او بفكر فيه بيعتبر درس للميتدئين , انا بصراحة قبل ما ادون اللحن كنت مستهيفه او على الأقل كنت حاسس انه سهل جدا وحاكتبه بسرعة لكن لما ابتديت ادونه حسيت انه صعب جدا
وده بيؤكد نظرية من نظرياتى ان اللحن زمان حتى ولو صغير ولو لمطرب صغير مش كبير زى عبد الحليم كان الملحن بيضع فيه اقصى امكانيات ممكنة , يعنى بإختصار اى ملحن كان فى اى لحن بيضع فيه كل امكانياته
وردا على الأساتذة محمد سرحان وارماندو
كلامكم بيؤيد نظريتى ان اهم شىء فى التدوين تسهيل الكتابة والعملية مش فرد عضلات او استعراض شطارة
واهم شىء اعتقد انكم تعلمتموه منى هو ان النوتة لأى لحن ممكن كتابتها بطريقة سهلة وكتابتها بطريقة صعبة
والمضمون فى الطريقتين واحد ولكن خطورة الصعبة كما قلتم انتم ممكن العازف المبتدى لايستطيع الإستمرار او يحدث له احباط يعنى فى النوت التى رأيناها الدوبل كروش والتريبل كروش وبالذات التريبل كروش علامة غير مرغوب فيها فى الموسيقى العربية إلا فى حالة الضرورة القصوى وهى عندما تكون التفعيلة من صلب اللحن يعنى لو بسطتها تفقد الجملة شىء خطير من نكهتها وللعلم تلك الحادثة نادرة جداً فى الموسيقى العربية يعنى حتى لو حدثت تحدث مرة او مرتين فقط فى اللحن الواحد وساعتها تكون مقبولة لأن سبب وضع العلامة الصعبة يكون وجيها ولذلك سر مهم : ان العلامة الصعبة هنا تعبر عن جزء جميل جدا فى الجملة للك المستعمل للنوتة يحبها ويحاول اجادتها
المهم انا سعيد انكم توافقون على نظرياتى واترككم على خير عشان عندى مذاكرة
|
العرض الشجري