الاغاني الهابطه ...هل هى فعلا هابطه ...حوار هادئ وموضوعى

**محمودسعد** · #1 10/02/2009, 02h47

السلام عليكم جميعا ورحمه الله وبركاته
محدثكم مطرب شعبي منذ حوالي 36 سنه واظن هناك من يعرفون هذا وطبعا اخي حسن كشك اسدالاسماعيليه كما قال الالاتي يعرف ذلك
كان لابدمن هذه المقدمه معلش
علي فكره لازم حضراتكم تعرفوا الاول ان حكايه مطرب ويتعامل مع منتج فني دي اصبحت منتهيه خلاص لان اساسا مفيش منتجين اغاني ببساطه خلاص انتهوا وافلسوا
طب اللي بيغنوا دول دلوقتي 90 في الميه منهم بيغنوا بفلوسهم وبيسجلوا غنوه واحده ويرفعوها للنت ببساطه وطبعا كل المواقع بتاعه المطربين الشعبيين كل اعضائها بتوع دي جي وعيال صغيره وطبعا هم بيشغلوا الاغاني دي الاجهزه علطول لانهم مايعرفوش حاجه عن الفن العالي واظن ايضا ان سياسه القائمين علي الاعلام ؟؟؟؟ بنيت علي اساس انتشار هذه النوعيه
واما من ناحيه انتشارها سريعا فهي عشان مش اغنيه اساسا
انما لو هي اغنيه من نوعيه الاغاني المحترمه ؟؟؟؟فعلا فلن تنتشر لان الغير فاهمين اصبحوا اكثرمن الفاهمين
ما ووبعدين لاتنسوا دور موزعي الكاسيت والاسطوانات حاليا هم من كانوا يزورون الكاسيت يوما الان اصبحوا غيرمطاردين لانهم لايزورون الان والفرشه لزومها يوم واحد ويكسب الموزع الغيرمنتج لان المطرب بيديلوا الاغنيه علي سيديهايه وهو بيفرشها مع اغاني تاني من هذه النوعيه وبيسميها كوكتيل واهو شغال ولو كسب الفين جنيه هو الكسبان لانه ماغرمش حاجه
طب والنبي قولولي واحد زي حالاتي اعمل ايه ؟
بعد ماكنت باقبض فلوس نظير اني احط صوتي بس بقيت دلوقتي مطالب بان اصرف علي شريط كاسيت
وشريط ليه ؟
اغنيه واحده هايفه ومالهاش معني وتبقي موجهه لبتوع الدي جي والتوكتوك والفزبه والموتوسيكل والميكروباس والام ثري
مش بالذمه كده حرام
دانا حتي من حوالي شهرين بسجل تلات او اربع اغاني ومش عارف اغني ايه
حتي لما فكرت اغني في لحظه عاميه اغاني من النوعيه دي كمان مش عارف
قولولي اعمل ايه ؟
دانا حتي بقيت بتلاته صاغ امام واحد بيهيس ويقول النوعيه دي وبياخد سبعه الاف جنيه عشان دي وانا عشان بغني للست ام كلثوم ولعبدالمطلب وبقول اغاني شعبيه اصيله بقيت مرفوض عشان بخلي الفرح ينام ؟
اغيثونا
فانا اتكلم بالنيابه عن الف فنان محترم شايفين الذل عشان مش عارفين مايغنوش
حتي عدم الغناء مش عارفينه
بس ربنا يخلي اللي في القاهره بيقولوا عليهم فلاحين بس هم ناس فالحين لان ودانهم لسه نظيفه ولولا دول ماكنتش اشتغل
حتي الكلام اللي فيه عبد وشيطان والمفروض انه يبقي مواعظ اصبح كلام للسكاري واتباع الشيطان هم اللي بينبسطوا من الاغاني دي
بقيت كلمه لابدمنها
اخي الاصغر محمودالحسيني مفروض عليه هذا اللون لانه وصله للسينما والتليفزيون وهو عرف يمشي حسب هوا الناس اللي مابتسمعش وقال كلام مش كلام ولحن مش لحن لان الناس اصبحت تفرض طلب هذا النوع واسالوا الاعلام
واسالوا البلد اللي مش معترفه بفنانين مثل علي الحجارواحمدابراهيم والحلو وكتير حاجه جامده قوي وعيبهم انهم فنانين
اي والله عيب الحلو اصبح انه حلو
انا حتي مش عارف اعلم عيالي يغنوا ايه
ومش عارف حتي انا اغني ايه
سامحوني ان كنت قد اخطات او فلتت مني كلمه كدا او كدا
ومعذره للاطاله
ومعذره للانفعال
وكل تشكراتي للعزيز حسن كشك لعرضه هذا الموضوع
وادعولنا بالرحمه والمغفره

**حسن كشك** · #2 10/02/2009, 11h41

اقتباس:

المشاركة الأصلية كتبت بواسطة محمودسعد

السلام عليكم جميعا ورحمه الله وبركاته
محدثكم مطرب شعبي منذ حوالي 36 سنه واظن هناك من يعرفون هذا وطبعا اخي حسن كشك اسدالاسماعيليه كما قال الالاتي يعرف ذلك
وكل تشكراتي للعزيز حسن كشك لعرضه هذا الموضوع
وادعولنا بالرحمه والمغفره

اخى العزيز الفنان محمود سعد
نعم يا اخى اعرفك تمام المعرفة .... وان لم نتقابل بعد ... لكن كلام الاخوه الاعزاء المحترمين هنا فى سماعى عنك نقل لى كيف انت انسان جميل الشخصية والروح ... وبأذن الله نتقابل قريبا .....
كلمتك..... وجعتنى اوى يا اخى محمود .... ومش عارف ارد عليك والله .......لكن اقول لكل اهلى فى سماعى هنا
أقرأوا جيدا صرخة الفنان
محمود سعد
وانظروا الى اى مدى وصلت حالة الفن

**حسن كشك** · #3 14/02/2009, 13h46

معلش اخى الفنان
محمود سعد
ماحدش رد على صرختك ... لكن انا ها ارد
تصديقا لكلمات حضرتك
كنت حالا اشاهد قناة فضائية تذيع برنامج ( قول يامصرى ) الذى يقدمه الشاعر ( احمد فؤاد نجم )
وكان البرنامج فى تلك الفقرة يستضيف احد الكتاب فى جريدة الوفد ... وسائق ميكروباس .. وبعرور مغنى العنب
كان عنوان الفقرة ... هل امبراطورية الميكروباس تفرض نفسها على واقعنا المصرى ....
طبعا وكالمتوقع ... لم تناقش القضية اطلاقا ... وانما كلام تافه ... لايتسم بالجدية ولا بعمق الموضوع .. فسائق الميكروباس ... انكر كل ماقيل عن سائقى الميكروباسات وتصرفاتهم ... وظهر لنا بصوره الملاك الملتزم المؤدب .. والقى على سوء تصرفات بعض سائقى الميكروباسات اللى هو مايعرفهمش ولاشافهمش خالص - على رجال الشرطة المرتشين .... والسيد بعرور ... قال بالحرف .... يعنى احنا لما نغنى ... مش احسن من الناس الغرب اللى برضوا هييجوا ويقولوا كلام هايف ... ويسيطروا على السوق ويلموا الغله .... اما السيد الصحفى فقال ... انا بحب اللون ده من الغناء ... اما السيد احمد فؤاد نجم .... الثائر ... المصرى المعترض على كل شئ دخيل على المصرية الاصيلة ... فلم يحرك لا لسان ... ولا يد ... وكل اللى قاله ... يالا غنى يابعرور ... وطرى القعدة ....
وقام السيد بعرور ... ففتح فمه ... واصدر اصوات اقرب ماتكون كالفحيح او التزييق ... واقسم بالله لا افترى عليه فقد كان الغناء لايف بلا مؤثرات وظهر صوته الحقيقى ... المجرح المشرخ المشرخ ...وعزفت معه فرقة ... اقسم بالله العظيم ماسمعت منها موسيقى اطلاقا .... وقام اربعة شبان ... ليقدموا شو استعراضى مصاحب للغناء وكان كل واحد منهم يرتدى بذله وكرافته متفقه فى الوان باقى الاربعة ( لو شفتهم وهما جالسين بدون رقص لتصورت انهم اساتذة جامعة )....واخذوا يتقافزون بعبط وهبل .. واشبه بالقردة العبيطة وهم مبتسمون ابتسامات بلهاء ...
ارأيتم ماوصلت اليه الحاله .... افساد للفن ... وافساد للغناء ... وافساد للموسيقى ... وافساد للفن الاستعراضى ... فى حضور الصحافه وعبر الفضائيات ..... ومن تصورنا انه ... رافض لكل مايشوه مصر ... لم يرفض بل استمتع ... واعطى تصريحا لهذه الاغانى الهابطة .... بالاستمرار ...
ولا يمكن هى مش هابطة واحنا اللى مابنعرفش نسمع
وعجبى!!!!!!

**الألآتى** · #4 14/02/2009, 15h00

اقتباس:

المشاركة الأصلية كتبت بواسطة حسن كشك

ولا يمكن هى مش هابطة واحنا اللى مابنعرفش نسمع
وعجبى!!!!!!

إحنا إللى مابنعرفش نسمع ياحسن .. الواحد بدأ يشك فى نفسه وودنه ..

يمكن هما الصح .. وإحنا الغلط ..

الظاهر أهلنا ماعرفوش يربونا ..كان المفروض نتربى فى خرابة .

**محمودسعد** · #5 16/02/2009, 04h43

العزيز حسن كشك
العزيز محمد الالاتي
طبعا الحكايه اللتي سردها العزيز حسن كشك تستحق المتابعه وخصوصا كلام النجم احمدفؤاد نجم اللي كان بيحب مصر ودلوقتي بعرور بيطري علي قلبه بالغناء
بالذمه ده كلام ؟
ده كلام بياكد ان السفه بدا من ناس كبيره وهو اللي فتحوا الباب لهذا السفه وهذا القبح اللذي نعيش فيه والا ازاي يكون بعرور بيطري علي قلب نجم او النجم الكبير احمد فؤاد نجم ومعاهم سائق الميكروب او الميكروباس
والان وقبل الان بشويه انا متاكد انه لامكان للمحترمين في الفن والا ماكانتش فقره او نمره بعرور باتناشر الف جنيه وعلي الحجار قاعد في البيت والحلو معاه معتزل
علي راي اخي الالاتي
هو احنا اهلنا ربونا ولااحنا مش متربيين ؟
الناس اللي مش ناس دي عاوزه تودينا لحاد فين؟؟؟؟