رد: انقظونييييييي يا خبراء الكمان
عزيزى بيشوى
عايز اقول لك على كلمة مهمة
انا موجه اول فى وزارة التربية والتعليم وتحت ايدى مش اقل من 500 كمنجة صينى فى المدارس اللى بفتش عليها
الكمنجة الصينى من النادر تلاقى كمنجة حلوة وكلهم عبارة عن قباقيب
ليه السر ان المنجة دى بتستورد اصلا للتعليم فى المدارس مش للعازفين الماهرين , لأنها بتتعمل فى مصانع فى الصين بتنتج مئات الكمنجات فى اليوم وعملية نجارة 100% مالهاش علاقة بالفن يعنى اهم شىء فى الكمنجة الصندوق الرنان وده عشان يبقى رنان لازم يكون من خشب معين نادر وغالى جدا , ممكن يتوفر شوية فى الكمنجات الالمانى الجديدة ولكن لو عايز كمنجة حلوة دور على كمنجة المانى او تشبكى بس تكون قديمة
ومن اهم العوامل اللى تخلى ايدك تتحرك بحرية فى الكمنجة هى المراية المراية لازم تكون ناعمة عشان ماتعوقش حركة صوابعك وفيه فى اول المراية حتة صغيرة مهمة جدا اسمها الانف ودى اول شىء بيمر عليها الوتر ولازم يكون لها ارتفاع معين عشان الوتر يمر من الانف للفرسة ماراً على المراية بأرتفاع معين ما يكونش عالى او واطى وده فى الكمنجات الصينى بيبقى شكل بس حتى الانف دى ممكن تكون معمولة من خشب ردىء الوتر ياكلها او يخترقها والارتفاع يقل والوتر يطسطس على المراية لأنه حايكون قريب منها اكتر من الازم
فيه اخطر شىء فى الكمنجة العمود اللى تحت الفرسة لازم يضبطه واحد محترف وخبير لأن العمود ده لو اتحرك من مكانه شعرة بيضيع نص صوت الكمنجة وبعدين من الهم جدا نوعية الفرسة فيه فرسة بتنقل الصوت كويس وفرسة رديئة بتكتمه ودى لازم حد خبير يحددها يعنى مثلا انا بجيب او بختار كذا فلاسة وبعدين برنهم على الارض على البلاط بالذات زى ماترمى عملة وتشوفها ترن اد ايه الفرسة الكويسة بتحس ان صوتها زى معدنى والفرسة الوحشة تحس كأنها كرتونة ومهم جدا توضيب الفرسة يعنى الكيرف الاعلى وسمك الرجلين بتوعاها برضه محتاجة خبير جدا عشان بيضبطها كويس
لو توفرت كل الشروط دى نييجى للأوتار احسن وتر التوماستيك لأنه بالذات فى الوترين الغليظين صول ورى فى الاوتار الرخيصة بيكون صوتهم وحش جدا وبينعوا لأنهم مش مطابقين لمواصفات الاوتار الصحيحة اما التوماستيك بيبقى صوته نقى ومهم جدا انك تتعلم كويس وتخبط على الكمنجة ااالوحشة دى فى الاول حتى عشان لنا يبقى مستواك حلو حاتعرف تختار كمنجة العمر
مع تحياتى وتحت امرك فى اى استشارة
|
العرض الشجري