أغــــرب المخلـوقـــات !!

[M O H A M E D]

المشاركة الأصلية كتبت بواسطة unicorn

زى ما قال الباشمهندس محمد على , يا سلامونى

كل السلبيات الخٌلُقية اللى ذكرتها فى ابياتك , هى مقومات نجاح هذا العصر
و ان كانت لا تظهر بهذا الوضوح الشديد فى وصفك , و لا تتجمع كل هذه الصفات السيئة فى شخص واحد بهذه الصورة البشعة ,
الا انها موجودة بالفعل ,
سلامون , وصفك لهذه الصفات السيئة و تبشيعها بهذه الصورة دليل على نقاء سريرتك و دليل على نفورك من الزيف بكل صوره .
بس برضه دماغك ناشفة اوى.

صديقي أبو مندور
طبعاً صعب ، بل مستحيل كل الصفات دي تتجمع في شخص واحد
و لو اجتمعت في حد بالصورة دي أحسن له يروح ينتحر
و النجاح لو بييجي بالأسلوب ده يبقى لا مؤاخذة ( ط.. ) فيه
و عارف اني دماغي ناشفة اوي بس تقصد ايه بالظبط ؟
اوعى يكون حاجة بخصوص الوزن !!

[unicorn]

المشاركة الأصلية كتبت بواسطة محمد السلاموني

اوعى يكون حاجة بخصوص الوزن !!

ايوة يا سيدى

[NAHID 76]

بسم الله الرحمن الرحيم
الفاضل د محمد السلامونى
أضم صوتى لصوت أستاذى محمد على القناديلى باشا
فى أن كل ما ذكرت هى
مفاتيح النجاح لهذا العصر
تحياتى

[M O H A M E D]

يا ريت يا ابو مندور تحدد لي مواضع الخلل في الوزن من وجهة نظرك
و يهمني أعرف رأي أساتذتنا شعراء المنتدى

[M O H A M E D]

مدام ناهد
تحياتي لحضرتك

و على الدنيا السلام !

[غازي الضبع]

جميل والله يا سلاموني
الله ينور يا جميـل

[عادل فؤاد رفاعى]

معلهش الموضوع قديم جدا.لكنى معجب جدا بهذا العمل الرائع .فما أكثر الإنتهازيين والوصوليين والآكلين على كل الموائد

[عفاف سليمان]

المشاركة الأصلية كتبت بواسطة محمد السلاموني

أغرب المخلوقات

__

الـــدلـــدول لـــو مـــرة يقــــول بيبقــى كـــــلام متعـــــاد
فــي الأفـــــراح أجدع رقـَّاص ، و ينـُوح في الجنــازات
مُـــفلس لكـــن غـــاوي ظــهور .. قـــوم يعمـل حـركات
طبلــة تـرن و صوتهـــا العـالــي طـــالع م الفـــــراغـات
علــــى مصلحتــــه بــس يدوّر .. يعشـــق كلمـــة هــات
تــاكــل ؟ أيــوة يــا ريــت تدينــي و زوّد في السلــطـات
تــدفــع ؟ إيــه ؟ مـش سـامع صوتك .. انده ع الأمـوات
ينقـــل كلمـــة و هو بيصــــرخ : أنـــا بعـــرف بشــوات
وقـــت الجد تملــِّي بيهـــرب .. يظهـــــر فــي التفــاهات
وشـــه جميــــل تــــلاقيه متبســِّم و بيــــــرسم ســـلامـات
أحلــى كـــلام و حبيبــي و بــاشـا و غيـرها من النفـَخَات
و مـــن ورا ضهــــرك عينـــه تبـــرّق و يصـــب اللعنات
أمــــا صحيــــح الدنيـــــا دي فيهــــا يــامــا من الحشرات
حــاجـــة عجيبـــة غريبــــة مصيبـــة زادت م الأزمــــات
لمـــا النــــوع ده تشـــــــوفه بيكبـــــر و يســود الأسياد !!

**

المشاركة الأصلية كتبت بواسطة محمد السلاموني

الكــــــداب مــــن كدبــــــــه بيـزهــــق لـــو عـــد العـــــداد

يفشــــر ، ينصــب ، ينــزل ، يطلــع ، يلمــع في القعـَــدات
يكسب يكسب يكسب يكسب كــل مـــا بـــاس مــــــداســــات
اللبــــــلاب علـى خيـــطه بيمشــــــي و بيوصـــل سمــــوات
مــن غيـــــر صــوت و دا فجـــأة بيلدع و لا أخطـــر حيَّات
لمــــا تشـــوف الدنيــــــا جميـــلة و لا فيهـــــــا غيــــامــات
تعـــــــرف إن صــاحبنــــا مفــــــارق و بعيــــد بالمســافات
و امـــا تـــلاقـــي الدنيــــــا تمطـَّـر و بتبعـــت رَخـــامــــات
تعــــــــرف إن معـــــــــاه سنـــــارة بيصطـاد في العكـارات
عــامــل فيهـا جميـــــل و مــــــؤدب و يصــــون المقـــامات
و هُـوَّ لـــه في جبـــــــال الخِســَّة يــــامـــا مـن العـــلامــات
طعـــــم الحلـــــو فـ بؤه بيحلــــى لو غيـــــــره قـــال هـــات
ويـَّـا حــــــرارة شــــــوقـــــه لكلمـــــة تبــــرَّد نــار الـــذات
قـــام م الفــــرحة يغنـــي و يـــرقــص إنـــــه بتـــاع حسنات
داهيـــة تشيـلك ، آه يــــا منـــــافـــق .. شــرَّك هو الزاد ؟؟

**

اخى الكريم
صاحب اجمل كلمات
ثوريه رائعه
(((د محمد السلامونى)))
كلماتك لها ابعاد كثيره
من زماااااااااان
واحنا بنقول
من زمااااااااان
واحنا بنتكلم
ومكنش حد عايز يسمع صوتنا
ومن الحسره كنا بنتألم
خلاص عدى الزمن وولى
والطغيان راح وخد معاه
ما خلااااااااااا
خد الفاسد والعاصى
واليوم راح ترتاح راسى
من الم الظلم والمعاصى
وبكره بأمل جاى ينور
عقلى وراسى
تحياتى لك اخى الكريم
وتحياتى لكل
شعب مصر الاصيل
دمت لى وللجميع بخير
اختك عفاف

[هدى دولت]

أستاذي محمد السلاموني
جسدت واقع حي ...
جاءت سطورك نابضة بالحياة
وعقدت بيننا وبين حروفك صداقة مألوفة
لشدة البساطة المغلفة برقة الإحساس
ورقى اللفظ ...
مع التحفظ الشديد للفظ " داهيه تشيلك "
فقد أحسست أنك إستخدمته بإستحياء شديد
إستخدام المتردد ولكن الواقع فرض نفسه
فقد كان مخرجاً فهو معبر بصدق عن إحساسك الرافض
لهذه التركيبة الإنسانية المنفره
فجميعنا نعرف حكم المنافق في الإسلام ..نفور فطري ...

ننحنى لهذا الصدق الناطق بسلاسه ويسر دون تصنع
بطبيعية شديدة عبرت يا مُبدع ..
يا مالك لزمام المعاني
وننحنى لهذا الحب الرقيق لهذا الفنان
أرق صوت عرفته مصر
بإبن مصر الآتي من نبض الشعب الحساس العالي
قمة الإحساس والجمال ...نحنى لحبك له
" ..محمد قنديل "
نبراس متوهج بجمال آخاذ
في شارع الفن المتلألأ بنجمه الباهي

سيدى ...
تتوه منى العبارات ... وأقف مشدودة
على باب شعرك الصادق
دام حضورك ... ودام مداد قلمك النابع من وجدان

الفلاح المصري الفصيح

سيدى أنحنى لهذا الوجود الراقي

دولت
بنت وادي النيل

[unicorn]

المشاركة الأصلية كتبت بواسطة محمد السلاموني

يا ريت يا ابو مندور تحدد لي مواضع الخلل في الوزن من وجهة نظرك
و يهمني أعرف رأي أساتذتنا شعراء المنتدى

انت عارف ان أخوك لسة تلموذ صغير فى كتَّاب عمك الشيخ سمعجى ,
بس أحاول أشوف معاك ,
لاحظت انك ابتديت بالبيت دة :

الـــدلـــدول لـــو مـــرة يقــــول بيبقــى كـــــلام متعـــــاد

و الميزان حسيت انه اختل بعد كدة , عندك مثلا :

وقـــت الجد تملــِّي بيهـــرب .. يظهـــــر فــي التفــاهات

البيتين غير موزونين فى رأيي
و أظن المشكلة فى البيت الاول من القصيدة , حاسس انه هو اللى فيه حرف زيادة عن باقى الابيات
متهيألى بيبقى دى لو كانت يبقى البيت يتوزن .
المهم أكيد سيدنا الشيخ هايعدى فى مروره اليومى لحملة المحذوفات و هايشوف , هو اللى معاه الميزان و هايعرف الصح فين.
بس فكرة القصيدة جميلة كعادتك يا سلامون , و نقدك للسلوكيات السلبية السيئة يستحق التحية.