سؤال ل الاستاذ الالاتي او الدكتور هشام خلف

**حسن عبد العليم** · #1 12/09/2008, 14h58

دكتور هشام عامل ايه اتمني ان تكون تمام ورمضان كريم
انا عندي سؤال كده ...

1_ بالنسبه لرفع النغمه نص بعد او خفضها بردوا انا اعرف ذلك ولكن اللي هيه الربع تون دي اذاي اعملها ع البيانو وايه هيه العلامه بتاعتها ع النوته بالنسبه للخفض ربع تون العلامه بيمول عليها شرطه طيب ولو عاوز علامه الرفع ربع تون تكتب اذاي ؟؟؟؟؟؟ ولا البيانو مفهوش ربع تون ؟؟؟؟؟

السؤال الثاني وهوه بردوا متعلق بالاول لما احب ارفع نغمه او اخفضها وانا بكتب النوته اكتب علامه الرفع
او الخفض قبل كل نغمه اانا عاوز ارفعها او اخفضها ولا بتكتب في بدايه السطر وخلاص ويبقي كده معلوم للقارئ ان كل نغمات السطر دا مرفوعه او مخفوضه ؟؟؟؟ لاني لقيت في نوته عبد الحليم قارئه الفنجان فيه ثلاث علامات بيمول في اولها علي شكل مثلث كده ؟؟؟؟؟

**Hisham Khala** · #2 13/09/2008, 01h59

الأخ حسن
السؤالين حلوين
1. البيانو لا يعزف أرباع التون (فقط التون الكامل و النصف تون) و كذلك الأورج (ما عدا الأورجات الشرقية مثل كاسيو مايسترو1 و أورجات أخري) ، أما بالنسبة لعلامة الربع تون منطقياً لدينا الأحوال الآتية:
a. خفض ربع تون: علامة البيمول و عليها شرطة واحدة (ѣ).
b. خفض نصف تون: علامة البيمول (b).
c. خفض ثلاث أرباع التون: علامة البيمول و عليه 3 شرطات.
d. خفض تون كامل: دوبل بيمول (علامتين بيمول)
e. رفع ربع تون : علامة الدييز بس بشرطتين أفقيتان و شرطة واحدة رأسية (≠).
f. رفع نصف تون: علامة الدييز (#)
g. رفع ثلاث أرباع التون: علامة الدييز بس بشرطتين أفقيتان و ثلاثة شرطات رأسية.
h. رفع تون كامل: دوبل دييز علامة x
يعني علامة الدييز اللي بيتغير فيها عدد الشرط الرأسية ≠ & # & (///=) مع ملاحظة أن الشرط الأفقية و الرأسية متقاطعين.
2. الرد على السؤال الثاني و هو عن علامات التحويل (هل تكتب أمام النغمة المراد تحويلها أم في بداية المدرج الموسيقي؟)
a. هناك شئ أسمه دليل المقام (الأرماتورا) و يكتب في بداية المدرج الموسيقي ، و لكل مقام في الموسيقي الغربية له دليل خاص به ، أمثلة: دو ماجير و لا مانيير (لا يوجد علامات تحويل) - صول ماجير و مي مانيير (علامة تحويل واحدة فا#) – ري ماجير و سي مانيير (2 #: فا# & دو#) – لا ماجير و فا# مانيير (3 دييز: فا# & دو# & صول#)

حاول بنفسك تستنتج دليل المقام لكل من: مي ماجير و دو# مانيير – سي ماجير؟ و ما يقابله في المانيير أذكر أسم المقام المانيير؟ – فا# ماجير و ما يقابله في المانيير؟ - دو# ماجير؟ و المانيير المقابل؟

مي بيمول – سي بيمول – فا <== (دو ماجير) ==> صول – ري – لا - مي

أم بالنسبة إلى البيمول أبدأ من دو ماجير و لا مانيير ثم أتجه إلي فا ماجير و ري مانيير (علامة بيمول واحدة: سي بيمول) – سي بيمول ماجير و صول مانيير (سي بيمول و مي بيمول) .....

حاول بنفسك تستنتج دليل المقام لكل من: مي بيمول ماجير و دو مانيير – لا بيمول ماجير و ما يقابله في المانيير ....
حاول تستنتج القاعدة بنفسك و أعزف هذه المقامات على البيانو.
b. ثانياً هناك علامات تحويل أعتراضية و تكتب أمام النغمة المراد تحويلها و يكون تأثيرها على تلك النغمة فقط و ما يليها (من نفس النغمة) داخل المازورة فقط. مثلاً وضع علامة # أمام نغمة فا في إحدي الموازير تجعل كل فا تلي هذه العلامة فا دييز داخل هذه المازورة فقط و ليس لها تأثير على أي فا قبل العلامة أو أي فا في موازير أخري.

راجع تمارين عملية لقراءة النوتة (باب دروس و محاضرات): لحن ليالي الأنس في فينا - و مرت الأيام - عطشان يا صبايا - يا نورا يا نورا - موسيقي النيل لعبد الوهاب (قريبا) على هذا الرابط
http://www.sama3y.net/forum/showthre...t=44100&page=2
تعرف على مقام كل لحن و علامات التحويل (دليل المقام) و رد على عشان يبقي فيه Feed Back
خالص الأماني
د. هشام خلف

**حسن عبد العليم** · #3 14/09/2008, 23h47

دكتور هشام شكراا ليك ع الرد الجميل وتوضيحك ولكن ..... انا بخصوص دو ماجير انا اعلم ان بعزفوا
ع البيانو مثلا دو ماجير يبقي ( دو+ مي + صول ) وصول ماجير بيقي ( صول + سي + ري + فا )
لكن لما بيقي فيه مانيور مش عارف احفظها يعني القاعده بتاعتها بتلخبط فيها ....

بالنسبه لموضوع الرفع والخفض دا كده تمام وانت بصراحه بأجابتك وفرت عليه اسئله كتير اووي

انالاحظت ان بين كل نغمه ماجير ومانير بيترك اربع نغمات دا اللي انا فهمتوا بصراحه ومش عارف اذا كان صح ولا لا ؟؟؟؟ لازم احفظ كل المقامات ولا لا؟؟؟؟

وبعدين حضرتك قولت دليل المقام في الموسيقي الغربيه ؟؟؟ طيب الموسيقي العربيه نفس النظام ولا ايه ؟؟؟

بالنسبه للماحير مثلا دو ماجير بلاقيه مكتوب في النوته بزمن الروند دايما فلما بعزفوا مع زمن النوار اللي هوه في الباص بتلخبط ؟؟ انا بتكلم علي التوافق بين ايدي الشمال واليمين ؟؟؟؟؟ هل دا يتحسن مع كتر العزف ؟؟؟ ولا ايه ؟؟؟؟

ايه هيه ال ( مي سيكا ) وايه الفرق بين صول ماجير وصول ماجير 7 هل المقصود انها صول الموجوده
في الاوكتاف السابع ؟؟؟؟؟

دلوقتي وانا بكتب مثلا ع النوته وجبت مثلا دو جواب الجواب اللي هيه فوق النوته بسطرين وعاوز
اكمل نغمات في الطيقه دي اعمل سطور اضافيه تاني فوق السطور ولا اعمل ايه ؟؟؟؟

مع اني مشفتش كده قبل كده انو فيه خمس سطور واعلاهم كمان خمس سطور ؟؟؟؟؟؟؟

ومع خالص الشكر ....

**Hisham Khala** · #4 16/09/2008, 17h47

يا حسن أنت ملخبط ما بين المقام (السلم) و الأكور (كوردات - التآلف)
مقام (سلم) دو ماجير : دو - ري - مي - فا - صول - لا - سي - دو
تآلف (أكور) دو ماجير (دو + مي + صول)
درب إيدك الشمال تعزف اللحن المصاحب بزمنه و إيدك اليمين اللحن المليودي (يعنى لحنين مختلفين في النغم و الأزمان)
دليل المقام في الألحان الشرقية يتبع القواعد الغربية بتصرف.
الأوكتافات العالية (جواب جواب ال دو) أنا جاوبتك عليها قبل كده رقم 8 ^ فوق المدرج و الأوكتافات السفلية رقم 8 ^ أسفل المدرج.
بالنسبة إلي السيكاه (قبل ما أجوبك: تعرف تلعب طولة؟) (يك - دوه - سه - جهار ..)
باللغة الفارسية (يك = 1 ) - (دوه = 2 ) - (سه = 3 ) - (جهار = 4 ) و كلمة (كاه = نغمة)
يبقي كلمة سيكاه معناها النغمة الثالثة في السلم الشرقي = مي نصف بيمول.
دوكاه = ....... في السلم الشرقي = نغمة ....... في السلم الغربي (أكمل)
جهاركاه = ........ = نغمة ...... (أكمل)
يكاه (خللي بالك مقلب) = النغمة رقم 1 و لكن ليست دو في الغربي بل نغمة صول و هي مفروض أول وتر في العود و لكن العود له عدة دوزان خاصة لأول وتر(ممكن فا و ممكن مي).
يا حسن أنا ها كتب موضوع مهم جداً أسمه :
SKIPPING , FRONT PHRASING, BACK PHRASING & SYNCOPATION
و ها أنزله تحت باب: دروس و محاضرات- فصل : تمارين عملية لقراءة النوتة على نفس الرابط الموجود في الرد السابق.
إذا فهمت هذا الموضوع سوف تتقدم في قراءة النوتة.
تحياتي, د.هشام خلف

**حسن عبد العليم** · #5 22/09/2008, 00h07

دكتور هشام ازيك ووعامل ايه انا سعيد جداا بمعرفتي بحضرتك لاني حاسس بتحسن شديد معايا
يوم عن يوم ومش قادر ااقولك احساس الواحد ايه لما يشوف حاجه مكتوبه قداموا ويعزفها بيانو
او اي اله تانيه حسب هوايه كل واحد بقي ....

انا عندي سؤال لحضرتك وهوه خاص بالمقامات ... في مقامات فيها ربع تون يبقي معني كده ان المقامات دي
مش ممكن تتعزف ع البيانو ؟؟؟ لان حضرتك قولت قبل كده البيانو مفهوش الربع تون .؟؟؟؟

بالنسبه للاوزان اللي هيه بتيقي 4\4 او 3/4 ..... 4 اللي تحت يعني زمن الروند مقسم الي 4 نوار
و4 اللي فوق يعني كل مازوره تحتوي علي 4 نوار او مايعدلها من الازمان الاخري انا عندي برنامج انكور
بس فيه حاجه غريبه ان انا ممكن انتقل للمازوره التاليه من غير ما اطبق القاعده بس شرط اني مزودش عنها
لكن ممكن ااقل ماشي يعني هل هذا صح .... يعني مثلا مازوره المفروض فيها 4 نوار او ما يعادل من الازمان
الاخري ممكن احط فيها 3 بس ؟؟؟؟؟؟؟

هل اي لحن في مجال الموسيقا لازم يكون مرتكز في اساسه علي احدي المقامات ولا فيه الحان ممكن
متبقاش متبعه مقامات ؟؟؟؟؟؟؟؟؟؟؟

لما الواحد يجي مثلا يلحن حاجه مثلا ع البيانو عشان دا اللي انا بفهم شويه فيه بيلعب الجمله الاول
من وحي خياله وبعدين يدونها ؟؟؟؟ ولا العكس ؟؟؟؟ وبعدين اذاي ااقدر احط الزمن المناسب للحن
واحدد ايضا السرعه المناسبه ( >>>> ( tempo

طيب ولول لحن انا سمعتوا وبحاول اكتبوا اذاي بردوا ااقدر اوصل للتمبو المناسب خصوصا انو بيزيد بالواحد
ولا فيه سرعات معروفه كل الالحان بتتبعها ؟؟؟؟؟؟؟؟؟؟؟؟؟؟؟؟

وعلي فكره اانا بهديك ارق امنياتي لكن بجد انسان موهوب جداااا ان الواحد يوفق ما بين الدراسه
والهوايه الشخصه اللي اتجهاها بعيد جداا عن مجال دراسته فدي هبه من ربنا ليك وربنا يوفقك
وعلي فكره انا قريت كل تمارينك واحسن حاجه الشرح المبسط مع الافاده للجميع المبتدئ والمحترف
شكرااا ليك مره تانيه علي ان القالك في رساله اخري ............ خالص امنياتي ..........

**الألآتى** · #6 22/09/2008, 02h50