أعمال أحمد فؤاد نجم

[جابر الحسيني]

قصيدة جديدة للشاعر أحمد فؤاد نجم

نؤيد سيادتك

نؤيد سيادتك لفترة جديدة
نكمل خلالها المسيرة السعيدة
و بالمرة فيها نبيع الحديدة
مفيش حاجة ثانية نبيعها خلاص

نؤيد سيادتك لأجل المزيد
من اللي تحقق بفضلك أكيد
بقينا خلاص ع الحميد المجيد
و ربك لوحده ف إيده الخلاص

نبايع سيادته و لا حد غيره
كفايا علينا نبرطع في خيره
و نوم شعب مصر العظيمة و شخيره
يقول للحرامي ما تسرق كمان

نبايع سيادته و ابنه و حفيده
مفيش زي فكره قديمه و جديده
خرابك يا مالطة حيحصل بايده
و مين فيكي يعني بيسمع آذان

نبوس إيد سيادتك و رجلك كمان
تخليك معانا يا ريس عشان
وجودك ضرورة فرضها الزمان
و مين غير وجودك حقيقي نضيع

دي مصر بتاعتك و احنا ضيوفك
كفايا علينا يا ريس نشوفك
و عاذرين سيادتك و فاهمين ظروفك
عليك بس تأمر و احنا نطيع

في جزمة سيادتك كلابك يبوسو
و فوق الغلابة بجزمهم يدوسو
و شعبك ليلاتي يا ريس غموسه
مذلة و مهانة و حوجة و مر

لكن يعني ما دمنا شعب انتساب
و دايما و أبدا ف حالة غياب
متعملش لينا يا ريس حساب
دي عزبة سيادتك وفيها انت حر

و دستور مدستورش مش فارقة خالص
كلام فاضي كله يا فندم بناقص
كفايا علينا الفساد اللي ماصص
عرقنا و معشش و ضارب جذوره

و إيه يعني تهري جتتنا البلاوي
يوماتي كوارث، فضايح رشاوي
كفايا علينا، القعاد في القهاوي
بنستنى، لما الوريث ييجي دوره