الشاعر .... جمال بخيت

[رزق المصرى]

الدستور تنشر قصيدة الشاعر الكبير جمال بخيت



قصيدة جديدة للشاعر الكبير جمال بخيت ... مش باقي مني


25/01/2009 جريدة الدستور

مش باقي مني غير شوية ضي ف عينيا

أنا هاديهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف..

.. خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

...

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

جمال بخيت

[رزق المصرى]

شبَّاك النبي للشاعر: جمال بخيت

تاريخ النشر 6/10/2006

شباك النّبي على باب الله

يا صبية الصبي على باب الله

هَاوْدِي وقَرَّبي على باب الله

ونْلمْ الشَامي على المَغرَبي

على باب الله

على باب الريح ربِّـينا نَسيم

يكبر بالجمع وبالتقسيم

ويلم الشعر على التقَاسيم

على عطر وسيمة وصَدر وسيم

خلّيكي معانا إزاي تذهبي

وإنتي الأُغنيّة بنور مذهبي

شباك النبي على باب الله

على باب الشُوق من غير توصيف

عدينا ربـيع ودخلنا خريف

البخت ف ليل الحُب ضعيف

والورد ب يهرب م التقطيف

وإنتي ولا بتئسي ولا بتهربي

ولا يوم ب تلبِّي سوى مطلبي

شباك النبي على باب الله

على باب الجنَّة يا طَعْم التوت

أنا ممكن أحب لَحّدْ مَ أموت

وأزرعلِك جُوُّا البحر بيُوت

وأخلِّي سنين الصَعب تفُوُت

أنا اشيل الشَقَا وإنتي تطبطبي

وأتعبلِك وإنتي بلاش تتعبي

شباك النبي على باب الله

على باب العيد بالهوى ضَحِّيت

ذُقت الحرمان .. قُلت إتغدِّيت

رزق الغلبان .. يحْرَم ع البيت

الدُنيا قالتلي إبكي .. ما بكيت

سهّلي .. سهّلي ليه بتصعَّبي

ده أنا مهما جَنيت عارف مكسبي

شباك النبي على باب الله

على باب الخَلق وباب النصر

صلّيت الفجر ضحكلي العصر

تعاليلي العِشّة .. أبنيلِك قَصر

أنا أطيب مصري .. يا أجمل مصر

أحْلِف بالشافعي وبالزينَبي

وعينياّ تميـل وبَـشيل مَنكَبي

شباك النّبي على باب الله

على باب الله بساتين بساتين

شوفنا الزيتون ف مَقام التين

والناس ف حليب وعسل فايتين

والظُلم ضعيف والحق متين

قرآن الفَجر تلاوة أجر

وآيات بتملِّس على كوكبي

شباك النبي على باب الله

على باب الغار بتبيض يا حمام

ح أبنيلَك بَدَل العِشْ مَقَام

كُفَّار اليُوم عايزينها سلام

شرط الصّديق ينسى الإسلام

لكن ماتخافش الخوف أجنبي

وانا لسه شُجاع سيفي ومأربي

شباك النبي على باب الله

على باب إسرائي بُساط أحمدي

كُل الأنبيا ويّا مُحمدي

بيصلوا صلاة القلب النبي

الأقصى قريب لو يوم نَهتدي

من باب أندلُسي لباب مَندبي

نفتح شباك ع الزمن الأبي

شباك النبي على باب الله

ولا فيش أجنبي على باب الله

يا صبيَّة الصَبي على باب الله

هَاوْدِي وقَرَّبي شربات تشربي

ونْلمْ الشَامي على المَغرَبي

على باب الله

الشاعر : جمال بخيت