طلبات نوتة

[عمرو الهنداوي]

الاصدقاء الاعزاء

بصراحة ان شايف انه موضوع العيل الدكتور دة موضوع عبيط اوى واللاسف احنا لسه بنتكلم فيه وبنضع وقت فيه دون لازمة ومكبرين الحكاية اكثر من اللازم انا قولت من الاول دة واحد من بتاع اثارة الفتن فى المنتديات ومش لازم نتوقف عنده لانه مجهول ولم يقدم شىء وسؤاله متركب غلط يعنى مش عارف يسال السؤال اصلاا ومش فاهم اى الفرق بين الادليب والجمل اللى على ميزان ومين هوعادل صموئيل فلماذا نحن مستمرون فى الكلام عليه

الدكتور دة واحد مجهول عمل مشاركة هبلة وماشى فامش معقول نسيب بقى الفن ونقعد نتكلم عليه وبعدين بصراحة انا زعلان جدا جدا من استاذ عادل صموئيل ويعنى ايه يبطل تدوين موسيقا؟ فين عادل صموئيل الرجل القوى الذى لايعرف المستحيل صاحب مدرسة البساطة والجمال فى النوتة الموسيقية بقى معقول يجى عيل اهبل ويقول كلام عبيط وغير علمى يوقع الرجل القوى والفن والمنتدى بالسهولة دى!!!

انا مش فاهم ازى استاذ عادل يتاثر اصلا بكلام العيل دة ويقرر اعتزال التدوين--- ازى الرجل اللى عرفناه والكل يشهد له بالقوى والتفوق يسقط بهذة السهولة يعنى ياجماعة معقولة ام كلثوم وعبد الوهاب يعملوا اغنية وواحد فقط من الجمهور يقول
(ايه الاغنية الفاشلة دى) وباقى الجمهور فى الحفلة وخارج الحفلة يقولوا ايه الجمال دة والاغنية تكسر الدينا وتدخل التاريخ
ويجى واحد فقط يقول الاغنية فاشلة فيقوم عبد الوهاب بالانتحار وام كلثوم تقرر عدم الغناء؟؟؟ مش ممكن ياجماعة يعنى؟

العيل دة لما تكلم انا اول واحد ردت عليه وباقى الاخوة بالاجماع ردوا عليه ومفيش واحد حتى جاء فى صف العيل دة وكل الناس فى المنتدى جابت حق الاستاذ اللى مصر وخارج مصر واللى فى الصفحة وخارج الصفحة

يبقى ليه استاذ عادل يتاثر بكلام العيل دة بقى ويقرر عدم التدوين؟؟ فهل يسقط الهرم والمنتدى والتلاميذ بهذة السهولة علشان واحد فقط عبيط قال كلام عبيط!!! فهل نحن ضعفاء لهذة الدرجة؟؟؟

تلاميذ الاستاذ والمنتدى جابوا حق الاستاذ يبقى ليه بقى الاستاذ لسه زعلان ويهد الحلم والتاريخ اللى هو وتلاميذه بيصنعوه
بصراحة يا استاذ عادل انت مالكش حق تفضل زعلان وتعاقبنا احنا بعدم التدوين علشان عيل عبيط قال كلام عبيط وهو مش منا ولا ينتمى لنا احنا اصلاا فا بصراحة استاذ عادل يحب ان لا تتاثر بهذة السهولة ونحن نعرفك انسان وفنان قوى
فارجوك لا تفكر فى اعتزال التدوين لانه الخاسر هو احنا والمنتدى والتلاميذ والفن اللى انت عاملته وشاركت فيه

ارجع نحن فى انتظارك ولن نقبل اى اعذار


استاذ سيد

عامل ايه مع الثانوية العامة؟ انا حارفع اليك النوتة دلوقتى حالا


استاذ حسام عبد اللطيف

انا كنت ردت عليك بس مش عارف انت شوفت المشاركة ولا لا
على العموم انا رفعت اليك نوتة الكونشيرتو كاملة ومعها نوتة مبسطة لحن منى مور الشهير واللى غنت عليه فيروز اغنية لبيروت

لحن منى مور يبدا من الصفحة 18 فى ملف الكونشيرتو

كل التحية

[عادل صموئيل]

احبائى
اقدم لكم نوتة من العيار التقيل جدا
رائعة عبد الحليم حافظ

نبتدى منين الحكاية

كاملة فى 13 صفحة
اتمنى ان تحوز رضاكم

[swaifi73]

أعزائي أعضاء المنتدى الكرام
بمناسبة أحتفالات عيد الأم في هذا الشهر
أقدم لكم أغنية الأم هوها قبل الكل للمنشد (عبد السلام حوى)
أتمنى أن تنال أعجابكم
تحياتي
محمد السويفي

[عاصم المنشاوى]

الأصدقاء

الى أن يعود الينا أستاذنا الكبير /عادل صموئيل...ويستأنف نشاطه ...حيث ينتظره الكثير من تلامذته ومحبيه...أترككم معه فى بعض ماكتب لنا من أجمل الأغانى والترانيم ....وربما يكون قد انتهى من كتابة "حديث الروح"....ويرفعها لنا انشاءالله....

[عاصم المنشاوى]

الأصدقاء
واضح ان غياب الأستاذ عامل فراغ جامد ....عشان كده ... قمت بالأتصال به فورا
الذى أكد لى عودته قريبا انشاءالله -غالبا بكرة -وهو بخير ....وأعتقد ان اما ان يصل سيدب فى ارجاء المنتدى النشاط ....
ايه رأيكم فى نوتة للموجى "يامالكا قلبى"...لحين ظهور النجم الماسى؟

[swaifi73]

أخواني وأعزائي
أعضاء المنتدى الكرام
تحية طيبة من أعماق قلبي
طبعا بعد ما ظهر استاذ عادل وصرح أنه هينزل باكر نوتة
أنا كنت مدون نوتة سئلوني الناس وأستحيت أنزلها إلى أن يبداْ أستاذ عادل في مزاولة نشاطه
وطبعا أنا عزيت أستاذ عادل وكل أساتذتي المسحيين
وزملائي
وأهم حاجة أن هذه المواقف هي الي بتبين أننا نسيج دم وروح واحده
وهذه المحبه تظهر في الأزمات
ولكن الله لا يسامح السياسة والتدبير التي تحاك لأفتعال الأزمات
بس إنشالله أحنا أكبر من كيد الأعداء
وسنظل جسد واحد
أعزائي أقدم لكم نوتة سئلوني الناس لفيروز
عندي توضيح عند نهاية المذهب (لأاول مره ما بنكون سوى)
ما تغينه فيروز غير ما يغنيه الكورال
فيروز بتنهي المذهب على بداية المازورة الجديدة يعني مع الدم
ولكن ما يغنيه الكروال بينتهي مع نهاية المازورة وبيبدأ المطرب غناء الكوبليه بعد الساكتة على الدم
لذالك أنا أعدت تدوين غناء المذهب
وتكررت في باقي الأغنية مرات تنهي لأول مرة ما بنكون سوى على نهاية المازورة ومرات على بداية المازورة الجديدة
تحايتي
محمد السويفي
اخى العزيز سويفى
احب الاول اشكرك على شعورك الجميل بس حابب اقول لك حاجتين الاول انا لما بتكون عندك نوت جاهزة نزلها فورا ما تاخدش فى بالك انا موجود او مش موجود .. يعنى الاخوة الاعضاء ماشاء الله بقوا بيخلصوا النوت بسرعة ونفسهم فى عشر نوت فى اليوم يعنى انا لو غبت اسبوع لى سبب انت نزل نوت لو جاهزة اكيد حاتسعدهم بدل ما مايلاقوش جديد
اما الناحية الفنية : اى جملةلما تتكرر وفيها اختلاف فى اولها او آخرها لو ممكن تعمل المرجع فيه بريما وسكوندا وانت تظبطها لكن لو الاختلاف فى النص ولو حرف لازم تكتبها مرتين ولو عايز تريح نفسك اى جملة انت تحس ان حايحصل فيها التباس يستحسن اكتبها مرتين .. وانت بالخبرة ومع الكرار حاتحس الموضوع ده بسرعة يعنى مثلا عبد الوهاب لو جملة اتقالت عشر مرات تلاقيه لازم يعمل فيها لعبة تخلينى غصب عنى لازم اكتبها عشر مرات .. فى الفرق مع المحترفين لما يكون حرف فى العادة بيتغير بيكتبوا الحرفين فوق بعض ويكتبوا على واحد رقم (1 ) والتانى رقم ( 2 ) ويعملوا مرجع بس انا مش بحب اعملها هنا بالذات لأن ممكن حد مش عارفها يتلخبط وبعدين العملية مش حاتفرق معاك سطرين زيادة او اكتر
مع اطيب تحياتى عادل صموئيل

[عادل صموئيل]

احبائى

بعد الحدث الجليل وتوقفى فترة قصيرة عن الكتابة .. اقدم لكم عمل من العيار التقيل جدا جدا هى تصادفت الظروف انه يأتى فى مثل هذا الاسبوع .. العمل ده انا حسيت انه اصعب لحن دونته فى حياتى .. اقدم لكم



حديث الروح



كاملة فى 9 صفحات .. وحبيت اقول لكم شوية خواطر عن اللحن ده .. عادة انا لما بحب ادون الالحان اللى من العيار التقيل جدا وكبرة الحجم .. دايما برسم اللحن فى مخى واذاكره شوية قبل التدوين عشان بحدد الاماكن الصعبة فيه واللى بتحتاج مجهود وتفكير كيف انى ابسطها لكم فى الكتابة ودى اصعب مرحلة .. يعنى تقدر تسميها خطة العمل .. وفى كل الالحان انا بحسب الصعوبة من كمية الادليب .. يعنى مثلا الاطلال اتقسمت على اسا انى لما اخلص تدوين الجزء بتاع لست انساك لحد اول الجملة الموسيقة اللى على الإيقاع بتاعة يا حبيبا زرت يوماً هنا احس خلاص انى خلصت اللحن او الباقى خلاص سهل .. اما اللحن ده اصعب لحن انى دونتهفى حياتى واخد وقت كبير .. يعنى كل جملة ادونها وبتاخد وقت الطول من المعتاد بالنسبة لمستوايا فى الكتابة احس انو خلاص الباقى سهل الاقى الجاى اصعب

ولولا الطريقة اللى قال لى عليها لاخ العزيز وسام اكرم بالنسبة للتحكم فى الادليب على الانكور ماكانش الادليب الصعب ده طلع بالدقة دى يعنى دقة توصل ل 99% وعمرها ماحصلت فى التاريخ ان يتكتب الادليب بالدقة دى لنى هنا بسمعوا واعدل فيه يعنى بسمع السطر اكتر من عشرين مرة اطول او اقصر نغمات وفى الفراغات بحط سكتات

ورجعت بذاكرتى لأول مرة انا عزفت اللحن ده كان اول ماطلع سنة 1967 ... يعنى عزفتو الحمد لله حلو جدا 100% وانا مسجله هنا فى قسم المبدعون .. طيب ( وده تامل نفسى تحسوه او تتعرفوا عليه ) زى ماقلت انى عزفتو بدون اى مشكال تذكر يعنى ممكن مرة او مرين توقفت عشاناصلح جملة او مقام غريب شوية .. لكن التدوين كان صعب جدا جدا لن السنباطى وضع فى اللحن ده كل عبقريته .. حبيت افلسف الموضوع .. انا كان من زمان عندى اكتر من 70 هواية .. من الصغر كنت احب لعبة القطارات اللى بتمشى على قضبان بس اللعب الكبيرة الحجم يعنى اللى فيها قضبان كتير جدا وعدد من القطارات .. وانك بتتعلم ازاى تخلى القطار يتحول من قضيب لآخر .. او يغير اتجاهو يروح يمين او شمال .. والملية دى معقدة جدا فى الاحجام الكبيرة للعب دى واللى ممكن توصل لأكتر من عشرين متر وناس عندهم اكتر وكنت دايما بموت فى كتالوجات العلب دى واللى بالطبع مستواها رهيب جدا وثمنها فادح يعنى كنت بتفرج عليها طبعا فقط .. وللعلم اللعبة الكبيرة دى مش لعبة عيال ولكن لعبة ملوك .. يعنى انا طبعا ايام الزمن الجميل لما كنا بنروح اى دولة كان لازم الملك او الرئيس بيعزمنا فى قصره وتقريبا كلهم عندهم قاعة فيها اللعبة دى وبالطبع كانت عينى بتخرج عليها لأن فيها اكتر من عشرين قطار .. وكمية قضبان خطيرة وتحويلات متعددة وبجد هى متعة اكتر من البلياردو 100 مرة .. المهم .. لو انت ركبت من القاهرة القطار المتجه اللى الاسكنرية .. انا بحب اتفرج دايما على انواع العربات والجرار وكله كوم على القضبان .. لو تخيلت المنطقة فى حدود عشرو كم من القاهرة القطار بيبقى مشى وجنبه مش اقل من 30 الى 100 قضيب متفرعة مثل الشبكة العنكبوتية ,,لن محطة مصرفيها مش اقل من 30 رصيف لمختلف الاتجاهات والقضبان كلها قادمة من الورشة ثم بتتفرع الى اتجاهت فى كل انحاء الجمهورية .. يعنى لو تخيلت القطار بيعدى على كام تحويلة حايطلع عدد مذهل .. والتحويلات دى بتتم بعملية فى منتهى الدقة من اكشاك متعددة كل كشك لو مساحة صغيرة من القضبان بيفتح ده ويقفل ده بحيث انو بيحدد اتجاه كل قطار طبقا لجدول فى منتهى منتهى الدقة لأن اقل غلطة حاثة مروعة يعنى قطارين يخبطوا فى بعض .. طبعا لحد دلوقتى انتم مش فاهمين بحكى القصة دى ليه ؟؟ اصبروا انا جاى فى الكلام .. الفرق بين سائق السيارة وسائق القطار ايه ؟؟ ان سائق السيارة مسؤول عن كل شىء امامه يعنى هو اللى بيحود فى الاتجاهات ويتفادة السيارات الاخرى والمشاه والمطبات .. اما سائق القطار ماولش دعوة بالتوجيه لأنو القطار بيتوجه عن طريق القضبان اما السائق معاه اكرتين واحدة يحركها القطار بيمشى والتانية فرملة .. وكل نظره متجه الى حاجة واحدة .. الإشارات الكهربائية اللى لما تكون حمرا ما يتحرك ولما تكون خضراء يتحرك فقط .. يعنى السواق مالوش دعوة بالقضبان هو بيمشى وخلاص .. لكن تخيل لو السواق ده نظر الى القضبان وجالو وسواس ان فيه تحويلة مش مضبوطة يعنى ممكن يتجنن .. الشىء ده حسيتو فى حديث الروح .. لما بعزفها حسيت شعور سائق القطار اللى مالوش دعوة بالتفاصيل الدقيقة للقضبان .. لكن لما دونتها حسيت بالتفاصيل الدقيقة للقضبان دى .. لأن العازف لما بيكون شاطر اوى فى العزف السماعى اللى بيكون حافظه بيعزفه على طول بيطلع بمنتهى الدقة بدون تفكير .. لذلك انا اتمنى انكم تحاولوا تشغلوا الاذن شوية مع النوتة يعنى لما توصل انك تعزف سماع بالتدريج حاتكسب كتير انك اى اغنية تلاقى نفسك بتكلع معاك بدون النوتة

مع اطيب تحياتى

[عادل صموئيل]

احبائى

اقدم لكم اغنية من العيار التقيل جدا والحجم الكبير ايضا
رائعة عبد الوهاب وفايزة احمد

وقدرت تهجر

كاملة فى 18 صفحة
من ذكرياتى فى البروفات فى لازمة صغيرة قبل الجزء اللى بتقول فيه : ده كتير عليا
فيه لازمة بتقول لا دو دييز رى مى عشان فايزة بتغنى من المى
قالت لعبد الوهاب انا فايزة احمد ( بجلالة قدرى يعنى ) ازاى تدينى مى عشان اغنى من مى
طبعا عبد والهاب شتمها .. هى كانت بتتناقش كده مع محمد سلطان لكن عبد الوهاب مفيش مناقشة .. لسبب انا حافظ عبد الوهاب يعنى لما يحدد الازمة كده اولا بيبقى جربها فى بيتو خمسين حاجة مختلفة واستقر على الازمة دى وثانيا انها بتدى سلطنة لأذن المستمع تأهيل انو يسمع مقام الجملة التالية
اما طبعا ممكن حد منكم مش فاهم اعتراض فايزة .. المطربات الكبار كانوا بيغيوا من بعض .. يعنى كانت بتحسبها ان تمكن المطربة الكبيرة بيختلف عن المطربة الصغيرة .. ان المطربة الكبيرة ممكن الازمة تقف عند حرف والمطربة تغنى من حرف بعيد عنو والقفزة تطلع صحيحة .. والمطربة المش متمكنة اوى انها لازم انك تسلطن لها النغمة اللى حاتغنى منها .. هى مش نظرية .. لأن عفريت عبد الوهاب كان الشىؤ الطبيعى او الشىء المتوقع ولازم يعمل حاجة مش طبيعية .. يعنى ( بشوية جنان ) مثلا مع مطربة كبيرة جدا ومتمكنة زى فايزة احمد الملحن الكبير العادى بيعمل لها نغمة وهى تغنى من نغمة بعيدة جدا عنها عشان تبان القفزة المتمكنة
لكن عبد الوهاب كعادته عمل عكس المتوقع .. يعنى اداها نغمة مى عشان تغنى منها
طبعا النوتة مكتوبة بدقة متناهية بالذات فى الادليبات اتمنى ان تسعدوا بها
حابب اعتذر منكم عن التواجد لأن عندى مشكلة مع شركة النت والنت حايتقطع من بكره لمدة فى حدود اسبوع يمكن اكتر او اقل .. انا ححاول ادخل من اى جهاز تانى يعنى متواجد برضه طبعا بس مش بكل امكانياتى
مع اطيب تحياتى وان شاء الله شركة im بتاعة النت كلهم حيروحوا النار يعنى انا مشترك ب 4 ميجا طبقا بالنسبة لعامة الشعب دى سرعة خارقة بس المشكلة انهم اولا بياخدوا اكتر من السعر المتداول فى مصر 150 جنيه زيادة والحاجة اللى حصل بينى وبينهم الخلاف انهم بيسرقوا من السرعة وانا اشتركت فى شركة تانية لحد ما احل المشكلة معاهم
مع اطيب تحياتى ونتقابل

[عادل صموئيل]

احبائى

اقدم لكم من كلاسيكيات عبد الحليم حافظ

ياقلبى خبى

اتمنى ان تسعدوا بها

انا النت حايقطع عندى كام يوم بس حدخل كل فترة من جهاز تانى بس طبعا مع عدم توفر كل امكانيات جهازى
اتمنى لكم احلى الاوقات

[piano_piano_d]

بعد اذنكم ولو سمحتم
انا محتاج جدا اغنيه ف البحر سمكه بتزق سمكه لايمان البحر درويش
ارجوكم اسعفونى انقذونى
ولكم الشكر
الاخ العزيز
انظر فى اى مشكاركة من مشكاركات الاخ العزيز صالحى هيثم حتلاقى فهرس كل النوت اللى انا مدونها حتلاقى النوتة المطلوبة
ورجاء من الجميع اى حد يطلب نوتة بشوف الفهرس الاول
مع اطيب تحياتى عادل صموئيل
.................................................. ..........................................
إتفضل النوتة من تنويت الأستاذ عادل صموئيل .