سؤال ل الاستاذ الالاتي او الدكتور هشام خلف

[حسن عبد العليم]

شكرااا ليك دكتور هشام علي ردك علي سؤالي
وانت من الناس المحترمه جداا
وياريت تقبلني كأخ في مدررستك
وتقبل اسئلتي مهما كانت سهله او اجابتها معلومه لناس كتيير
وشكرررراااا جدااا ليك اخي الكبير لو تسمح لي

[Hisham Khala]

الأخ العزيز حسن
أشكرك على كلمات الرقيقة و يسعدني صداقتك ، و اأسئلة السهلة أرحم من الأسئلة الصعبة و المهم أكون عارف الإجابة ، فأنا لست موسيقي متخصص بل أنا طبيب عيون يعشق الموسيقي ، و لقد درست التأليف الموسيقي و الهارموني في معهد الكونسرفاتور منذ أكثر من 20 سنة على يد أساتذة عظام ، و لكن جاء وقت كان لازم الأختيار بين الطب و الموسيقي كمهنة و أخترت الموسيقي بالرغم من تفوقي كطبيب و لكن الأقدار و الظروف أختارت الطب و بقيت الموسيقي في القلب و الحمد لله مازلت أمارس العزف و التلحين و أقدم حفلات في ماليزيا بالرغم من ضغط العمل. و أعتذر عن عدم رفع تمارين و أعمال جديدة من فترة بسبب ضغط العمل.
و أهديك كما أهدي أعضاء المنتدي و الزوار لحن من ألحاني (حبيتك يا حبيبي يا أسمر) و أرجو أنك تسمعه و تقولي رأيك أيه ، و هو من مقام دو الصغير. و من يرغب في نوتة التوزيع ممكن أبقي أرفعها.
و لك أطيب الأماني
د. هشام خلف

[حسن عبد العليم]

اخي العزيز دكتور هشام شكراا علي اهتمامك الزائد
وانا اسئلتي مش هتنتهي في مجال الموسيقي لاني بعشقها من صغري ولكني درست بعيداا عنها تماما
انا لسه مخلص باكاليرويوس علوم السنه دي مع اني كان كل حلمي اني ادرس موسيقا بس طبيعه الناس
هنا في مصر والاهل بالتحديد بيبصوا للموسيقا علي انها شئ مش اد كده ما علينا كان لازم ارضي والدي
وادرس اللي هوه عايزوا مش اللي انا عاوزوا وبعد ما خلصت عمال بحاول انجز اللي معرفتش انجزوا زمان
وليه بعض الاسئله

1- انا كنت سئلت قبل كده علي وجود شرطه بين نغمتين نوار وحضرتك قولت بيبقوا كروشات مفهوم لحد كده
طيب المسافه اللي ما بينهم لما تزيد او تقل دي بتقصر علي زمن العزف ؟؟؟ ولا لا ...؟؟؟؟

2 - اذاي لما اشوف النوته اعرف الاله اللي النوته دي مكتوبه ليها يعني لكل اله نوته خاصه ولا ممكن في نوتات تشتغل علي كذا الاله ؟؟؟؟؟؟

3- امتي اوصل لدرجه اني ااقدر احط لحن لحاجه واعرف اكتبوا ؟؟؟؟ او امتي اكون قادر علي كده

4- هل فيه فرق بين نوته الصلوهات ونوته التوزيع للاغنيه كامله
يعني مثلا لو عندي نوته بتاعه اي اغنيه نقول مثلا عمرو دياب وماله لان النوته دي عندي .. النوته دي فيه في بدايتها ميوزك بيانو وبعدين بيستمر طول الاغنيه هل النوته دي مكتوبه للبيانو بس ولا لللالات التانيه كمان ؟؟؟؟؟ غير البيانو يعني ,,

5 هل عشان ااقدر اوزع اغنيه لازم ادرس الالات معينه ولا مش لازم اكون درست كل الالات ؟؟؟؟؟

كفايا كده وهخلي اي سؤال في رد تاني عشان مبقاش بتقل عليك

وعلي فكره الاغنيه اللي انت موزعها والله احساسها عالي قووي بذات شغل الكمان اللي فيها في الاول

[Hisham Khala]

الأخ العزيز حسن
مرحبا باسئلتك
1. العلامتان اللتان لهما خط عرضي واحد يصلهما هما 2 كروش بغض النظر عن بعدهما عن بعض و إذا كن 3 علامات أو 4 أو أكثر يصلهن خط عرضي واحد أيضاً هن كروشات و زمن الواحدة منهن نصف زمن النوار.
a. العلامتان اللتان لهما خطان عرضيان يصلهما هما 2 دوبل كروش بغض النظر عن بعدهما عن بعض و إذا كن 3 علامات أو 4 أو أكثر يصلهن خطان عرضيان أيضاً هن دوبل كروشات و زمن الواحدة منهن ربع زمن النوار.
2. نوت التوزيع بيكتب أمام كل مدرج موسيقي أسم الألة التى ستقوم بالعزف (أنظر التمارين على هذا الموقع و طالع نوت التوزيع ستجد أسم كل أله أمام المدرج في بداية النوتة) أما النوت العادية فهي مجرد تدوين للحن الأساسى (الميلودي) و أي أله ممكن تعزفه ، مثلا نوت أغاني أم كلثوم الموجودة في السوق مجرد تدوين للحن ، و فوق بعض الموازير مكتوب أسم الألة السولو التي ستقوم بعزف السولو ، و هذه الطريقة ليست الطريقة المثالية ، و لكن في الأعمال الكلاسيكية الغربية هناك نوتة توزيع مدون فيها الألحان التى ستقوم جميع الآلات بعزفها أمام قائد الأوركسترا لكي يتابع جميع الآلات في وقت واحد ، كما يوجد نوتة لكل أله على حدى أمام عازف هذه الألة. و يوجد نوتة خاصة للإيقاع.
3. تقدر تكتب النوتة لما تتعلم كيفية تحديد أسم النغمة التى تسمعها و زمانها و تتدرب على القراءة و على الكتابة و ممكن تكتسب هذه المهارة في شهور إذا كان عندك عزيمة بس غالبا ها تحتاج حد جنبك يصحح لك الأخطاء. هات كتاب صولفيج و حاول.
4. هناك فرق بين نوتة التوزيع و نوت السولو ، نوتة التوزيع تشمل جميع الآلات ، و نوتة السولو نوتة لألة واحدة.
5. التوزيع الموسيقي بحر ، أنت ممكن تلحن بالفطرة من غير دراسة خالص لكن التوزيع الموسيقي محتاج إلي دراسة و خبرة ، و أعتقد أنك فاكر أن التوزيع الموسيقي مجرد لحن واحد يتم تقسيمه على الآلات المختلفة (الجزء ده يقولوه الجيتار و الجزء ده يقولوه الأكورديون و هكذا) هذا غير صحيح ، التوزيع الموسيقي على الأقل وضع نغمات مصاحبة للحن الأساسي فما يقوم بعزفه على ألة الكمان مختلف عما تعزفه الفيولا و الشيللو و الكونترباص و هذه الألحان المختلفة تعزف في وقت واحد. تعدد أصوات أفقي و رأسي ، و إضافة حليات و زخرفة و إضافة جمل للربط و إضافة تأثيرات .....
الموزع الموسيقي لا يشترط أن يكون عازف لعدة ألات و لكن لابد أن يكون عالم بإمكانية كل ألة سيقوم باستخدامها.

يوجد ملف مرفق لتوضيح الكروش و الدوبل كروش و النوار المنقوطة و الرباط (الليجاتو)

و أشكرك على مجاملتك فيما يخص لحن أغنية (حبيتك يا حبيبي يا أسمر)

[حسن عبد العليم]

اخي العزيز دكتور هشام شكراا ليك علي ردودك اللي مش عاوزه اي استفسار بعدها لان الاجابه والله بحس ان هيه اتعملت للسؤال دا وشكراا مره تانيه ليك جداااا وانا ممكن تكون اسئلتي مش عن المزيكا بالتحديد يعني انا بيهمني الحاجات الجوهريه
الصغيره عشان اوصل للدرجه اللي انا عاوزها لاني مش عاوز اتعمق في دراسه حاجه زي دي وبعدين يجي واحد ويسألني سؤال وااقف قداموا مستغرب او مبقاش عارف فياريت تعذرني احيانا وانا متأكد ان صدرك رحب ويع ملاين الاسئله

1- بالنسبه لموضع الزمن دا اللي هوه للنوار والكروش وبلانش وغيروا يعني انا من وجهه نظري شايف انوا نسبي بمعني
ان ممكن واحد يعزف نفس النوته ويكون الصوت مش هوه شويه وانا بتكلم بالتحديد ع البيانو اذاي اوصل لاني اابقي قادر اشتغل ع الزمن ومتأكد انو هوه مظبوط وانا ماشي صح ؟؟؟؟؟؟؟

2- امتي ااقدر اسمع اللحن او معزوفه بيانو معينه وااقدر انا اكتب النوته من خلال السمع واحط الزمن كمان انا بعد اذنك شايف انها صعبه اوووي ؟؟؟؟؟؟؟

3- في طبقات في البيانو لحنها حزين وفيه مش حزين ولا حسب الملودي اللي الواحد عملو ؟؟؟؟؟

4- ايه الفرق بين البيانو والاورج ؟؟؟؟؟ والبيانو بيبقي فيه كام اوكتاف ؟؟؟؟؟؟

5 - ايه دور المايستروزا في فرق الاوكسترا هل هوه بيتابع اللحن والتوزيع بس ولا بيرتب ادوار وزمن عزف كل مقطوعه ؟؟؟؟

6- حضرتك قولت في اجابه سؤال ليه ان المسافه بين اي نغمتين نوار طولها او قصرها مالهاش علاقه بطريقه عزفها
طيب مدام هيه مش هتأثر ليه بتتكتب احيانا طويله واحيانا قصيره ؟؟؟؟؟

[Hisham Khala]

الأخ حسن عبد العليم:
شكراً لأسئلتك المهمة ، و أنا سألت نفسي بعض هذه الأسئلة زمان
• الزمن شيئ نسبي بمعني أن اللحن الواحد يمكن عزفه بسرعات مختلفة و تحديد السرعة بواسطة كتابة التيمبو (Tempo) في بداية النوتة بالأرقام (مثلاً نوار= 120) أو كتابة وصف لسرعة اللحن مثل:
(Allegro, Allegatto, Vivace, Andante, Andantino, Adagio, …)
و لكن أختلاف سرعة اللحن لابد أن يتبعه الحفاظ على الزمن النسبي لنغمات اللحن بمعني إذا كانت الروند زمانها 8 ثواني مثلاً فإن البلانش زمانها 4 ثواني و النوار 2 ثانية و الكروش 1 ثانية و هكذا ، يعنى الموضوع نسبة و تناسب (راجع تمارين عملية لقراءة النوتة و خاصة نوتة فاتت جانبنا و ها تقدر تفهم يعني أية تمبو و أزاي بيقاس بالمترونوم)
• سماع اللحن ثم كتابته محتاج وقت و مثابرة و إصرار و بالنسبة لي أنا بدأت أكتب و أنا في كلية الطب لما كان فيه مسابقة الأغنية الشبابية على مستوي الجمهورية و كان لازم عشان أشترك بألحاني أن يكون اللحن مسجل على شريط كاسيت و معاه النوتة و حاولت أتذكر دروس الموسيقي أثناء المدرسة و بدأت أكتب ألحاني بنفسي و كان فيها أخطاء كثيرة جداً و لكن لما فوزت في المسابقة ، المجلس الأعلى للشباب و الرياضة أتاح لي الفرصة للتعامل مع الأستاذ مجدي الكومي الذي قام بالتدوين و تصحيح الأخطاء و لما فوزت في السنة التالية طلب منى المجلس مقابلة د. سمحة الخولي (رحمها الله) التي أعجبت باللحن (شروق الشمس) أشد الأعجاب و قالت لي بالحرف الواحد إن التركيبات اللحنية لا يعملها إلا موسيقي قديم و دارس أو موسيقي موهوب و سألتني عن دراستي للموسيقي فقلت لها مجرد حصص الموسيقي في المدرسة و فريق الموسيقي ، و نصحتني بالدراسة في معهد الكونسرفاتوار و بدأت الدراسة و أنا في خامسة طب. و تصورت وقتها أن الهارموني البسيط اللي كنت عامله هو سبب أعجابها باللحن و لكن بعد سنوات فهمت قصدها كان أيه؟
السؤال أخبارك في العزف السماعي أيه؟ هل بتعرف تعزف أي لحن تسمعه و لا فيه صعوبة؟
ممكن تستخدم الكمبيوتر (أي برنامج للتدوين الموسيقي) و أكتب نوتة لحن سهل أنت حافظه و شوف الكمبيوتر ها يعزف اللي أنت كتبته أزاي؟ و صحح نفسك.
• اللحن الحزين أو المبهج أو المعبر عن الحالة النفسية بيعتمد على عوامل كثيرة منها المقام و التحويلات المقامية و طريقة الصياغة و الإيقاع و السرعة و الزخارف و الحليات (مثال أغنية ساكن قصادي شوف عبد الوهاب عمل أيه في لحن زفة العروس المفروض أنه فرح و لكن حوله إلي شجن بإضافة رد للتشيلو) الجملة اللي قالها التشيلو غيرت الحالة النفسية تماماً.
• البيانو مختلف عن الأورج و عن الهاربيسكورد و عن الكلافيكورد ، و لكن الأورج تم تطويره بدرجة مذهلة تجعله يؤدي ما تؤدية عدة آلات و كذلك البيانو تم تطويره ، تكنيك العزف مختلف ، موضوع طويل ، البيانو فيه كبير و صغير و أفقي (مكتب) و رأسي و البيانو اللي عندي 7 أوكتاف و شوية و فيه أقل. أنا كنت بأعزف بيانو مش بطال لكن الأورج أضعف من مستواي في عزف البيانو.
• المايسترو : سوف أتصل بصديق عزيز (أحمد الحناوي "مايسترو") ليكتب مقالة عن المايسترو. (الأستعانة بصديق)
• طول أو قصر الخط الأفقي بين الكروش و الدوبل كروش بيعتمد على مساحة المازورة ، تذكر الآلة الكاتبة لما تطول كلمة عشان يبقي شكل الكتابة منسق (حرف س في حسن ممكن تطويله)
خالص تحياتي

[حسن عبد العليم]

استاذي الكبير دكتور هشام اشكرك علي سعه صدرك وردودك عليه واجاباتك الشافيه الوافيه ولكن طول ما انا في مشوار المزيكا
ستكون الاسئله كثيره وغير منتهيه ولكن المره دي انا هسال سؤال واحد بس

فيه اغاني لبعض الفنانين بعد ما بتنزل وخصوصا بالتحديد الفنان عمرو دياب لاني بحبوا جدااا وبسمع اغانيه بدقه اووي
المهم بعد ما الالبوم بتاعو بينزل في بعض الناس بتختار ليه بعض الاغاني وتلعبها بيانو وبعدين وانا بسمع البيانو اللي معمول للاغنيه بحس ان البيانو بيتكلم يعني ناقص ينطق الكلمات بتاعه الاغنيه هيه بتبقي صولو للاغنيه من غير صوت للمطرب انا عاوز اعرف دا بيتم اذي ؟؟؟ هوضح ليك اكتر بحس ان كل كلمه البيانو بيقولها طيب دااا اذاي ؟؟؟ وهل لو واحد تاني عمل نفس الاغنيه علي البيانو بردوا هتبقي ذي ما غيروا عملها ولا هيبقي فيه اختلاف ؟؟؟؟ االلي لفت نظري للسؤال دا ان أاغاني ام كلثوم بلاقي كل كلمه مكتوب تحتها لحنها يعني هل اللحن دا ثابت لنفس الكلمه ؟؟؟ ولا لو ملحن تاني خد الكلمات دي هيعمل لحن مختلف لنفس اللكلمات ؟؟؟؟ اتمني يكون مضمون السؤال واصل ؟؟؟؟

يعني اني احط اللحن مناسب لكل كلمه بحيث اللي يسمعها علي كول يقول دي اغنيه فلان ؟؟؟؟

واشكرك علي اهتمامك وردك عليه .....