سوَّاق التاكسى يا جمالُه
الله يِيَسَّر حالنا و حاله
و الشرطى الواقِفْ فى الشارع
أجدع منُّه بِجَدْ خياله
***
تشاور يفتحلك تحقيق
و كأنه له سير و طريق
يختار المشوار بمزاجه
و لابد يآنسَكْ برفيق
***
وان قلت العدَّاد يا أخينا
هايقُولَّك إنزِل هَوِّينا
دانت زبون م العصر الحجرى
آخرَكْ تركَبْ حَنطور نَينَه
***
هايقَاوْلَك من قبل ما تركب
و أمَّا هاتوصل تانى ها تِتْعَب
هَايْجَّرَّس أهلك بفضيحة
أحسن تدفع و إوعَاكْ تِغْضَب
***
إستغلال و بَجَاحَة و فِرْدة
و التاكسى يا زيستافا يا قِرْدَة
اللِّى يِحِب النبى يِدِّيها
زَقَّة هانوصل واحدة بواحدة
***
ده بقى حال الكل وحالى
و لا هاتخلِّلى رخيص ولا غالى
لو عندك مَوْعِد و ضرورى
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
سوَّاق التاكسى
العرض الشجري